Milli ruhumuzu
yaşadan bayram
“İrəlidə
bizi işğaldan azad olunmuş yurd yerlərimizdə nəhəng
quruculuq işləri gözləyir. İnanıram ki, yaz fəslinin
qurub-yaratmaq əzmimizi artıran yeniləşdirici
ab-havası ilə həmahəng birlik və həmrəylik
nümayiş etdirəcək, böyük qayıdış
planımızı sülh və əmin-amanlıq şəraitində uğurla gerçəkləşdirəcək,
doğma Qarabağı qısa müddətdə dirçəldəcəyik.
Hamınıza
bahar əhvali-ruhiyyəsi arzu edirəm. Bu bayram öz gəlişi
ilə evinizə, ocağınıza bol ruzi-bərəkət
və firavanlıq gətirsin!”
İlham
ƏLİYEV
Novruz
xalqımızın mifik düşüncə və təsəvvürlərini
özündə yaşadan və bu günümüzə
yetirən qədim xalq bayramıdır. Azərbaycanda milli
bayram kimi hər il yüksək səviyyədə qeyd olunan
Novruz xalqın müqəddəs etiqadına söykənməklə
özündə mənəvi-əxlaqi, ülvi və dünyəvi
duyğuları təcəssüm etdirir. Təbiətin
oyanışı ilə ürəklərdə saf niyyətlər,
xoş arzular oyadır, əsrlərin sınağından
çıxmış mənəvi dəyərlərimizi, adət-ənənələrimizi
özündə yaşadır, insanlar arasında birlik və
mehribanlığın möhkəmləndirilməsi,
onların bir-birinə mərhəmət və diqqət
göstərməsi kimi sağlam təməllərə əsaslanır.
Ruhun oyanışı, yeni bir həyatın
başlanğıcı olan bu gözəl el bayramı hər
dəfə gəlişi ilə ömrümüzü bəzəyir.
Builki
Novruzu insanlarımız böyük sevinc və yüksək əhvali-ruhiyyə
ilə qarşılayırlar. Az qala 30 il sonra Qarabağda da
bayram tonqalları çatılır. Azərbaycan Prezidenti,
Ali Baş Komandan İlham Əliyevin müzəffər
ordumuzun gücü ilə işğaldan azad etdiyi əzəli-əbədi
torpaqlarımızda Novruz sevinci yaşanır. Düşmənin
dağıdıb viran qoyduğu, bu gün isə Azərbaycan
dövlətinin bərpa və yenidən qurulmasını həyata
keçirdiyi yurd yerlərimiz növbəti cəlalına
hazırlaşır. Builki Novruz bayramı ötən il
olduğu kimi COVID-19-la bağlı kütləvi tədbirlərlə
qeyd olunmasa da, evlərdə, ailələrdə insanlar onu bir
başqa büsatla, bir başqa ovqatla qeyd edirlər.
Həmrəylik
bayramı
Novruz çox əski
çağlarda Şərq dünyasında həm yazın gəlişi,
yeni mövsümün başlanması, əkinçilik və
maldarlıq mədəniyyəti ilə bağlı, həm də
xalqın mənəvi-əxlaqi dəyərlərini, humanizm və
həmrəylik kimi bəşəri duyğuları qabarıq şəkildə
göstərən ayin və etiqadlar sistemidir. Bu bayram milli
ruhumuzun tərcümanıdır. Xalqımızın
keçib gəldiyi tarixi yol, minilliklərlə
formalaşmış bir çox ənənələrimiz bu
bayramın ruhunda yaşayır. Onun fəlsəfəsi
həyatın dörd ünsür üzərində bərqərar
olması ilə bağlı qədim inanca əsaslanır.
Əcdadlarımız yaradılışın əsasında
od, su, hava və torpağın durduğuna əzəldən
inanıb, onları müqəddəs sayıblar. Bu
müqəddəsliyə tapınıblar. Belə bir inanc
zaman keçdikcə daha da cilalanıb. Özünün
kodlarını formalaşdırıb. Sistemli bir təsəvvürə
çevrilib.
Xalq
mövcudluğunu o zaman qoruya bilir ki, özünü qədim
əcdadlarla mənəvi əlaqədə hiss edə bilsin. O
ruhu daim duysun. Minilliklərin soraqlarını, adət-ənənəsini,
bir sözlə, özünəməxsusluğunu mühafizə
edib saxlamağı bacarsın.
