Azərbaycanda normal həyata dönüş sürətlənib

Müsbət dinamikanı saxlamaq və yaxın gələcəkdə tam normal həyata qayıtmaq hər kəsin sosial məsuliyyətindən asılıdır

Yeni tip koronavirus (COVID-19) doqquz aydır bəşəriyyətin əsas problemi olaraq qalmaqdadır. Dünya əhalisi bu virusla mübarizəyə qalxsa da, təəssüf ki, hələ də gözəgörünməz "taclı” bəlaya uduzur. Koronavirus artan statistika ilə insanlara yoluxmağa və canlar almağa davam edir. Ümumdünya Səhiyyə Təşkilatının (ÜST) məlumatına görə, artıq Yer kürəsində COVID-19-a yoluxanların ümumi sayı 28 milyona, həyatını itirənlərin sayı isə 900 minə çatıb. Peyvənd tapılmayana qədər koronavirus hər kəs üçün təhlükəli mərəz olaraq qalmaqdadır.

Hazırda dünya ölkələri koronavirusa qarşı 180-ə yaxın peyvənd hazırlayır. ÜST-ün Baş direktoru Tedros Adhanom Gebreyesus Cenevrədə keçirilən brifinqdə deyib ki, bu peyvəndlərdən 35-i insanların üzərində sınaqdan keçirilir: "Dünya tarixində heç bir xəstəliklə əlaqədar bu qədər sürətli araşdırma olmamışdı”.

Azərbaycan da COVID-19-a qarşı vaksinin ölkəmizə gətirilməsi ilə əlaqədar bir neçə şirkətlə fəal iş aparır. Prezident İlham Əliyev Fövqəladə Hallar Nazirliyinin Tibb Mərkəzinin koronaviruslu xəstələrin müalicəsi üçün nəzərdə tutulan modul tipli növbəti hospitalının açılışında çıxışı zamanı respublikamızın bu sahədə də peyvəndi əldə edən birinci ölkələr sırasında yer alacağına ümidvar olduğunu bildirib: "Ancaq burada əsas şərt bu peyvəndin bütün sınaq mərhələlərindən keçməsidir. Həkimlər yaxşı bilirlər ki, istənilən yeni peyvənd bir neçə mərhələdən keçir və yalnız ondan sonra bazara çıxarılır, insanların vaksinasiyası üçün istifadə olunur. Ona görə bütün mərhələlər, şirkətlərin apardığı bütün araşdırmalar öz nəticəsini verəndən, bütün sınaq testləri və beynəlxalq sertifikatlaşdırma aparılandan sonra biz bu peyvəndi ölkəmizə gətirəcəyik və ümid edirəm, ondan sonra demək olacaq ki, bu dəhşətli vəziyyət arxada qalıb. Hesab edirəm ki, biz o vaxta qədər öz addımlarımızı mövcud vəziyyətə uyğun atmalıyıq”.

Azərbaycan hökuməti ilk gündən qlobal böhranla hərtərəfli mübarizə aparır. Ölkəmiz pandemiyanın yayılmağa başladığı zamanlardan təhlükəli bəlaya qarşı qətiyyətli tədbirlərə başladı. Dövlət infeksiyanın yayıldığı ilkin mərhələdə vəziyyəti ciddi nəzarət altında saxlayaraq əhalinin sağlamlığının, təhlükəsizliyinin və sosial rifahının təmin edilməsi sahəsində bütün tədbirləri çevik şəkildə həyata keçirdi. Virusun kütləvi yayılmasının qarşısını almaq məqsədilə dövlətin bütün resursları səfərbər olundu, lazımi işlər vaxtında və operativ şəkildə həyata keçirildi. Ölkənin səhiyyə infrastrukturu qısa zamanda koronavirusla mübarizəyə istiqamətləndirildi ki, bu da pandemiyanın mümkün fəsadlarını minimuma endirdi. Bakı şəhəri və regionlarda müasir texniki təchizatı olan modul tipli xəstəxanaların quraşdırılması, yeni tibb müəssisələrinin, laboratoriyaların açılması, ölkənin səhiyyə sisteminin əlavə 4100 çarpayılıq ehtiyat yeri ilə təmin olunması, sərt karantin dövründə işsizlərə, əhalinin aztəminatlı təbəqəsinə, həmçinin pandemiyadan zərər çəkmiş sahibkarlıq subyektlərinə dəyən zərərin azaldılması məqsədilə sosial və maliyyə dəstəyinin göstərilməsi və bu istiqamətdə görülən digər işlər dövlətin öz vətəndaşlarına göstərdiyi qayğının ən bariz nümunəsidir. Qısa vaxtda 45 müasir laboratoriyanın açılması, 990 mindən çox test keçirilməsi ölkəmizdə insan sağlamlığı və həyatının qorunmasına göstərilən qayğının ifadəsidir. Həkimlərə xüsusi diqqət göstərilməsi, səhiyyə sistemində çalışanların daim dövlət qayğısı ilə əhatə olunması, Türkiyə, Rusiya, Çin, İtaliya və Kubadan həkimlərin ölkəmizə dəvət edilməsi bu sahədə müsbət nəticələrin əldə edilməsinə səbəb oldu.

