İlham Əliyev
Qarabağı öz sahiblərinə qaytardı
Flora QASIMOVA: “O gün
Şuşada Şirin Mirzəyevin ruhu da mənimlə idi...”
“Düz 32 ildən sonra Şuşaya ayaq basanda, onun büllur bulaqlarından su içəndə, Cıdır düzündən havalanıb Xankəndiyə, Kərkicahana, İrəvana, bütün dünyaya Qarabağın əsl sahiblərinin qayıdışını hayqıran “Bayatı-Şiraz”ı dinləyəndə elə bildim həmin an dünyanın ən xoşbəxt insanı mənəm...
Çünki o gün Şirin Mirzəyevin ruhu da mənimlə idi...”
Ərköyün Xəzrinin küçələrdə al-əlvan xəzan yarpaqlarını oradan-oraya sovurduğu, tutqun bir payız günündə ürəyində qövr edən nisgil qarışıq sevincin ahənginə qoşulub gətirdiyi müjdəni çatdırmaq üçün bir qadın tələsirdi Şəhidlər xiyabanına...
Sükuta qərq olmuş məzarlığa, uzaqdan insan siluetlərinə bənzəyən başdaşlarına yaxınlaşanda və nəhayət gözləri həmin başdaşlarının birinin üzərindəki şəkildən boylanan intizarlı baxışlarla toqquşanda isə qeyri-ixtiyari səntirləmiş, irəli addım ata bilməmişdi...
Bu məzarın qarşısındaca bir anlıq heykələ dönmüş, dili söz tutmamışdı...
Gətirdiyi qələbə xəbərini isə gözlərindən axaraq kip bağlamış dodaqlarından süzülüb sinəsini yandıran qüssəli damlalar anlatmışdı...
Bu bir anın daş sükutu zamanla üzəri qaysaq bağlayan yaraları qanatmış, ağrılı günlər könlündə qövr etmiş və ürəyində boğa bilmədiyi bir fəryad baş qaldırmışdı...
“Kaş, indi sən də sağ olaydın, Şirin...”
Əfsus...
Zaman,
2020-ci ilin 10 noyabrıydı...
O həsrətli
məzar neçə illər idi ruhu qələbə xəbəri
gözləyən əfsanəvi Milli Qəhrəmanımız,
şəhid polkovnik-leytenant Şirin Mirzəyevin, ona
Qarabağımızın azadlıq xəbərini yetirməyə
gələn qadın isə ömür-gün yoldaşı
Flora Qasımova idi...
Bəxtəvər
günlər, aylar, illər
Təbiətin
yaz coşqusu yaşadığı günlərdən biri,
Şuşada Cıdır düzündə güllərin-çiçəklərin
gözəllikdə kəpənəklərlə rəqabət
apardığı, quşların bir-biri ilə təranə
yarışına çıxdığı may ayı idi.
Uzaqda, baş-başa çatmış dağların zirvəsində
günəş işığından bərq vuran bəm-bəyaz
qarın parıltısı Şuşanı sehrli bir haləyə
bürümüş, sıldırımlardan özünü
Qarabağın azad səmalarına atan məğrur qartallar
zümrüd donlu Topxananın başına dolanaraq qələbə
qıyı çəkmişdilər...
Onun da xəyalları
Cıdır düzündən ürəkləri riqqətə
gətirərək pərdə-pərdə ucalan muğam zəngulələrinə
qoşularaq ötənlərə, keçənlərə,
acılı-şirinli günlərə doğru sürətlə
qanad açmış, yenə o bəxtəvər günlərinə,
aylarına, illərinə qayıtmışdı...
Budur, yenə
anası halva çalıb, balaca Floranı da götürərərək
Şuşaya, Cıdır düzündə yerləşən
babasının, Şuşa qalasındakı “Təzə Pir”
məscidinin baş ruhanisi Hacı Axund Molla
Şükürün məzarı başına aparıb.
O da balaca
əllərini açaraq babasının ruhuna dualar oxuyur,
anasına qoşularaq məzarın ətrafını təmizləyir...
