Qış ovqatlı, Zəfər sovqatlı...

Bayram ab-havalı, Qələbə bayraqlı Bakının küçələri bu dəfə “Şən yolka” əhvali-ruhiyyəlilərlə aşıb-daşır...

Bu da yola salınan ilin son günü. Tarixin daha bir səhifəsi çevrilir. 30 ilə yaxın idi ki, hər ilin son günlərində xalqımızın böyükdən-kiçiyə diləyi Qarabağımızın azad edilməsi idi. Şükürlər olsun ki, ötən ilin sentyabrından başlayıb 44 gün davam edən Vətən müharibəsində əldə edilən Qələbə həmin həsrət dolu nisgilimizə son qoydu, diləklər hasil oldu. Bu Zəfər bayramını xalqımıza yaşadan isə Müzəffər Ali Baş Komandan İlham Əliyev və rəhbərlik etdiyi Silahlı Qüvvələrimizin sıralarında düşmənə öz layiq olduğu yeri göstərən qəhrəman Azərbaycan oğullarıdır. Ömrümüzə-günümüzə, həyatımıza yenicə qədəm basan Yeni ildən dilək diləyənlər az olmadı. Axı, illər boyu, Qarabağımızın, onun zümrüd tacı olan könül şüşəmizin - Şuşamızın, eləcə də işğal altında qalan digər yurdlarımızın erməni vandallarının əsarətindən azad edilməsi diləyi ilə anaların əlləri göylərə ucalırdı...

Yola salınan hər köhnə ilin sonunda hesabat anları olur. Yeni illə könhə ilin qovuşduğu gün xalqımız üçün daha əlamətdardır. 31 dekabr xalqımızın tarixinə Dünya Azərbaycanlılarının Həmrəylik Günü kimi yazılıb. Bu günü xalqımıza bəxş edən Ulu Öndər Heydər Əliyevin arzu və istəklərindən biri məhz Azərbaycan adlı Vətənindən uzaq düşmüş soydaşlarımızın birliyini yaratmaq idi. Bu müqəddəs birliyə nail olan Ümummilli Liderin gerçəkləşən hər bir ideya və arzusu Azərbaycanımızın sabahının bugünündən də işıqlı, nurlu, güclü olmasına, azadlığının və müstəqilliyinin möhkəmləndirilməsinə hesablanıb. Həmin müqəddəs amala söykənən siyasət bu gün Prezident İlham Əliyev tərəfindən məqsədyönlü şəkildə uğurla davam etdirilir.

Yeni təqvim ilinin xalqımız üçün gətirdiyi yeniliklər ildən-ilə öz rəngarəngliyi ilə yadda qalır. Yola saldığımız 2021-ci il də xalqımızın və ölkəmizin tarixinə yaddaqalan zəngin hadisələrlə yazıldı.

Builki Yeni il şənliklərimiz Qələbə ovqatlı - Zəfər sovqatlıdır. Paytaxt Bakı bu dəfə bayram libasına bir özgə ovqatda bürünüb. Bu, sanki qış fəslinin gəlişindən daha çox Qələbəmizin Vətənimizə bəxş etdiyi bayram sovqatıdır. Şaxta baba ilə Qar qızın heybəsində bu dəfə gətirdikləri sovqat əslində, hünərvər şəhid və qazilərimizin adları, həm də illərlə düşmən tapdağında inləyən yurdlarımızın işğaldan azad edilmə tarixi həkk olunan hədiyyələrdir.

Yolumuzu şəhərin hansı tərəfindən salsaq, 31 Dekabr - Dünya Azərbaycanlılarının Həmrəylik Günündən və xoş müjdələrlə hər ailənin, bütövlükdə xalqımızın qapısını döyən 2022-ci ilin gəlişindən danışılır və sevinc dolu söz açılırdı. Həmsöhbətlərimizin arasında kimlər yox idi ki? Bağçadan, ailədən, orta və ali məktəblərdən gələnlərin arasında babalar da vardı, nənələr də, atalar, analar, qardaş-bacılar, əmilər-dayılar, xalalar-bibilər... Hamısının da simasında xoş ovqatlı bayram əhvali-ruhiyyəsi duyulurdu.

Əslən Yardımlı rayonundan olan, ixtisasca həkim Fikrət Əliyev yeganə övladları - Murad balası və həyat yoldaşı Nahidə xanımla builki Yeni il şənliklərinə qatılıblar. Həkim deyir ki, illərdir belə xoş ovqatın həsrətini çəkirdilər: “...Deyirlər ki, ili hansı ovqatla qarşılayarsansa, o cür də yola salarsan. Bu mənada, xalqımız hər gələn yeni ili həmişə yüksək əhvali-ruhiyyə və xoş ovqatla qarşılayıb. Sanki təbiət də illərin görüşünə əliboş gəlməməyə çalışır. Hər Yeni ili doğma Bakımız və ümumiyyətlə, Azərbaycan təbiəti özünəməxsus qarşılayır. “Qışın oğlan çağı” günəşin zərrin şəfəqləri mavi Xəzərdə “yuyunursa”, qəfildən əsən gilavar bu ovqata qar sovqatı ilə qoşulur. Şaxta baba və Qar qız üçün darıxan nəvələr nənələrinin, babalarının əllərindən yapışıb şəhərin füsunkarlığında əylənmək, xüsusən ən sevimli əyləncələri olan xizəklə sürüşmək, qartopu oynamaq... istəyində olurlar. Qış da ki qarı, şaxtası, dağlarda çovğunu, boran-tufanıyla gözəldir...”