Belədə həmin millət tarixin
aşırımlarında, təlatümlü
dolanbaclarında sarsılmır, özünü itirmir.
Novruzda qədimliyimizin
bütün çalarları əksini tapıb.
Xalqımız bir çox özünəməxsusluqlarını
bu bayramda axtarıb. Tarixi keçmişimizlə bağlı
xeyli suallara bu bayramın adət-ənənələrində,
dəyişməz atributlarında cavablar görüb. Ona
görə də Azərbaycan xalqı Novruz bayramının hətta
qadağan olunduğu vaxtlarda belə onu müxtəlif
formalarda keçirib. Bu qədim el bayramına
sevgisini qoruyaraq daim nümayiş etdirib. Əslində,
xalqımızın əsrlərboyu ağır keşməkeşlərə,
istilalara, sərt yaşayış şərtlərinə rəğmən,
yenə də öz milli kimliyini mühafizə edə bilməsinə
görə bu cür dəyərlərimizə borcluyuq.
Məhz Novruz kimi mənəvi dəyərlərimizin
gücü ilə xalqın milli yaddaşı itməyib. Təsirlər
qarşısında aşınması mümkün
olmayıb. Əksinə, daha da güclənib, möhkəmlənib,
nəsillərdən-nəsillərə
ötürülüb. Elmi cəhətdən öyrənilib.
Bu bayrama aid folklor nümunələri sənədləşdirilib.
Novruzun bir çox simvolları mədəniyyət və incəsənətimizin
qiymətli incilərinə çevrilib. Bizi bütün
dünyada tanıdan atributlar sırasında qərarlaşdırıb.
Dəyərlərimizə
həssas münasibət
Novruz
sovetlər birliyi dövründə dini bayram kimi qadağalar
altında olub. Buna baxmayaraq, Ulu Öndər Heydər Əliyev
bu bayramın xalq arasında sevilərək
yaşadılmasını təmin etmişdir. Onun
tapşırığı ilə folklorşünaslıq sahəsində
aparılan elmi tədqiqatlarda bu bayramın ideoloji-siyasi təsiri
önə çəkilmişdir. Ötən əsrin 70-ci illərində
Novruz bayramı ilk dəfə olaraq Heydər Əliyevin
xeyir-duası ilə rəsmi şəkildə qeyd olunmuş,
televiziya ilə yayımlanmışdır. Ümumxalq
bayramının yüksək səviyyədə
keçirilməsi Azərbaycan xalqının milli ruhunu
yüksəltmiş, zəngin irsimizə, tariximizə
böyük məhəbbət yaratmış, milli
özünüdərki gücləndirmişdir. Novruz adət-ənənələri
o dövrdə bədii əsərlərdə, filmlərimizdə
özünə yer tapmışdır. Hər dəfə “Dəli
Kür” filmini seyr edərkən Novruz bayramının necə
təbliğ olunduğunu görürük. Xalqın
mədəni dəyərlərini, adət-ənənələrini,
folklorunu, ədəbiyyatını təbliğ edən əsərlər
çoxalmış, ədəbi irsimizi tərənnüm edən
“Bulaq”, “Klassik irsimizdən” kimi verilişlər ortaya
çıxmış, ana dilinin təbliği istiqamətində
real addımlar atılmışdır. Məhz müdrik
rəhbərin qayğısı ilə həmin illərdə
qorunub saxlanılan milli-mənəvi dəyərlər sonralar
Azərbaycan xalqının dövlət müstəqilliyinin bərpasında
müstəsna rol oynamışdır.
“Böyük
mənəvi gücə malik olan Novruz bayramı ulu əcdadlarımızın
bizə verdiyi ən gözəl yadigar olub. Azərbaycan
xalqının milli ruhunu və yaddaşını, onun daxili
aləmini bütün zənginliyi ilə yaşadır. Təbiətin oyanışının,
varlığın yenidən canlanmasının müjdəsini
verən Novruz bayramı ən qədim zamanlardan bəri həyat
və məişətimizə daxil olmuş, insanlara aydın
və işıqlı sabaha, xoşbəxt gələcəyə
inam duyğusu bəxş etmişdir”, - deyən Ulu Öndər
bu bayramı milli ideologiyamızın ana sütunu kimi dəyərləndirmiş
və onu əbədiləşdirmişdir. Bu, əslində,
Ümummilli Lider tərəfindən atılan möhtəşəm
bir addım idi.