Sonra anası ona yaxınlıqdakı malikanəni,
bağı göstərərək deyir, bax vaxtilə bura
babanın evi olub, elə mən də burada doğulub boya
başa çatmışam...
Sonra isə...
Milli Qəhrəmanımız,
şəhid polkovnik-leytenant Şirin Mirzəyevin həyat yoldaşı,
Milli Məclisin sabiq deputatı, “Şöhrət” ordenli Flora
Qasımovadır “Qarabağ söhbətləri”ndə...
Əvvəlcə
söhbətimiz başdan-başa Vətən həsrətinə,
ağrı-acısına kökləndi, qüssəli anlara
baş vurdu, lakin bu da bir xoşbəxtlikdir ki, nəhayət
Qarabağın azadlığına, qəhrəman Şirin
Mirzəyev və onun timsalında Vətən
torpaqlarımızın uğrunda canından keçən
şəhidlərimizin qisasının alınması kimi
xoşbəxtlik zirvəsinə ucaldı...
Amma hələ
2020-ci ilin xoş müjdəli günlərinə qədər
çox-çox məşəqqətli anlar
yaşanmışdı...
1988-ci il hadisələrinə qədər
Şuşa qalasının cənub tərəfindən
Cıdır düzünə açılan böyük dəmir
darvazanın ardında olan qollu-budaqlı uca qoz
ağacından o tərəfə geniş bir bağ vardı. Bu bağ Flora xanımın
ulu babası, əslən Laçının Ağanus kəndindən
olan Hacı Axund Molla Şükürün idi. Dünyanın
ən gözəl gül-çiçəyinin, meyvə
ağaclarının olduğu yer üzünün bu cənnət
bağını Molla Şükür öz əli ilə əkib-becərmişdi.
Bağın ortasında isə altı-yeddi otaqdan ibarət
kürsülü bir ev, evin yanında mətbəx,
mətbəxin yanında qədim təndirxana var idi.
Daha sonra bu malikanədə Hacı Axund Molla
Şükürün oğlu Mirzə Məhəmməd (Flora
xanımın babası) yaşayırmış. Mirzə Məhəmməd
Müsavat hökuməti vaxtında əvvəl Qubadlıda qəza
pristavı, son dövrlərdə isə Xosrov bəy Sultanovun
əmri ilə Şuşa qəzasının
rəisi işləyirmiş.
Cümhuriyyət süquta uğrayandan sonra repressiyaya məruz
qalaraq həbs olunmuşdu. Sonra Şuşaya qayıdıb gələndə
isə yenidən təqiblərlə üzləşdiyi
üçün ailəsini də götürüb Ağdama
köçmüşdü...
- Atam Qasım əslən Şuşanın Malıbəyli
kəndindən olsa da, Xankəndidə yaşamış, müharibədən
qayıdandan sonra Ağdama gedib-gələndə anamı orada
görmüşdü və onlar ailə qurmuşdular. Atam Daxili
İşlər Nazirliyində yanğından mühafizə
idarəsində rəis müavini, anam isə ibtidai sinif
müəllimi idi. O, Xankəndinin Kərkicahan kəndində
dərs dediyi üçün biz məktəb zamanı həmin
kəndə köçüb kirayədə yaşayardıq.
Sonradan tikilən evlərin sayəsində Kərkicahan
böyümüşdü və Xankəndiyə birləşərək
onun bir məhəlləsinə çevrilmişdi. Kərkicahan
iki - yuxarı və aşağı hissədən ibarət
idi. Əhalisinin əksəriyyəti azərbaycanlı
idi. 1988-ci il hadisələrinə qədər
azərbaycanlıların sayı 2000-ə yaxın idi. Kənddə
8 illik məktəb fəaliyyət göstərirdi və
oranı bitirənlər Xankəndiyə gəlib Nizami adına 4 nömrəli məktəbdə
oxuyurdular.