Vaxtında qəbul edilən düzgün qərarların yüksək keyfiyyətlə icrası ölkəmizdə virusu nəzarətolunan səviyyəyə endirdi. Azərbaycanda xüsusi karantin rejiminin tətbiqi ilə əlaqədar həyata keçirilən qabaqlayıcı tədbirlər nəticəsində və vətəndaşların məsuliyyətli davranışı sayəsində koronavirus infeksiyasının yayılması məhdudlaşdırıldı, yoluxma hallarının sayında azalmaya nail olundu. Pandemiya ilə mübarizə istiqamətində görülən əsaslı işlər sayəsində son aylar infeksiyaya yoluxma sayında müsbət tendensiyanın davam etməsi yumşalmalara sürətli keçidə rəvac verdi. Bakı, Sumqayıt şəhərləri və Abşeron rayonu istisna olmaqla digər şəhər və rayonlarda sərtləşdirilmiş xüsusi karantin rejimi ləğv edildi. Avqustun 5-dən başlayaraq sərt karantin rejiminin mövcud olduğu şəhər və rayonlarda, eləcə də ölkə üzrə bəzi məhdudiyyətlər aradan qaldırıldı və yumşalmalar təmin edildi. Sentyabrın 8-dən isə restoranların daxildə xidmət göstərmələrinə icazə verildi. Rayonlara gediş-gəlişlə əlaqədar tətbiq olunmuş məhdudiyyət aradan götürüldü. Lakin avtobus və qatar ilə şəhərlərarası sərnişin daşımaya tətbiq edilən qadağa hələ də qüvvədədir. Yəni vətəndaşlar yalnız şəxsi avtomobilləri ilə bölgələrə gedib-gələ bilərlər.

Təhsil nazirinin əmrinə əsasən, sentyabrın 15-dən Bakı, Sumqayıt şəhərləri və Abşeron rayonunun ümumi təhsil müəssisələrinin fəaliyyəti əyani formada həftədə 2 dəfə, digər şəhər və rayonların ümumi təhsil müəssisələrinin fəaliyyəti isə əyani formada həftədə 3 dəfə tətbiq edilməklə tədris planlarına müvafiq təşkil olunacaq.

Nazirlər Kabineti yanında Operativ Qərargahın qərarına uyğun olaraq, 1 oktyabr tarixdən Bakı, Sumqayıt şəhərləri və Abşeron rayonu üzrə, 15 sentyabrdan isə digər rayon və şəhərlərdə fəaliyyət göstərən dövlət və özəl uşaq bağçalarının fəaliyyətinə icazə verilib.

Hazırda polis əməkdaşları tərəfindən paytaxtla yanaşı, Sumqayıt və Abşeronda koronavirus pandemiyasının yayılmasının qarşısının alınması, elan edilən xüsusi karantin rejimi qaydalarına riayət olunması məqsədilə gücləndirilmiş nəzarət profilaktik-maarifləndirmə tədbirləri görülür. Mövcud sanitar-epidemioloji vəziyyətin nəzarətdə saxlanılması məqsədilə qapalı məkanlar, restoranlar, marketlər və apteklərdə reydlər keçirilir. İctimai iaşə obyektlərində aparılan müşahidələr zamanı aşkar edilən qayda pozuntuları polislər tərəfindən qeydiyyata alınıb. Həmin obyekt sahibləri barəsində inzibati protokollar tərtib edilib. Obyektlərdə sosial məsafəni gözləməyən, tənəffüs yollarını qoruyan fərdi vasitələrdən istifadə etməyən şəxslər qanunvericiliyə uyğun olaraq inzibati məsuliyyətə cəlb olunublar. Reydlər zamanı polislər tərəfindən sahibkarlar, eləcə də alıcıların diqqətinə sanitar-karantin qaydalarına ciddi əməl etməklə fəaliyyət göstərməyin vacibliyi çatdırılıb.

Azərbaycan COVID-19-la mübarizədə çox uğurlu fəaliyyət göstərir, qəbul edilmiş qərarlar vaxtında və yüksək keyfiyyətlə icra edilir. Aylardır dövlət tərəfindən aparılan mübarizə, vətəndaşlarımızın qoyulan qaydalara məsuliyyətlə riayət etməsi sayəsində ölkəmizdə normal həyata dönüş sürətlənib. Hazırda əsas məsələ əldə olunan müsbət dinamikanı, uğuru qorumaqdır. Statistikada əldə olunan müsbət dinamikanı saxlamaq və yaxın gələcəkdə tam normal həyata qayıtmaq hər kəsin sosial məsuliyyətindən asılıdır. Yumşalmalara gedilməsi, məhdudiyyətlərin aradan qaldırılması pandemiyanın başa çatması anlamına gəlməməli və insanlarda arxayınlıq yaratmamalıdır. Xüsusilə də payız-qış mövsümündə xəstəliklərin baş qaldırması koronavirusun yenidən alovlanmasına səbəb ola bilər. Ona görə də nə qədər ki peyvənd tapılmayıb hər kəs ikiqat məsuliyyətli olmalıdır. İnsanlar COVID-19-la birgə mühitdə yaşamağı öyrənməlidir. Müvafiq gigiyenik qaydalara riayət edilməsi artıq vərdiş halını almalıdır. Nazirlər Kabineti yanında Operativ Qərargahın dünya tibb təcrübəsinə əsasən müəyyənləşdirdiyi qaydaların icrası pandemiyadan az itki ilə çıxmağın ən optimal yoludur. İnsanlarımız yenə də sərt karantin dövründə olduğu kimi, şəxsi gigiyena qaydalarına əməl etmək, sosial məsafəni qorumaq, maska taxmaq, mövcud qaydalara ciddi əməl etməklə özlərini və çevrələrini qoruya bilərlər.

Xəyalə MURADLI

Azərbaycan.- 2020.- 13 sentyabr.- S.1; 4.