Hünərinə alqış!

Azərbaycanın mərd əsgər və zabitləri, əziz oğullarım ! Siz Azərbaycan tarixinin yeni şanlı səhifələrini yazırsınız. Torpaqlarımızın mənfur düşmənin işğalından azad edilməsində qətiyyətli, qorxmaz, döyüşkən, nikbin ruhlu olmağınız bir ana kimi mənim də ürəyimi dağa döndərir.

Bilin ki, düşmən sizdən çox qorxur. Onu öz faşist yuvasına kimi qovun. Ona elə bir tarixi dərs verin ki, bizim Vətənimizin, Azərbaycanın adını çəkməyə, bu tərəflərə baxmağa belə cürət etməsin.

Bilin ki, bütün analar kimi mən də sizə hər gün dua edirəm. Sizə Allahdan cansağlığı, dözüm, mərdlik, mətinlik diləyirəm, mənəvi dayaq olmağıma sevinirəm. Çünki siz düşmənə aman vermirsiniz, düz də edirsiniz. Qaniçən, kəmfürsət yağıya heç bir güzəşt ola bilməz!

Mən xalqımıza, ayrı-ayrılıqda sizin hər birinizə Qələbə sevinci arzu edirəm.

Əziz əsgər balam! Əgər evlisənsə, isti ocağına, körpələrinin yanına sağ-salamat, zəfərlə qayıdasan. Əgər subaysansa, sənə "Vağzalı” ilə gəlin gətirmək qismət olsun bizlərə.

Sənin hünərinlə neçə illərdir yağı tapdağında inləyən torpaqlarımız və narahat şəhid ruhları dinclik tapacaq, həsrətlilər yurd-yuvasına qovuşacaq.

Başda Prezidentimiz, Ali Baş Komandan, möhtərəm İlham Əliyev olmaqla yaşasın Azərbaycan xalqı! Yaşasın Azərbaycan Ordusu! Qarabağ Azərbaycandır!

Gülxanım KAZIMOVA,

Bakı şəhər sakini

Azərbaycan.-2020.- 25 oktyabr.- S.8.