Prezident İlham Əliyev Azərbaycan həqiqətlərini dünyaya bir daha çatdırdı

Dövlət başçısının səsləndirdiyi bu həqiqətlər dünya mediasının gündəmindən düşmür

Prezident İlham Əliyevin yerli və xarici media nümayəndələri üçün mətbuat konfransının fevralın 26-da - Xocalı soyqırımı günündə keçirilməsi təsadüfi deyildi. Dövlət başçısı həmin gün bir daha dünyaya erməni faşizminin Xocalıda törətdiyi soyqırımı barədə geniş məlumat verdi.

Məlumdur ki, ermənilər bu faciəni hər vəchlə gizlətməyə çalışırlar. Bununla yanaşı, fürsət düşdükcə Xocalıda azərbaycanlılara qarşı törədilən vəhşilikləri ermənilərin özlərinə qarşı həyata keçirilən soyqırımı kimi qələmə verməyə də cəhd edirlər. Odur ki, Prezidentin bu soyqırımı barədə verdiyi mötəbər məlumatlar bir daha dünyaya erməni faşizminin iç üzünü açıb göstərdi. Konfrans boyu 30 illik işğala və postmüharibə dövrünə aid bir çox həqiqətlər də çatdırıldı.

Tarixi qələbəmizlə başa çatan 44 günlük Vətən müharibəsi ölkəmizə marağı daha da artırıb. Hələ də dünyanın aparıcı kütləvi informasiya vasitələri bu müharibə barədə geniş məlumatlar verir. Hərb, siyasət və diplomatiya üzrə ekspertlər müxtəlif istiqamətlərdə müharibənin gedişini və nəticələrini təhlil edib qiymətləndirirlər.

Prezidentə verilən suallardan aydın olur ki, jurnalistləri maraqlandıran suallar çoxşaxəlidir. Belə ki, onlar Vətən müharibəsində qazandığımız qələbə, işğal nəticəsində törədilən vandalizm, bərpa-quruculuq işləri, Ermənistanın üçtərəfli bəyanata əməl edib-etməyəcəyi, məcburi köçkünlərin doğma yurdlarına qayıtması və s. ilə bağlı suallar səsləndirirdilər. Kütləvi informasiya vasitələri nümayəndələri mətbuat konfransından öncə işğaldan azad edilən ərazilərə getmiş və ermənilərin törətdikləri vəhşiliklərin şahidi olmuşlar. Özlərini dünyaya qədim və mədəni xalq kimi sırımaq istəyən ermənilərin törətdikləri dağıntılar onları heyrətləndirmişdi. Görünür, ermənilərin illərlə yalan danışdıqlarına artıq inanmışdılar. Həmin ərazilərin ermənilər tərəfindən vəhşicəsinə talan edilməsindən az qala şoka düşmüşdülər. Onlar bir çox münaqişələri görmüş jurnalistlər idi. Ancaq bu cür vandalizmin yəqin heç yerdə şahidi olmamışdılar.

Dövlət başçısı işğaldan azad edilən ərazilərdə dəhşətli dağıntıların olmasına baxmayaraq, orada yenidən geniş bərpa-quruculuq işlərinin aparılacağını jurnalistlərin diqqətinə çatdırdı. Bildirdi ki, bu ərazilərin yenidən bərpası üçün dövlət tərəfindən böyük layihələr hazırlanır. Bunun üçün bölgədə yeni infrastruktur qurulur. Füzuli hava limanının tikintisi məsələsinə toxunuldu. Həmçinin işğaldan azad olunan ərazilərdə quruculuq işlərinin sürətlə həyata keçirilməsinə ermənilərin basdırdıqları minaların mane olduğu vurğulandı. Bununla belə hava limanında uçuş-enmə zolaqları və aeroportun fəaliyyətini təmin edəcək naviqasiya sistemləri qısa müddətdə istifadəyə veriləcək. Bu, beynəlxalq hava limanı olacaq. Onun uçuş-enmə zolaqları ən ağır təyyarələr də daxil olmaqla bütün növ təyyarələri qəbul edə biləcək. Eləcə də Laçın və Zəngilanda yeni aeroportların tikintisinin proqnozlaşdırıldığı bildirilirdi.

Əlbəttə, kiçik bir ərazidə üç hava limanının tikilməsi dövlətin bu bölgəyə verdiyi əhəmiyyətdən irəli gəlir. Məqsəd işğaldan azad edilən torpaqların turizm imkanlarından səmərəli istifadə etmək, yerli əhalinin gediş-gəlişini asanlaşdırmaq, eyni zamanda bu ərazilərin bərpası üçün yükdaşımaların səmərəliliyini təmin etməkdir.

