Türkiyənin ACIBADEM Tibbi Şirkətlər Qrupu Naftalandakı sağlamlıq mərkəzləri ilə əməkdaşlıq edəcək

Naftalan Şəhər İcra Hakimiyəti və Türkiyənin ACIBADEM Tibbi Şirkətlər Qrupunun nümyəndələri arasında əməkdaşlığın genişləndirilməsi ilə bağlı görüş keçirilmişdir.

Naftalanda keçirilən görüşdə şəhər icra hakimiyyətinin başçısı Vüqar Novruzov qonaqlara şəhərin mövcud turizm potensialı haqqında ətraflı məlumat vermişdir. Diqqətə çatdırmışdır ki, Prezident İlham Əliyevin Naftalan kurortunun inkişafı ilə bağlı qarşıya qoyduğu vəzifələrin uğurlu icrası nəticəsində şəhər özünün yeni inkişaf dövrünə qədəm qoymuşdur.

ACIBADEM Tibbi Şirkətlər Qrupunun Uluslararası İş Gəliştirmə sorumlusu Aytən Babazadə, şirkətlər qrupunun regional nümayəndəliyinin əməkdaşı Ramil Ələsgərov və Gəncə Destinasiya Menecmenti Təşkilatının rəhbəri Zaur Bayramov təbii Naftalan neftinin yüksək müalicəvi təsirlərə malik olduğunu və xəstəliklərdə istifadəsinin önəm daşıdığını qeyd etmişlər.

Sonra əməliyyat olunmuş xəstələrin gələcəkdə reabilitasiyasının Naftalanda keçirmələri barədə fikir mübadiləsi aparılmışdır. Gələcəkdə ACIBADEM Tibbi Şirkətlər Qrupu ilə Naftalan sağlamlıq mərkəzlərinin birgə əməkdaşlığı barədə təkliflər irəli sürülmüş və müzakirələr aparılmışdır. ACIBADEM-in və Naftalan sağlamlıq mərkəzlərinin yüksəkixtisaslı mütəxəssisləri ilə birgə “Naftalan neftinin əhəmiyyəti” mövzusunda fikir mübadiləsi aparılmasının əhəmiyyəti vurğulanmışdır.

Sonda qonaqlar “Garabag Resort & Spa” və “Naftalan Müalicə və Sağlamlıq Mərkəzi”ndə naftalan neftindən istifadə qaydaları və müalicə üsulları ilə tanış olmuşlar.

S.ƏLİYEV,

Azərbaycan. - 2021.- 20 mart.- S.7.