İlham Əliyev Qarabağdan işğalçı erməniləri iti qovan kimi qovur

Torpaqların işğaldan azad olunması uğrunda Vətən müharibəsi gedir

Gənclərdən, hətta yaşa dolmuş insanlardan bu sözləri illərdir dəfələrlə, dönə-dönə eşidirdik: "Silah götürüb işğal altında olan torpaqlarımızı azad etməyə hazırıq. Prezidentimizin, Ali Baş Komandanın əmrini gözləyirik”.

Bəlkə kiminsə ağlına gələ bilərdi ki, bunu onların heç də hamısı ürəkdən, tam məsuliyyəti ilə demir. Bəlkə də dilxoşluq edir, özünü yalançı patriot kimi göstərmək istəyir.

O məqam gəldi. Ali Baş Komandan əmrini verdi. Hamı, o cümlədən digər ölkələrin vətəndaşları da gördü ki, Azərbaycan xalqının bir deyimi ilə ifadə etsək, papaq altında necə oğullar yatırmış!

Azərbaycan əsgər və zabitləri 30 ildir ipə-sapa yatmayan, cilovlanmayan, işğalçılıq siyasətindən əl çəkməyən yağı düşmənə sarsıdıcı zərbələr endirir. Yüzlərlə gənc könüllü olaraq döyüşə yollanmağı qərara almışdır, bunu təkidlə xahiş edir. Hələ neçə-neçə müxtəlif yaşlı insan ordu sıralarına qoşulmaqda israrlıdır.

Bu da təsadüfi deyil. Qəhrəman, vətənpərvər xalqın övladları da məhz bu cür olur. Müdrik xalqın müdrik də rəhbəri olur. Sərkərdə güclü olanda əsgər də güclü olur. "Sərkərdə igid olsa, heç getməz ordu bada” misraları ilə bitən el bayatımız yada düşür.

Bu gün igid oğullarımız, Vətən, torpaq müdafiəçiləri Prezident İlham Əliyevin sərkərdə olduğu, gündən-günə gücləndirdiyi, qayğı göstərdiyi, inandığı və güvəndiyi orduda xidmət edirlər. Həqiqətdir ki, adi insani münasibətlərdə olduğu kimi ən qlobal məsələlərdə də qarşılıqlı hörmət, ehtiram, etibar, inam ən böyük amildir. Azərbaycan xalqı, Azərbaycan əsgəri də bax beləcə öz Prezidentinə, Ali Baş Komandanına inanır, arxalanır, ondan örnək götürür.

Vətən torpağı yad tapdağında, yağı əlində qala bilməz! Ölkəmizdə rəhbər də, xalq da, əsgər də belə düşünür, belə deyir. Bu gün Azərbaycan öz Prezidenti ətrafında bir yumruq kimi birləşib. Bu gün xalqımız öz Prezidenti ilə, onun cəsarəti, qətiyyəti, dönməzliyi ilə qürur duyur.

Məhz belə olanda düşmən doğma torpağımızdan it kimi qovulur. Daim terror törətməyə can atan, qatillik vərdişindən əl çəkməyən, qan tökməyə həris olan düşmən siçan kimi gizlənir, qaçır. Hiyləgər xislətli düşmən yenə sülh danışıqları istəyir. Bu cür vandallar, torpaq oğruları sülhün qədrini hardan bilər?! Onlar insan dilində danışmağı bacarmadığı kimi, insan dilini də başa düşmürlər axı.

Prezident İlham Əliyev bu il oktyabrın 4-də Azərbaycan xalqına müraciətində demişdir: "Paşinyan hər gün bir dünya liderinə zəng edir. Hər gün! Mən heç kimə zəng etməmişəm, heç bir liderə zəng etməmişəm. Təmaslarım olub, mənə zəng ediblər. Amma o, adam qalmayıb ki, zəng etməsin, yalvarmasın, emissar göndərməsin, ağlamasın, onların ayağına yıxılmasın. Bax budur bunun sonu. Əgər bizimlə normal dildə danışsaydı, bizim müqəddəs şəhərimizi mundarlamasaydı, əlbəttə, biz ümidlərlə yaşayıb çalışardıq ki, bu məsələ danışıqlar yolu ilə həll olunsun. Amma hər addım təxribat, hər addım təhqir və hesab edir ki, biz bununla barışacağıq?! İndi biz göstərdik kim-kimdir. İti qovan kimi qovuruq onları! Azərbaycan əsgəri onları iti qovan kimi qovur! İşğal edilmiş torpaqlarda Azərbaycan bayrağı qaldırılır! Onların səngərlərində Azərbaycan əsgəri dayanır! Onların postları bizim əlimizdədir! Onların tanklarını biz sürürük! Onların digər silahlı texnikaları bizim əlimizdədir, yük maşınları bizim əlimizdədir! Biz xilaskar missiyamızı icra edirik və edəcəyik!”

Erməni faşistləri özləri də çox yaxşı bilirlər ki, bu torpaq onların deyil. Qarabağ bineyi-qədimdən tarixi Azərbaycan torpağıdır, Azərbaycanındır və Azərbaycanın olacaq. Ona görə də Azərbaycan oğlu bu torpaq uğrunda həyatından keçir və bunu özü üçün şərafət sayır. Torpaq uğrunda şəhidlik zirvəsinə yüksələnlər xalqımızın nəzərində ucadırlar, müqəddəsdirlər. Erməni əsgəri isə özgə torpağında urvatsız ölür. Sağ qalsa belə, heç bir hörmət-izzət sahibi olmur. Mənasız vuruşduğunu özü də bilir. Ona görə də silahını, papağını atıb gedir, siçan kimi qaçır, gizlənir. Belə də olmalıdır!

Prezidentimizin dediyi kimi: "Biz haqq-ədalət tərəfindəyik. Biz tarixin ən şərəfli anlarını yaşayırıq. Azərbaycan xalqı qədim xalqdır. Bizim tariximizdə bir çox şərəfli anlar olub, hadisələr olub, qələbələr olub. Onların sırasında bugünkü hadisələr xüsusi yerdədir. Biz ədaləti bərpa edirik, ərazi bütövlüyümüzü bərpa edirik, Azərbaycan xalqının ümidlərini doğrulduruq və bundan sonra da doğruldacağıq. Biz haqlıyıq, biz zəfər çalacağıq! Qarabağ bizimdir, Qarabağ Azərbaycandır!”

Flora SADIQLI

Azərbaycan.-2020.- 6 oktyabr.- S.9.