Milli Məclisin Gənclər və idman komitəsində Vətən müharibəsinin iştirakçıları ilə növbəti görüş keçirilib

Fevralın 4-də Milli Məclisin Gənclər və idman komitəsində Vətən müharibəsinin iştirakçıları və qazilərimizlə növbəti görüş keçirilib.

Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildirilib ki, görüşdə Milli Məclis sədrinin müavini, Gənclər və idman komitəsinin sədri Adil Əliyev Müzəffər Ali Baş Komandan İlham Əliyevin rəhbərlik etdiyi rəşadətli ordumuzun 44 gün müddətində əzəli və əbədi torpaqlarımızı düşmən işğalından azad etməsi, həmçinin “Dəmir yumruq” hərbi əməliyyatı ilə xalqımızın qəlbindəki 30 illik nisgilə birdəfəlik son qoyulması barədə söhbət açıb.

Sədr müavini bildirib ki, müharibə dövründə dövlətimizin başçısının “Biz birlikdə güclüyük!” şüarını rəhbər tutan xalqımızın igid övladlarının ön cəbhədə, bütün Azərbaycan xalqının isə arxa cəbhədə səfərbər olması qürurvericidir. Qeyd olunub ki, Ermənistanın müharibə zamanı aldığı zərbələrin yaraları hələ uzun illər sağalmayacaq. Müharibə gənclərimizin vətənpərvərliyini, azərbaycançılıq məfkurəsinin hər kəsin qəlbində ən uca zirvədə qərar tutduğunu bir daha göstərdi. Qısa müddət ərzində aparılan bu sürətli müharibə həm də bütün dünyaya ölkəmizin gücünün nümayişi oldu.

Adil Əliyev qəhrəmanlarımızın döyüş meydanlarında göstərdiyi şücaətin tarixin yaddaşına həkk olunduğunu diqqətə çatdırıb, şəhidlərimizə Allahdan rəhmət, qazilərimizə şəfa diləyib.

Görüşün sonunda Vətən müharibəsində xüsusi qəhrəmanlığı ilə seçilən iştirakçıların bir qisminə Milli Məclisin Gənclər və idman komitəsinin Fəxri fərmanı təqdim olunub.

Azərbaycan. - 2021.- 5 fevral.- S.3.