Şəhid ailələri qayğı ilə əhatə olunub

Azərbaycanın ərazi bütövlüyü uğrunda canından keçmiş şəhidlərimizin ailələrinə, həmçinin müharibə əlillərinə dövlət tərəfindən böyük diqqət göstərilir. Bu gün onlar hərtərəfli qayğı ilə əhatə olunublar.

Sumqayıt şəhərində də şəhid ailələri və qazilər daim diqqət mərkəzində saxlanılır. Bu istiqamətdə tədbirlər şəhər icra hakimiyyətinin təşəbbüsü, Gənclər və İdman İdarəsinin təşkilatçılığı ilə keçirilir. Növbəti belə tədbir Vətən müharibəsi şəhidləri Səmid Xoşbəxt oğlu Əliyev, Müşviq Abbas oğlu Bəktiyev və Anar Bəhruz oğlu Heydərovun ailələrinin ziyarət edilməsi olmuşdur.

Cümə məscidinin axundu Hacı Sərdarov və idman ictimaiyyəti nümayəndələrinin də iştirak etdikləri görüşlərdə bildirilmişdir ki, 44 günlük Vətən müharibəsində zəfər tariximizə adları qızıl hərflərlə yazılmış şəhidlərimiz xalqımızın qürur mənbəyi olaraq hər zaman anılacaq və heç bir zaman unudulmayacaq.

Qeyd edək ki, Səmid Əliyev Füzuli, Müşviq Bəktiyev Xocavənd, Anar Heydərov isə Suqovuşan istiqamətlərində gedən döyüşlərdə şəhid olmuşlar. Onlar “Vətən uğrunda”, “Füzulinin azad olunmasına görə”, “Xocavəndin azad olunmasına görə” və “Suqovuşanın azad olunmasına görə” medalları ilə təltif edilmişlər.

Akif ƏLİYEV,

Azərbaycan. - 2021.- 5 fevral.- S.7.