Yarıda
qırılan ömür
Flora
xanım danışır ki, 1988-ci il hadisələri
başlayanda kərkicahanlılar igidliklə, mətanətlə
dayanaraq doğma yurdlarını tərk etməmiş, 1991-ci
il dekabrın 28-nə qədər ermənilərlə
döyüşmüşdülər, amma təəssüf
ki, o zaman işğal olunmuşdu.
-
Qarabağ hadisələri başlayan zaman biz Moskvada idik,
Şirin Lenin adına Ali Hərbi Akademiyada
oxuyurdu. Hər ikimizin qohumları Xankəndidə,
Şuşada idi (Şirin əslən Şuşanın Mirzələr
kəndindən idi), mənim qohumlarımın əksəriyyəti
isə Ağdamda yaşayırdı. Ermənilər
günahsız azərbaycanlıların qanını
tökürdülər. Təsadüfən,
qəbiristanlıqda silah gizlədən ermənilərin əməllərinə
şahid olduqlarına görə Şirinin qardaşı
oğlanlarını möhkəm döymüşdülər.
Şirin Daxili Qoşunlarda çalışanda
Qarabağ bölgəsində bir batalyonları var idi. Ezamiyyə vərəqi
yazdırıb gedirdi hadisələri öyrənməyə.
Deyirdi ki, mən hərbi formadayam, həm də
ermənicə təmiz bilirəm, buna görə də onlar
tanıya bilmir mən kiməm. Hətta ən
çətin vaxtda azərbaycanlıların evlərini
yandıranda, talan edəndə şahid olmuşdu. Gedib qəbiristanlığa baxmışdı,
görmüşdü ki, qəbiristanlıqdakı
bütün başdaşlarını sındırıblar, o
cümlədən də atasının
başdaşını. O, atasının sınan
başdaşını götürüb Kərkicahanda
yaşayan bacısıgilə aparmışdı.
Şirin Böyükşorda yerləşən 6500
saylı hərbi hissədə işləyirdi. 1991-ci il
sentyabrın axırları, oktyabrın əvvəllərində
isə Müdafiə Nazirliyinin əmri ilə
özünümüdafiə batalyonu yaratdı və onun
komandiri oldu. O zaman Ermənistanla sərhəd cəbhə
bölgələrində özünümüdafiə
batalyonları yaradılırdı. Şirin qısa müddətdə
silah tapıb ala bildi, əsgərləri geyimlərlə təmin
etdi...
Şirin Vətənini çox sevirdi. O, gecə-gündüz
torpaqlarımızın müdafiəsində dayanır, əlindən
gələn hər şeyi etməyə
çalışırdı... Amma heyif ki, ömrü
yarıda qırıldı...
Batmanla gələn
dərd
Çox çətin illər idi, elə bil hər
şey üst-üstə gəlmişdi. Dağ kimi həyat
yoldaşı, polkovnik-leytenant Şirin Mirzəyevi
itirmişdi, qohumlarının hamısı köçkün
düşmüşdür. Onları yerləşdirmək,
işlə təmin etmək, övladlarını
böyütmək hamısı Flora xanımın öhdəsinə
düşmüşdü. Bu illər ərzində
çox yaxınları vaxtsız dünyalarını dəyişmişdi.
Və hər dəfəsində acı təəssüf hissi
ilə düşünmüşdü ki, bəlkə də
onlar öz yurd-yuvalarında yaşasaydılar, Xankəndinin təmiz
havasından udub, Xan qızı bulağının suyundan
içsəydilər, ömürləri daha uzun olardı, bəlkə
də...
- Anamla-atam Bakıda mənimlə qalırdılar. Onların necə
əzab çəkdiklərini görürdüm. Nə etsək də, necə təsəlli versək
də, heç ovunmur, elə o yerlərə qayıtmaq istəyirdilər.