Adətən, xalqların qərinələrboyu
formalaşmış yüksək əxlaqi-mənəvi
meyarlarını sağlam ruhda qoruyaraq bütövlükdə
cəmiyyətin inkişafına təsir göstərmək,
onun genetik yaddaşını, kimliyini, milli irs və
özünəməxsusluğunu gələcək nəsillərə
ötürmək
kimi çətin missiya qüdrətli şəxsiyyətlərin
üzərinə düşür. Azərbaycanda bu
ağır və məsuliyyətli işi məhz Ulu Öndər
Heydər Əliyev üzərinə götürərək
hakimiyyətdə olduğu bütün dövrlərdə
milli-mənəvi dəyərlərimizin böyük himayədarı
olmuşdur. Nitqlərində xüsusi
vurğulamışdır ki, müasir dünyada qloballaşma
proseslərinin nəticəsi kimi meydana çıxan
sivilizasiyalararası toqquşma və ziddiyyətlər hər
bir xalqın mənəvi dəyərlərinin qorunması məsələsini
də çağdaş zamanın aktual problemlərindən
birinə çevirmişdir. Problemi
böyüdən başlıca amil budur ki, inteqrasiyalar bir
çox hallarda əsrlərin mirasına - milli-mənəvi dəyərlərə
qarşı yönəlir. Ümummilli Liderin
böyüklüyü də məhz bu təhdidi
düzgün qiymətləndirməsi, onun potensial təhlükə
mənbəyinə çevrilməsinin qarşısını
almasıdır. Ulu Öndərin vətəninə,
xalqına, millətinə, ənənələrinə
bağlılığı bu təhdidlərin önündə
əzəmətli sipərə çevrilmiş, əslində,
xalqın genetik yaddaşını qorumuşdur. Onun milli düşüncə sisteminin bədii-poetik
modeli olan Azərbaycan folklorunun inkişafı istiqamətində
həyata keçirilən tədbirlər böyük rəhbərin
dəyərlərimizə həssas münasibətindən irəli
gəlməklə yanaşı, ictimai şüurun
oyanmasına da xidmət etmişdir. Təbii
ki, görülən işlər sadəcə qayğı
olmaqla məhdudlaşa bilməz - bunlar ulularımızdan bizə
gəlib çatan müqəddəs irsin göz bəbəyi
kimi qorunaraq gələcək nəsillərə əmanət
edilməsi, azərbaycanlı məfkurəsinin, mentalitetinin, əxlaqının
bütün dünyada təbliği, qəbul olunması
üçün atılan düşünülmüş, məqsədyönlü
addımlar idi.
Gələcək
nəsillərə əmanət
Bu
gün xalqımızın milli-mənəvi dəyərlərinin
qorunması və gələcək nəsillərə
ötürülməsi Prezident
İlham Əliyevin həyata keçirdiyi siyasətin
mühüm nailiyyətləri sırasındadır. Dövlət başçısı tarixi-mədəni
irsimizin yaşadılmasına və adət-ənənələrimizin
qorunmasına xüsusi qayğı ilə yanaşaraq bu məqsədlə
son illərdə mühüm addımlar atıb, sərəncamlar
imzalayıb. Bütün bunlar Prezident İlham Əliyevin
xalqımızın dəyərlərinə son dərəcə
bağlı olduğunu, onlara hörmət və ehtiramla
yanaşdığını təsdiqləyir. Bu sıradan da
böyük bayramımız olan Novruzun yüksək səviyyədə
qeyd olunmasına, mütərəqqi adət-ənənələrin
cəmiyyətdə daha möhkəm əsaslarla intişar
tapmasına daim çalışır. Hər il Novruz
bayramı münasibətilə xalqımıza təbrik
ünvanlayan dövlət başçısı vətəndaşlarımıza
xoş arzu və niyyətlərini bildirir. Yüksək mənəviyyat
xəzinəsi sayılan Bahar bayramının milli mədəni
sərvətlərimizin zənginliyi baxımından xüsusi
əhəmiyyət kəsb etdiyini dolğun şəkildə
ifadə edir. Novruz böyük mənəvi gücə
malikdir, insanlar arasında qardaşlıq duyğularını
möhkəmləndirir, cəmiyyətdə əmin-amanlığın
və xoş münasibətlərin bərqərar olmasına
zəmin yaradır. Sürətlə dəyişən
dünyamızda qloballaşma proseslərinin geniş vüsət
aldığı bir zamanda Novruz bayramı
daşıdığı bütün məna və rəmzləri
ilə xalqımızın tarixi-mədəni irsinə son dərəcə
bağlı olduğunu parlaq nümayiş etdirir.
