İlham Əliyev Azərbaycanı yüksək texnologiyalar əsasında inkişaf edən ölkəyə çevirir

Azərbaycan Prezidenti İtaliyanın “Maire Tecnimont Group” şirkətinin sədrini və nümayəndə heyətini videoformatda qəbul edərkən ölkə iqtisadiyyatının XXI əsrin üçüncü onilliyində yüksək texnologiyalar əsasında inkişaf edəcəyini bir daha təsdiq etdi. İqtisadiyyatın yüksək texnologiyalar əsasında inkişafını vacib sayan və hamıdan müasir tələblərlə ayaqlaşmağı tələb edən dövlət başçısı islahatların yeni mərhələsini növbəti dəfə önə çəkdi.

Azərbaycan böyük Zəfərdən sonra quruculuq işlərinə start vermiş və bu zaman yüksək texnologiyalara keçidi elan etmişdir. Azərbaycan Prezidenti aparıcı dost ölkələri yüksək texnologiyalar əsasında dirçəldiləcək Qarabağda əməkdaşlığa dəvət etmişdir.

Qafqazın iki dövləti arasındakı fərqlərə incəliklərinədək bələd olan “Maire Tecnimont Group”un nümayəndə heyətinin başçısı Fabrizio Di Amato Azərbaycan Prezidentinə belə müraciət etdi: “2020-ci ildə Dağlıq Qarabağdakı gərgin dövrü geridə qoymağınız münasibətilə Sizi təbrik etmək istəyirəm. Biz Azərbaycana çox yaxınıq və həmin mühüm vaxt bütün italyanların diqqəti də burada idi”.

Fabrizio Di Amato Azərbaycanda şirkətin artıq 200 nəfərə yaxın heyətinin çalışdığını, işçi qüvvəsinin 72 faizini azərbaycanlılar təşkil etdiyini bildirdi. Yerli universitet tələbələri, ümumiyyətlə, gənclərlə əməkdaşlığa üstünlük verdiklərini, sənaye zəncirinin yerli məzmunu, yəni təchizat zəncirində daha çox Azərbaycan şirkətləri ilə əməkdaşlıqda maraqlı olduqlarını diqqətə çatdırdı.

Prezident İlham Əliyev Fabrizio Di Amatoya Azərbaycanın ərazi bütövlüyünü bərpa etməsi münasibətilə təbrikinə görə təşəkkürünü bildirdi və dedi ki, biz ölkəmiz üçün çox çətinliklər yaradan bu əsas məsələni həll etdikdən sonra daha da sürətlə inkişaf edəcəyik: “İndi tariximizin yeni səhifəsidir. Azərbaycan azad edilmiş ərazilərdə həyatı bərpa etmək üçün zəruri olan bütün tədbirləri görəcək.

Bu, asan olmayacaq, çünki hər şey məhv edilib və işğaldan azad olunmuş əraziləri ziyarət etdikdə biz hər şeyin dağıldığını müşahidə edə bilərik. Bütün binalar, zavodlar, tarixi abidələr, sosial infrastruktur yerlə yeksan edilib. Beləliklə, biz hər şeyi sıfırdan etməli olacağıq. Buna görə də, əlbəttə, fəaliyyətimizin bu istiqaməti üzrə bizə yaxşı tərəfdaşlar lazım olacaq”.

İlham Əliyev “Maire Tecnimont Group”un ölkəmizdəki fəaliyyətini yüksək qiymətləndirdi, bu şirkətin Azərbaycanda dəyəri 1,6 milyard avrodan çox olan layihələrə cəlb olunduğunu vurğuladı və bu əməkdaşlığın davam etdirilməsinin əhəmiyyətli olduğunu bildirdi: “İtaliya və Azərbaycan arasında münasibətlərin uğurla inkişaf etdiyini qeyd etmək istəyirəm. Bir il bundan əvvəl mənim ölkənizə dövlət səfərim bunu bir daha göstərdi və mən bizim rəhbər şəxslərlə, biznes icması ilə görüşlərimizi və müzakirələrimizi xatırlayıram. Biz həmişə sözümüzü tuturuq və razılaşdırdıqlarımızın hamısını icra edirik. Həmçinin keçən il tariximizdə yaşanan çətin vaxtlarda biz italyan xalqının bizimlə həmrəy olduğunun şahidi olduq. Biz İtaliya mediasının bu məsələyə obyektiv yanaşmasının şahidi olduq və onu da gördük ki, imzaladığımız və vurğuladığımız məsələləri reallığa çevirdik”.

Dövlət başçısı qəbulda italyan şirkətlərinin ərazilərimizin bərpası ilə bağlı layihələrdə çox fəal olacaqlarını, artıq bərpa və tikinti işləri ilə bağlı bir neçə italyan şirkətinin dəvət olunduğunu, Bakıda İtaliya-Azərbaycan Universitetinin yaradılmasına start verildiyini də diqqətə çatdırdı.

“Maire Tecnimont Group”un baş icraçı direktoru Pierroberto Folgiero təmsil etdiyi şirkətin ölkəmizə yeni texnologiyalar sahəsində töhfə vermək niyyətində olduğunu, “yaşıl kimya” adlanan sahəni inkişaf etdirməkdə, enerji istehsalı sahəsini genişləndirməkdə maraqlı olduqlarını bildirdi.

Göründüyü kimi, Azərbaycan Prezidentinin bütünlükdə yüksək texnologiyalara keçidi elan etməsi italyanlarda sonsuz maraq doğurmuşdur. Pierroberto Folgiero: “İcazə verin, bildirim ki, yeni texnologiyaları inkişaf etdirmək və sizin çevikliyinizdən faydalanaraq sahibkarlıq imkanlarından istifadə etməkdən çox şad olardıq. Bu keyfiyyətlər İtaliyanın iş adamlarının da yanaşmasının əsasında dayanır və müəyyən dərəcədə “yaşıl kimya” sahəsində qabaqcıl mövqeyi şərtləndirir”.

Prezident İlham Əliyev italyan biznesmenlərin gələcək tərəfdaşlıqla bağlı ideya və fikirlərini tam dəstəklədi, “yaşıl kimya”nın texnoloji inkişaf baxımından yenilik kimi Azərbaycanda yüksək texnologiyaların tətbiqi ilə uzlaşdığını təsdiqlədi. Ətraf mühitin qorunması ilə bağlı tədbirlər davam edəcək, buna görə də “yaşıl enerji” konsepsiyası, ölkəmizi irəliyə aparan yol kimi dəstəklənəcək: “Mən artıq bəyan etmişəm ki, azad olunmuş bütün ərazilər “yaşıl enerji zonası”nı təşkil edəcək. Onlar Azərbaycanın böyük hissəsini təşkil edir. Eyni zamanda biz orada “ağıllı şəhər”, hətta “ağıllı kənd” adlanan müasir texnologiyaları tətbiq edəcəyik. Bu, həmçinin Azərbaycanın yenidənqurmaya, müasirləşməyə və texnoloji tərəqqiyə ehtiyac duyduğumuz digər bölgələri üçün yaxşı nümunə olacaq”.

Bahadur İMANQULİYEV,

Azərbaycan. - 2021.- 5 fevral.- S.1; 4.