Hər ikisi çox həsrətlə, əziyyətlə
canlarını tapşırdılar. Elə
Şirinin anası 80 yaşlı Nazpəri xanım da
Bakıda məskunlaşdıqları 5 mərtəbəli
yataqxanada əzab çəkirdi. Yaşlı adam idi, nə bir yerə gedə bilirdi, nə
pilləkənləri düşüb-qalxa bilirdi... Hey deyirdi
ki, məni oğlumun məzarına aparın...
Həyatımda
gördüyüm ən acı mənzərələrdən
biri də Şirinin məzarına gedəndə yaşlı
ananın əyilərək qəbirdən bir ovuc torpaq
götürərək nalələrlə ağzına
qoyması idi... Nazpəri xanım da dərddən çox əzabla
can verdi...
Ümumiyyətlə, bu illərdə
köçkünlük həyatı yaşayan bütün
insanlar bu mənəvi əzabı çəkirdilər. Həmişə
danışırdılar ki, öz doğma
od-ocağımızdan ayrı düşmüşük,
gedib əzizlərimizin qəbrini ziyarət edə bilmirik...
Bir az vəziyyətləri pis olan kimi
deyirdilər ki, Allah möhlət versin, gedib öz evimdə
ölüm, doğulduğum torpağa qarışım...
“Təki
Azərbaycan Ordusu yaradılsın, mən onun tərkibində
sıravi əsgər kimi qulluq edərəm”
44
günlük müharibə ərzində heç bir dəqiqə
də televiziya qarşısından kənara çəkilməyən
Flora xanım Ali Baş Komandanın məlumatlarını hər
dəfə sevinc və göz yaşları ilə izləyir,
rayonlarımızın bir-bir alındığını
eşidəndə qururdan ürəyi dağa
dönürdü...
- Ali
Baş Komandan Şuşanın azad olma xəbərini
xalqımıza müjdələyəndə sevincimdən
hönkür-hönkür ağladım, əl açıb
Tanrıya şükürlər etdim...
Ürəyimdən
isə qüssə qarışıq belə bir hiss də
keçdi ki, kaş Şirin Mirzəyev də sağ
olaydı, o da bu döyüşlərdə iştirak edəydi,
bu qələbə günlərini görəydi...
Şirinin ən
böyük arzularından biri güclü Azərbaycan
Ordusunun yaradılması idi. Müsahibələrinin
birində də demişdi ki, “təki Azərbaycan Ordusu
yaradılsın, mən onun tərkibində sıravi əsgər
kimi qulluq edərəm...”
Bilirəm ki, Şirin Mirzəyev xalqımızın,
döyüş yoldaşlarının, əsgərlərinin
yaddaşında, xatirəsində həmişə
yaşayır və əminəm ki, bu gün onun da ruhu
şaddır.
İlham
Əliyev Qarabağ nisgilimizə son qoydu
- Mən
heç vaxt ümidimi itirmirdim, bilirdim ki, mütləq o
torpaqlara qayıdacağıq. Çünki cənab Prezident
İlham Əliyev həm yerli, həm də istənilən
beynəlxalq toplantıların ali
tribunalarından Azərbaycanın haqq səsini dünyaya
çatdırır, qətiyyətlə bəyan edirdi ki, o,
heç zaman işğalçı Ermənistanın qanunsuz əməlləri
ilə barışmayacaq. Ali Baş Komandan Azərbaycanın
bütün dünya tərəfindən tanınmış ərazi
bütövlüyünün bərpa olunmasını,
qaçqınların və məcburi köçkünlərin
öz doğma torpaqlarına qayıtmasının təmin
olunmasını tələb edirdi və deyirdi ki, neçə
ki güclü Azərbaycan dövləti, qüdrətli Azərbaycan
Ordusu var, heç zaman torpaqlarımızda ikinci erməni
dövlətinin yaradılmasına imkan verməyəcək.
Bu illər ərzində dövlət
başçımız Azərbaycanı iqtisadi cəhətdən
xeyli inkişaf etdirdi, vətəndaşların sosial vəziyyətini
yüksək səviyyəyə çatdırdı, məharətli
xarici siyasət yeridərək ölkəmizi dünya ölkələrinin
maraq mərkəzinə çevirdi və elə bu da bir
növ Azərbaycanın təhlükəsizlik kəmərinə
çevrildi.
