İnkişafın yeni konturları

Milli prioritetlər sistemli və mütərəqqi islahatların davamlılığını təmin edəcək

“Uğurlu sosial-iqtisadi və siyasi nailiyyətlər, milli və multikultural dəyərlər qarşıdakı illərdə Şərqlə Qərbin qovşağı olan Azərbaycanın qüdrətinin daha da artacağına əminlik yaradır. Bu imkanlar 2030-cu ilə qədər olan mərhələdə Azərbaycanın iqtisadi suverenliyinin möhkəmləndirilməsinə və müasir həyat standartlarına əsaslanan yüksək sosial rifah cəmiyyətinə malik qüdrətli dövlətə çevrilməsinə zəmanət verir. Azərbaycan dövləti ölkədə əhalinin rifahının daha da artırılması üçün sosialyönümlü bazar iqtisadiyyatının inkişaf etdirilməsi yolunu seçmişdir”.

Prezident İlham Əliyevin “Azərbaycan 2030: sosial-iqtisadi inkişafa dair Milli Prioritetlər”in təsdiq edilməsi haqqında sərəncamında qeyd edilən bu fikirlər bir daha təsdiq edir ki, dövlətin əsas hədəflərini müəyyənləşdirən, növbəti 10 il üzrə yeni yol xəritəsini təqdim edən dövlət başçısının inkişaf siyasəti ardıcıl və sistemlidir. Azərbaycanda sosial-iqtisadi inkişafa dair Milli Prioritetlərin müəyyənləşdirilməsi növbəti illərdə daha yüksək iqtisadi göstəricilərin əldə olunmasına zəmin yaradır. Yeni prioritetlər, ilk növbədə, milli iqtisadiyyatın daha da şaxələndirilməsini təmin etmək baxımından tamamilə yeni imkanlar açır.

Əvvəlki illərdə həyata keçirilən sosial-iqtisadi siyasət quruculuq işləri və ərazi bütövlüyünün təmin edilməsi uzunmüddətli dövrdə Azərbaycanın daha keyfiyyətli inkişaf mərhələsinə keçməsinə, yüksək rifaha malik lider dövlət olmasına möhkəm əsaslar yaradır. Belə ki, indiyədək qazanılmış nailiyyətlər imkan verir ki, Azərbaycan qarşısına daha yüksək məqsədlər qoysun və bundan irəli gələn vəzifələri müəyyənləşdirsin. Prezident İlham Əliyevin təsdiq etdiyi milli prioritetlər də ölkəmizin yeni inkişaf mərhələsinə yüksəldilməsi ilə bağlıdır.

Beş milli prioritetin gerçəkləşdirilməsinə xidmət etmək hər bir vətəndaşın borcu, Azərbaycanda işləyən hər bir insanın mənəvi öhdəliyidir.

Yəni sosial-iqtisadi inkişafın bazasını müəyyən edən milli prioritetlərin qorunması və reallaşdırılmasına xidmət etmək isə hər birimizin ümdə vəzifəsidir.

Ümumiyyətlə, “Azərbaycan 2030: sosial-iqtisadi inkişafa dair Milli Prioritetlər” ölkəmizin bütün sahələrdə sürətli inkişafına təkan verən vəzifələrin müəyyən olunması baxımından xüsusi əhəmiyyətə malikdir. Bu sənəd Azərbaycanın sosial-iqtisadi inkişafının Vətən müharibəsindən sonrakı dövrdə yaranmış yeni şərtlərə uyğun başlıca istiqamətlərini özündə ehtiva edir. Çünki Vətən müharibəsindən sonra regionda tamamilə yeni iqtisadi imkanlar yaranıb. Azərbaycanın əldə etdiyi zəfər nəticə etibarilə həm də Cənubi Qafqazın tarixində yeni bir dövrün başlaması üçün unikal imkanlar açıb. Təbii ki, yaranmış yeni situasiya həm də qarşıya yeni vəzifələr qoyur. Bu sənəd həmin vəzifələrin müvəffəqiyyətlə həyata keçirilməsinə imkan yaradacaq.

Onu da vurğulayaq ki, müəyyən olunmuş prioritetlər sırasında işğaldan azad olunmuş ərazilərə qayıdışın tarixi və siyasi əhəmiyyəti var. Çünki Ermənistanın işğalı altında qalan rayonların ölkənin ümumi iqtisadiyyatına reinteqrasiyası, eyni zamanda beynəlxalq və regional əhəmiyyətli nəqliyyat-logistika dəhlizlərinin fəaliyyətə başlaması həm Azərbaycan iqtisadiyyatına əlavə güc qatacaq, həm də bölgədə qarşılıqlı faydalı əməkdaşlıq mühitinin formalaşmasını şərtləndirəcək.

Son 17 ildə sosial-iqtisadi və mədəni həyatda böyük təkamül yolunu inamla keçən Azərbaycanın iqtisadiyyatı dinamik inkişaf edib, beynəlxalq nüfuzu əhəmiyyətli dərəcədə artıb, cəmiyyətdə dövlətçilik ənənələri güclənib. Geniş sosial-iqtisadi infrastruktur quruculuğunun uğurla həyata keçirilməsi ölkənin hərbi qüdrətinə də müsbət təsir göstərib. Torpaqlarımızın işğaldan azad edilməsində və ölkəmizin ərazi bütövlüyünün bərpasında bu amillərin həlledici rolu olub. Azərbaycanın hərb və diplomatiya sahəsində əldə etdiyi uğurlar bu gün yeni, sistemli və davamlı islahatlara yol açır.

44 günlük Vətən müharibəsində əldə olunan qələbə ilə Azərbaycanda mahiyyət etibarı ilə yeni inkişaf mərhələsi başlandı. Əldə olunan qələbə iqtisadiyyatda yeni inkişaf perspektivləri müəyyən edib.

Bir sözlə, “Azərbaycan 2030: sosial-iqtisadi inkişafa dair Milli Prioritetlər” Azərbaycanın davamlı yüksəlişinə böyük töhfələr verəcək. Milli prioritetlərin reallaşması həm də milli birliyimizin daha bir təntənəsi kimi öz təzahürlərini tapacaq. Çünki bu gün Azərbaycanda mövcud olan milli həmrəylik, dövlət və xalq arasında qarşılıqlı etimad istənilən vəzifəni müvəffəqiyyətlə yerinə yetirməyə imkan yaradır.

Rəşad BAXŞƏLİYEV,

Azərbaycan. - 2021.- 11 fevral.- S.1;3.