Luici Di Maio: Azərbaycanla İtaliya arasında əlaqələr yüksək səviyyədədir

Milli Məclisin sədri Sahibə Qafarova İtaliyaya rəsmi səfəri çərçivəsində mayın 19-da İtaliya xarici işlər və beynəlxalq əməkdaşlıq naziri Luici Di Maio ilə görüşüb.

AZƏRTAC xəbər verir ki, L.Di Maio Milli Məclisin sədri ilə görüşdən məmnun olduğunu bildirib və Azərbaycanla İtaliya arasında əlaqələrin yüksək səviyyədə olduğunu vurğulayıb. Bu əlaqələrin inkişafında parlament diplomatiyasının rolunu yüksək qiymətləndirən nazir parlamentlərarası dostluq qruplarının fəaliyyətini təqdir edib, parlament nümayəndə heyətlərinin yüksəksəviyyəli qarşılıqlı səfərlərinin əhəmiyyətini vurğulayıb. O, bu əlaqələrin ölkələrimiz arasındakı münasibətlərə müsbət töhfə verdiyini bildirib.

Nazir diqqətə çatdırıb ki, Sahibə Qafarovanın başçılığı ilə parlament nümayəndə heyətinin Romada keçirdiyi görüşlərin sayı İtaliyada Azərbaycanın dostlarının çoxluğuna dəlalət edir.

Milli Məclisin sədri Sahibə Qafarova səmimi görüşə görə təşəkkürünü bildirib, Azərbaycan ilə İtaliya arasında əlaqələrin inkişaf etdirilməsinin hər iki ölkənin marağında olduğunu diqqətə çatdırıb. O, İtaliyanın Azərbaycan üçün dost ölkə və strateji tərəfdaş olduğunu bildirib.

Sahibə Qafarova qeyd edib ki, ölkələrimiz arasında əlaqələrin bütün sahələrdə inkişafı üçün böyük potensial mövcuddur.

Milli Məclisin sədri iki ölkənin qanunverici orqanları arasında münasibətlərin yüksək səviyyədə olmasından məmnunluğunu ifadə edərək, qarşılıqlı səfərlərin bu əlaqələrin daha da genişləndirilməsinə imkan verdiyini bildirib.

Görüşdə qarşılıqlı maraq doğuran digər məsələlər ətrafında fikir mübadiləsi aparılıb.

Azərbaycan.-2021.- 20 may.- S.2.