Digər tərəfdən güclü və
qüdrətli Azərbaycan Ordusu yaratdı. Bu gün Silahlı Qüvvələrimiz
dünyanın ən güclüləri arasındadır.
Elə 44 günlük müharibədə də
Azərbaycan Ordusu yüksək peşəkarlığını
nümayiş etdirdi və adını dünya hərb tarixinə
silinməyəcək şəkildə qızıl hərflərlə
həkk etdi.
Şuşaya
dəfələrlə getmişəm, Daşaltını
görmüşəm, o aşılmaz qayalıqlara bələdəm,
amma 2021-ci il may ayının 12-də
Şuşaya səfər edəndə bir daha o
sıldırımlara heyrətlə baxdım. Bu qayalardan
dırmaşaraq yalın əllə düşməni
qarşısında diz çökdürən və
Şuşanı azadlığa qovuşduran o igidlərlə
bir daha fəxr etdim, qürurlandım...
Ali Baş Komandanın qətiyyəti və ordumuzun
şücaəti sayəsində torpaqlarımız
işğalçılardan təmizləndi və Qarabağ həsrətimiz
sona yetdi.
İndi bütün köçkünlər Qarabağa
böyük qayıdış gününü səbirsizliklə
gözləyirlər...
32 ildən
sonra bitən həsrət
1989-cu
ilin bir yay günündə, məktəblər tətilə
çıxanda Flora xanım Bakıdan Ağdama anasıgilə
gəlir və onlar birlikdə yenə də əvvəlki
vaxtlarda olduğu kimi, Şuşaya, Cıdır düzündə
ulu babasının qəbrini ziyarət etməyə
yollanır, anasının çalıb yuxaya
bükdüyü halvadan ətrafdakı insanlara paylayırlar.
Sonra isə xalı kimi yumşaq yaşıl otların
üstündə oturub Şuşanın füsunkar gözəlliyini
seyrə dalırlar...
Bir daha bu
yerlərə ayaq basa bilməyəcəklərindən xəbərsiz...
- Həmin
günün axşamı hay düşdü ki, yolda ermənilər
Kərkicahandan Şuşaya gəlmək istəyən iki azərbaycanlını
öldürüblər. Onların cənazəsini
Şuşaya gətirən maşın raykomun binasının
qarşısında saxladı və əhali də ora
axışmağa başladı. Biz də
anamla ora getdik. Camaat həyəcanlı və
çox əsəbi idi ki, bu günahsız mülki şəxsləri
niyə qətlə yetiriblər?! Xeyli
orada olduq, gecə isə yenidən hay düşdü ki, ermənilər
Daşaltıdan hücuma keçiblər, gah dedilər ki,
Laçın istiqamətindən gəlirlər. Vəziyyət çox gərgin idi, yollar da
bağlanmışdı. Biz də evə
qayıda bilmirdik. Nəhayət, səhəri
gün Cıdır düzünə bir vertolyot gəldi və
biz də onunla Ağdama yola düşə bildik. Bu mənim
Şuşaya sonuncu gedişim olmuşdu...
Amma bu da
taleyin xoş qisməti oldu ki, düz 32 ildən sonra mən
yenidən Şuşaya getdim, fəxarətli
“Xarıbülbül” festivalını izlədim...
Şuşaya gedərkən yolboyu görürdük ki,
sanki təbiət bizi qarşılamaq üçün bəzənib-düzənib. Başdan-başa
al-qırmızı lalələrə bürünmüş
çəmənlərə baxmaqdan doymazdın...
