Azərbaycan-Pakistan parlament sədrlərinin videokonfrans formatında görüşü olub

Sentyabrın 5-də Milli Məclisin Sədri Sahibə Qafarovanın Pakistan İslam Respublikası Senatının Sədri Məhəmməd Sadiq Sancrani ilə videokonfrans formatında görüşü keçirilib. Bu barədə AZƏRTAC-a parlamentin Mətbuat və ictimaiyyətlə əlaqələr şöbəsindən məlumat verilib.

Görüş təşəbbüsü üçün Pakistan Senatının Sədrinə təşəkkürünü bildirən Sahibə Qafarova bildirib ki, bu, Milli Məclisin Sədri vəzifəsinə seçiləndən sonra xarici həmkarı ilə videokonfrans formatında ilk görüşüdür. Spiker xatırladıb ki, Azərbaycanla Pakistan arasında diplomatik münasibətlər 1992-ci ildə yaradılıb, 1993-cü ildə Pakistanın Azərbaycanda, 1997-ci ildə isə Azərbaycanın Pakistanda səfirliyi fəaliyyətə başlayıb.

Sahibə Qafarova ölkələrimizin dost və qardaşlıq münasibətlərindən söz açaraq, beynəlxalq arenada Pakistanın Dağlıq Qarabağ probleminin həlli istiqamətində ölkəmizə verdiyi daimi dəstəyə və işğalçı Ermənistanı dövlət olaraq tanımadığına görə təşəkkürünü bildirib. Sədr 2013-cü ildə Pakistan Senatının Azərbaycanın ərazi bütövlüyünü dəstəkləyən bəyanat verməsini, 2012-ci ildə Senatın Beynəlxalq münasibətlər komitəsinin, 2017-ci ildə isə Pakistan Milli Assambleyasının Xarici əlaqələr üzrə daimi komitəsinin Xocalı soyqırımına dair qətnamələr qəbul etməsini məmnuniyyətlə xatırlayıb.

Sahibə Qafarova Azərbaycanın həmişə Pakistanın yanında olduğunu və ölkəmizin Kəşmir probleminin BMT-nin qəbul etdiyi qətnamələr əsasında həll edilməsini dəstəklədiyini diqqətə çatdırıb.

Pakistan Senatının Sədri Məhəmməd Sadiq Sancrani görüş təklifini qəbul etdiyinə görə Milli Məclisin Sədri Sahibə Qafarovaya minnətdarlığını bildirib. Senatın Sədri Prezident İlham Əliyevə pandemiya dövründə Pakistana Azərbaycan tərəfindən göstərilən 1 milyon dollar məbləğində yardıma görə təşəkkür edib.

O qeyd edib ki, hər iki ölkənin parlamentində qarşılıqlı işçi qrupları fəaliyyət göstərir və parlamentlərarası əlaqələrin inkişafında yaxından iştirak edirlər. Pakistan Senatının sədri 2018-ci ildə ölkəmizin müstəqilliyinin 100 illik yubileyi ilə bağlı tədbirlərdə iştirak etmək üçün Azərbaycanda olduğunu deyib və pandemiyadan sonra qarşılıqlı səfərlərin intensivliyinin artırılmasının vacibliyini vurğulayıb. O bildirib ki, Pakistan da həmişə Azərbaycanın yanındadır və hər zaman olduğu kimi, Dağlıq Qarabağ münaqişəsinin BMT-nin qəbul etdiyi qətnamələr əsasında həllini dəstəkləyir.

Parlament sədrləri bir-birini pandemiyadan sonra öz ölkələrinə səfərə dəvət ediblər.

Azərbaycan.- 2020.-6 sentyabr.- S.2.