Dövlət
başçısı bütün təbriklərində
Novruz bayramını əcdadlarımızın indiki nəsillərə
misilsiz yadigarı adlandırır və qeyd edir ki, yaz
bayramının bu gün əsl ümumxalq bayramı mahiyyəti
qazanması dövlət müstəqilliyimizin nailiyyətlərindəndir: “Azərbaycan
torpağında Novruz bayramı daim yad təsirlərdən
uzaq tutulmuş və heç bir qüvvəyə onu
insanlarımızın qəlbindən çıxarmaq
imkanı verilməmişdir. Biz onun böyük mənəvi
gücü sayəsində keçmişimizin mürəkkəb
dövrlərində belə nikbinliyimizi və gələcəyə
inamımızı qoruyub saxlamağı bacarmışıq.
Yaz bayramının bu gün əsl ümumxalq
bayramı mahiyyəti qazanması dövlət müstəqilliyimizin
nailiyyətlərindəndir”. Ən ali keyfiyyətləri
özündə cəmləşdirən bayram kimi Novruzun
UNESCO tərəfindən bəşəriyyətin mədəni
irs nümunələri siyahısına daxil edilməsi isə
təqdirəlayiq haldır.
Qeyri-maddi mədəni
irsimiz
Novruz
birlik, bərabərlik bayramıdır. Böyük bir
coğrafiyada yaşayan xalqları öz
işığında birləşdirən yüksək dəyərdir.
Bu bayram Azərbaycanla yanaşı, bütün Şərqdə,
xüsusilə Mərkəzi Asiyada, İranda, Pakistanda,
Türkiyədə, Qazaxıstanda, Tacikistanda, Özbəkistanda,
Türkmənistanda, Qırğızıstanda böyük
coşqu ilə keçirilir.
Novruz bayramının
bütün dünyada Azərbaycanın zəngin irsi kimi
tanıdılması və UNESCO-nun Qeyri-maddi Mədəni
İrs Siyahısına daxil edilməsi Azərbaycanın
Birinci vitse-prezidenti Mehriban xanım Əliyevanın fədakar,
vətənpərvər fəaliyyəti nəticəsində
mümkün olmuşdur. Heydər
Əliyev Fondu Novruz günlərində aztəminatlı ailələrə
bayram sovqatları paylayır, sosial yardıma ehtiyacı olan
minlərlə şəxs üçün bayram süfrələri
təşkil edir, sağlamlıq imkanları məhdud
uşaqlarla görüşlər təşkil edir, xüsusi
qayğıya ehtiyacı olanlara və kimsəsizlərə
yardımlar edir, şəhid ailələrini bayram hədiyyələri
ilə sevindirir.
Azərbaycanın
təşəbbüsü ilə 2010-cu ildə BMT-nin 21
martı Beynəlxalq Novruz Günü elan etməsi bu
bayramın bəşəri miqyasda roluna yüksək önəm
verildiyinə dəlalət edir. Bütün bunlar ilk
baxışdan bəlkə də adi faktlar kimi görünə
bilər. Amma böyük zəhmət hesabına başa gəlmiş
bu mədəni nailiyyətin çox böyük əhəmiyyəti
var. İlk növbədə, Novruz bayramı bəşəri
mənəvi abidə kimi əbədiyyət
qazanmışdır. Bu, dünya miqyasında daim böyük
maraq doğurması, öyrənilməsi, təbliği deməkdir.
Eyni zamanda xalqımızın və ümumən, Şərq
xalqlarının Novruz kimi mənəvi sərvətinə
bütün dünyanın verdiyi qiymətdir.
Əzəl
başlanğıca qayıdış
Bu
bayramın “yeni ruzi”, “yeni zəhmət” mövsümü kimi
qəbul olunması xalqımızın əməksevərliyindən,
halal zəhmətə bağlılığından irəli
gəlir. Düşüncəyə görə, Novruzda təbiət
oyanır. Torpaq Günəşin şüası ilə
isinir. Bol bəhrəli yeni bir mövsümə
hazırlaşır. Həyat yenilənir. İnsanın ruhu təzələnir.