Dövlət başçısı jurnalistlərə tarixi qələbəmizdən sonra yaranan yeni situasiya barədə də məlumat verdi. Bildirdi ki, Ermənistanın işğalı üzündən 30 ildən çoxdur ki, Azərbaycanın Naxçıvan MR ilə quru yol əlaqəsi kəsilmişdi. İmzalanan üçtərəfli bəyanatdan sonra bu nəqliyyat dəhlizi təkcə ölkəmiz üçün deyil, eləcə də region üçün böyük əhəmiyyət qazanıb. Belə ki, Mehri dəhlizi bərpa edildikdən sonra Azərbaycan, Türkiyə, İran, Rusiya və Gürcüstanın iqtisadi əməkdaşlığı üçün yeni imkanlar açılacaq. Mehri dəhlizinin əhəmiyyəti bununla bitmir. Bu marşrut tezliklə Asiya ilə Avropa arasındakı yükdaşımalarda özünəməxsus yer tutacaq. Sözügedən xətt eyni zamanda “Şimal-cənub nəqliyyat dəhlizi”nin vacib bir sahəsinə çevriləcək. Bu da şimaldan Yaxın Şərqə və Fars körfəzinə yüklərin daşınması üçün yeni imkan yaradacaq. Dövlət başçısı bunları deməklə həm də dünyaya bir mesaj vermiş oldu. Yəni münaqişənin həlli təkcə ölkəmiz üçün deyil, həm də dünya üçün əhəmiyyətli bir hadisədir.

Prezident İlham Əliyev jurnalistlərin marağını nəzərə alaraq işğaldan azad olunan ərazilərə qayıdış və bərpa-quruculuq işləri barədə də geniş məlumat çatdırdı. Dövlət başçısı bildirdi ki, orada bərpa-quruculuq işləri aparılarkən ekologiyanın bərpasına, həmçinin ekoloji cəhətdən təmiz enerjinin istifadəsinə üstünlük veriləcək. Belə ki, bölgə bu sahədə böyük potensiala malikdir. Kəlbəcər-Laçın zonasında külək, Zəngilan-Cəbrayıl zonasında isə Günəş stansiyalarının tikilməsi “yaşil enerji”dən istifadəyə imkan yaradacaq. Bununla yanaşı, Laçın, Qubadlı və Kəlbəcər rayonlarında çoxlu su elektrik stansiyaları mövcuddur. Onlar ermənilər tərəfindən dağıdılıb. Hazırda bu stansiyalarda bərpa işləri həyata keçirilir. Artıq Qubadlıdakı Güləbird Su Elektrik Stansiyası təmir olunaraq istifadəyə verilib.

İşğaldan azad olunan ərazilərdə yaşayan insanların əsas məşğuliyyəti kənd təsərrüfatıdır. Qeyd edək ki, bu regionun aqrar potensialı böyükdür. Həmin ərazilərdə kənd təsərrüfatının bərpasına xüsusi diqqət yetirilir. Artıq Kənd Təsərrüfatı Nazirliyinin Aqrar Tədqiqatlar Mərkəzi bölgənin bu sahədəki imkanlarını yeni şəraitə uyğun araşdıraraq dövlətə müvafiq təkliflər verib. Prezident mətbuat konfransında bildirdi ki, işğaldan azad olunan torpaqlardan ilk növbədə kənd təsərrüfatı sahəsində istifadə edilməyə başlanıb. Burada 7 min hektar sahədə payızlıq buğda əkilib. Cari ilin yayında işğaldan sonrakı ilk taxıl biçini həyata keçiriləcək.

Prezident İlham Əliyev jurnalistlərin ən çox maraqlandığı məsələrdən biri olan məcburi köçkünlərin doğma yurdlarına qayıdışı barədə sualları cavablandırarkən demişdir: “Bu barədə mən artıq demişəm. Minalardan təmizləmə prosesi başa çatdıqdan sonra və artıq bununla paralel olaraq biz bu işləri başlayırıq. Bu yaxınlarda “ağıllı kənd” layihəsi artıq gerçəkləşməyə başlamışdı. Zəngilan rayonunun üç kəndində - Birinci, İkinci, Üçüncü Ağalı kəndlərində bu layihə həyata keçiriləcək. Mən təlimat vermişəm ki, bu ilin sonuna qədər layihə tam başa çatsın. Yəni orada təqribən 1000-ə yaxın insan yerləşəcək. Bütün lazımi infrastruktur qurulacaq, əkin sahələri bərpa ediləcək və insanlar oraya qayıdacaqlar. Belə pilot layihələr çox ola bilər. Biz indi onun üzərində işləyirik”.

Rüstəm KAMAL

Azərbaycan.-2021.- 10 mart.- S.1;3.