Biz həm də düşmənin viranə qoyduğu evlərimizi, yurdlarımızı görür, bu faşist xislətlilərin vəhşi əməllərindən dəhşətə gəlirdik. Ermənilər də digər xalqlar kimi bizim torpaqlarda əmin-amanlıq içində yaşayırdılar, amma nankorluq etdilər. Onlar vətəndaşı olduqları ölkəyə xəyanət etdilər. Necə ki, 1915-ci ildə Türkiyəyə xəyanət etmişdilər, bu naqis əməllərini Azərbaycana qarşı nümayiş etdirdilər. Düşünürsən ki, İlahi, bu cür qisasçılıq, nifrət hissi haradandır onlarda?! Bəs dünyaya bar-bar bağırırlar ki, bu yerlər bizimdir? İnsan da öz torpağını viranə qoyarmı?!
Amma o da var ki, ermənilər dildə desələr də, ürəklərində bilirdilər ki, bu torpağın yiyəsi var və bir gün mütləq qayıdacaqlar...
Bax elə ona görə də evlərimizi dağıtmışdılar, ağaclarımızı kəsmişdilər, torpağımızı yandırmışdılar...
Amma tezliklə qüdrətli Azərbaycan dövləti o əraziləri yenidən cənnətə çevirəcək, Qarabağa yenə həyat qayıdacaq...
Hələ 1988-ci ildə, hadisələr yeni başlayanda bir erməni ziyalısı demişdi ki, bizim millətin düşüncəsi 1906-cı il səviyyəsində qalıb. Tarix sübut etdi ki, hələ də onların düşüncə səviyyəsi elə yenə də o illərdəki kimi qalıb və 100 ildən çox zaman keçsə də, heç bir irəliləyiş yoxdur...
Bu torpağın sahibləri qayıdıb...
- Cıdır düzündə “Xarıbülbül” festivalının açılışını edən Kənan balamız “Bayatı-Şiraz”ı oxuyanda elə bildim ki, dünyanın ən xoşbəxt adamı mənəm... O gün “Bayatı-Şiraz” Şuşadan bütün dünyaya hayqırdı ki, bu torpağın sahibləri qayıdıb. Azərbaycanda bir ailə kimi yaşayan müxtəlif xalqların rəngarəng çıxışları isə min illərdir Odlar Yurdunda yaşayan qardaş xalqların öz mədəniyyətlərini olduğu kimi qoruyub saxladıqlarını və daha da inkişaf etdirdiklərini bir daha göz önünə sərdi, xalqımızın zəngin multikultural ənənəsini dünyaya nümayiş etdirdi...
Neçə illər idi ki, Cıdır düzündə olan üç məzarın, ulu babamın və daha iki yaxınımızın qəbrinin, eyni zamanda onun mülkünün taleyi ilə bağlı çox narahat idim. Amma onların mənə göstərilən fotolarına baxanda gördüm ki, başdaşları sınıq olsa da, məzarlar durur. O məzarları bərpa etdirmək niyyətindəyəm. Babamın mülkünü isə həm ulu babamın, həm də torpaqlarımızın azadlığı uğrunda canını fəda edən şəhidlərimizin əziz xatirəsinə ibadət yeri kimi bərpa etdirmək istəyirəm...
Şuşada tanış küçələrə, məhəllələrə, evlərə, bağlara, dağlara illərin həsrətlisi kimi baxır, onları ən incə cizgisinə qədər könlünə, yaddaşına, ruhuna həkk edirdi...
Şuşadan doymaq bilmir, Cıdır düzündən Xankəndiyə uşaqlıq illərinin, gəncliyinin xatirələri həkk olunan doğma evlərinə sarı boylanır, istər-istəməz ötən ağrı-acılı anlara görə qəlbini qüssə sıxırdı, amma tezcə də bu kədərli hissləri özündən uzaqlaşdıraraq, dodaqaltı qürurla pıçıldayırdı:
“Tanrı
taleyimə Vətənimin azadlığını görmək
kimi xoş qismət də yazıb və mən o gün
Cıdır düzündən Xankəndiyə, Xocalıya,
bütün Qarabağa, həm də Şirinin əvəzinə,
onun gözləri ilə fəxarətlə baxdım...”
Yasəmən MUSAYEVA
Azərbaycan.-2021.- 9 iyun.- S.4.