Asiya Siyasi Partiyalarının Beynəlxalq Konfransının keçmiş baş katibi Çung Eui-Yong Koreya Respublikasının xarici işlər naziri təyin edilib

Asiya Siyasi Partiyalarının Beynəlxalq Konfransının (ICAPP) keçmiş baş katibi, qurumun daimi komitəsinin həmsədri Çung Eui-Yong Koreya Respublikasının xarici işlər naziri təyin edilib. Bu barədə AZƏRTAC-a Yeni Azərbaycan Partiyasının mətbuat xidmətindən məlumat verilib.

ICAPP-ın keçmiş baş katibi olaraq Çung Eui-Yong Yeni Azərbaycan Partiyası ilə sıx əməkdaşlıq münasibətlərinin inkişafına hər zaman xüsusi önəm verib, Azərbaycanla Koreya Respublikası arasında qarşılıqlı əlaqələrin inkişafına mühüm töhfələr verib.

Qeyd edək ki, Çung Eui-Yong ICAPP-ın Daimi Komitəsinin üzvü kimi Yeni Azərbaycan Partiyasının dəvəti ilə dəfələrlə Azərbaycanda səfərdə olub. O, Azərbaycanın beynəlxalq aləmdəki böyük nüfuzunu, ölkəmizdəki sürətli inkişafı və YAP-ın bu uğurlardakı rolunu hər zaman yüksək qiymətləndirərək təşkilatın VII Baş Assambleyasının Bakıda keçirilməsi barədə qərarın təşəbbüskarı olub.

Çung Eui-Yong Yeni Azərbaycan Partiyasının təşkilatçılığı ilə Bakıda Asiya Siyasi Partiyaları Beynəlxalq Konfransının Qadınlar qolunun 3-cü iclasında, həmçinin Gənclər Qolunun 2-ci toplantısında iştirak edib.

Koreya Respublikasının indiki xarici işlər naziri Çung Eui-Yong 2015-ci ildə Azərbaycanda keçirilən parlament seçkilərində ICAPP-ın baş katibi olaraq müşahidəçi kimi də iştirak edib.

Azərbaycan. - 2021.-12 fevral.- S.8.