Hər kəs bu bayramda, Novruz çərşənbələrində
gələcəklə bağlı arzular tutur. Onların həyata
keçəcəyinə qəlbən inanır.
Qeydlərimizin
əvvəlində də xatırlatdığımız kimi,
Novruzla bağlı görüşlər ulu əcdadın,
ilkin insanın yaranmasında iştirak edən su, od, yel və
torpaq inancı ilə bilavasitə əlaqədardır. Bu,
törəniş düşüncəsidir. Belə bir
düşüncə Novruzla bağlı mərasim folklorunda
aydın şəkildə öz əksini tapıb. Törəniş
düşüncəsini formalaşdıran ünsürlərin
çoxuna Novruzun silsilə miflərində, nəğmələrində
təsadüf edə bilərik. Novruz çərşənbələrinin
hər birində insana uğur və xoşbəxtlik gətirən
rəmzləri, ümid və inamı görürük. Bu mənada
Novruz insanın öz başlanğıcına
qayıdışıdır. O, qəlbən inanır ki,
öz xoşbəxtliyini, uğura doğru yolun
başlanğıcını həyatı əmələ gətirmiş
dörd ünsürdə tapa bilər. Buna görə Novruzun
dörd çərşənbəsinin hər biri bu
ünsürlərlə bağlıdır.
İlk
çərşənbə Su çərşənbəsidir.
Bu çərşənbə baharın hərarətli nəfəsi
duyulduqca, torpaq isindikcə, qarlar-buzlar əriyib bulaqlara,
çaylara qarışdıqca daha da gurlaşan axar suları
simvolizə edir. Axar su torpağa bərəkət gəririr.
Həyatı saflaşdırıb duruldur. İnsan öz
düşüncələrini, niyyətlərini, mənəvi
dünyasını da axar suya çəkir.
İkincisi
Od çərşənbəsidir. Ulu əcdadlarımıza
aydın idi ki, üzü Bahara doğru Günəş
yavaş-yavaş torpağı qızdırır, onu əkin
üçün hazırlayır, bərəkətləndirir.
Onlar oda insanın ötən dövrlə bağlı
sıxıntılarını külə çevirən,
torpaqla birgə
ağırlığını-uğurluğunu götürən
güc kimi baxardılar. Od çərşənbəsində
tonqallar qalayardılar. Müxtəlif nəğmələrlə,
rituallarla tonqalın üstündən atlanardılar.
Bütün bunlar günümüzə qədər davam edir.
İnsanın qədimlərdən üzübəri tonqaldan
atlanması onun yaşamağa inamını, həyatındakı
qayğılardan qurtuluşuna əminliyini ifadə edir.
Novruzun
üçüncü çərşənbəsi Yeldir. Yel
həyatımızda baş verən dəyişikliklərin
sorağıdır. Təbiətin canlanmasının əlamətidir.
Dördüncü
çərşənbə isə Torpaq çərşənbəsidir.
Bu çərşənbə artıq su ilə yumşalan,
Günəşin hərarəti ilə isidilən
torpağın əkilib-becərilməyə
hazırlığına dəlalət edir. Bu çərşənbə
insana əkib becərmək üçün
hazırlığını görmək, əkinçi əlinin
sığalını gözləyən torpağın bərəkətindən
faydalanmaq üçün bir
çağırışdır.
Novruz
həm də xeyrin şər üzərində qələbəsini
simvollaşdırır. Biz ötən il bu simvolu həyatımızda,
Zəfər tariximizdə yaşadıq. 44 günlük Vətən
savaşımız nəticəsində Azərbaycan tarixi ədaləti
bərpa etdi. Düşməni illərdir işğal
altında saxladığı torpaqlarımızdan qovduq. Xeyir
şər üzərində qələbə qazandı. Hər
zaman qəlbimizdə yaşayan ümid, qalibiyyət əzmi,
yenilik ruhu, haqqa-ədalətə inam hesabına Azərbaycan ən
böyük arzusuna çatdı.
Bu,
bizə Novruzun təlqin etdiyi mənəvi keyfiyyətlərdir.
Azərbaycan xalqı bu keyfiyyətləri, dəyərləri
hər zaman yaşadacaq və bütün dünyada xoş bir
nümunə yaradacaq.
Novruz
bayramınız mübarək!
İradə
ƏLİYEVA,
Azərbaycan. - 2021.- 20 mart.- S.1; 8.