Ağdam rayonunun Bağbanlar kəndində dünyaya göz açan Namiq Nəbiyevin ömür-gün yoldaşı Tünzalə xanımın da bu bayram günlərində deməyə sözü az deyildi. Ailənin anası deyir ki, Ağdamdan didərgin düşəndən, əslində, bizim bayram əhvali-ruhiyyəmiz olmamışdı. Adət-ənənələrimizə uyğun ürəyimizdə niyyət tutar, dilək diləyərdik. 2020-ci ildə də diləmişdik ki, Yeni il Qarabağ ili kimi yazılsın tarixə. Diləklərin hasil olmasını biz də yaşadıq. Ötən ildən bayramlarımız, Yeni illərimiz xoş ovqatlıdır. Bir az bundan öncə Hərbi Qənimətlər Parkını ziyarət etdik. Qarabağımızın, yerləyeksan edilən “Ruhlar şəhəri” - Ağdamımızın daş-torpağının azad edilməsi yolunda canından və qanından keçən igidlərimizin qəhrəmanlıqlarını, şücaətlərini təsdiqləyən həmin park da Şəhidlər xiyabanı kimi xalqımızın əsl ziyarət məkanlarından birinə çevrilib. Bu sevinci bizə yaşadan Müzəffər Ali Baş Komandan İlham Əliyevin bu yaxınlarda imzaladığı bir sıra fərman və sərəncamlar da xalqımızın rifahının daha da yüksəldilməsi baxımından çox mühüm və alqışlanasıdır. Gənclərimizə, yaşlı qocalarımıza, əlil və qazilərimizə dövlət qayğısı ilə əhatə olunan xalqımızın arzuları nəinki çiçək açdı, hətta firavan yaşamaları üçün Prezidentimiz tərəfindən mühüm qərarlar qəbul edildi...”

Bakı şəhərindəki 21 nömrəli Kəlbəcər tam orta məktəbin məktəbəqədər və ibtidai sinif şagirdlərinin də bir qrupu paytaxtın küçələrində, İçərişəhərdə Yeni ili qarşılayan şənlik iştirakçıları arasında idilər. Məktəbin direktoru Şəmsi Nəbiyevlə 4-cü sinfin rəhbəri, YAP fəalı Gültəkin Cəlilova balacaları - Əminə Cəfərovanı, Fərahim və Fuad Məmmədovları, Xədicə Verdiyevanı, Yasir İsmayılovu, Nihad Əhmədovu təqdim edirlər. Məryəm, Orxan, Nuray, Fərrux və Əziz də məktəbli dostlarına qoşulurlar. Onlar bu dəfə yalnız “Şaxta baba” şeirini yox, “Üçrəngli bayrağım” və şəhid qəhrəmanlarımıza həsr edilən mahnı və şeirləri söyləyirlər.

Gültəkin müəllim onu da vurğuladı ki, şagirdlərimiz də müəllimlərimiz kimi builki Yeni il şənliklərinə Zəfər ovqatı ilə qatılıblar.

Övladları ilə ilin son günlərində Bakı küçələrində keçirilən şənliklərə qatılanlardan biri də Laçın rayonundan olan, Bakıda müvəqqəti məskunlaşmış, Nəsimi rayonunda fəaliyyət göstərən MKS-in əməkdaşı Sevinc İbrahimova idi. Ovqatı şənliklərə köklənmiş kitabxanaçı fikirlərini ifadə edərkən bildirdi ki, bu il də Şaxta baba ilə Qar qız qarlı dağlar aşaraq, çox ellər dolaşaraq yurdumuza, Vətənimizə ayaqları sayalı gəlir: “2021-ci il xalqımızın həyatına özünəməxsus tarixi hadisələrlə yazıldı. Onların arasında ən mühümü Qarabağda Qələbəmizin bir illiyinin təmtəraqlı təşkili oldu. Şuşa Azərbaycanın mədəniyyət paytaxtı kimi sinəsini doğmalarına açdı. Şuşada keçirilən “Xarıbülbül” Beynəlxalq Musiqi Festivalında, həmçinin M.P.Vaqifin məqbərəsinin açılışında iştirak edənlər “Zəfər Yolu”nun yolçuları kimi tarixə yazıldılar. Bundan da böyük xoşbəxtlik olarmı?! Biz bunu illərdir ki, arzulayır və gözləyirdik”.

Koronavirus pandemiyasının özü ilə gətirdiyi bəzi qadağalara baxmayaraq, xalqımızın illərin qovuşuğunda yaşadığı bayram sovqatlı günlər yeni başlayır. Bu günlərdə xoş ovqat yaradan daha bir mühüm məsələ də ölkəmizdə

COVID-19-a yoluxanların sayının az olması, sağalanların və normal həyata qaytarılanların isə çoxalmasıdır. Bu da onu göstərir ki, xalqımız qarşıdan gələn 2022-ci ili elə pandemiyasız qarşılayıb, sağlam əhvali-ruhiyyədə də yola salacaq.

Ayrı-ayrı xalqlar Yeni ili eyni ümidlərlə - xoş möcüzələr, uğurlar, xoşbəxtlik arzusu ilə öz adət-ənənələrinə uyğun qarşılayıb yola salırlar. Azərbaycanda isə dekabrın son günü bayramları da bir-birinə qovuşdurur. Axı, həm də 31 Dekabr - Dünya Azərbaycanlılarının Həmrəylik Günüdür. Bayramlarımız mübarək! Xoş gəlmisən, təzə il, gəl, ömrümüzü bəzə, 2022-ci il!

Məhəmməd NƏRİMANOĞLU

Azərbaycan.- 2021.- 31 dekabr.- S.26.