Vətən müharibəsi şəhidlərinin xatirəsinə abidə ucaldılıb

 

 

Lənkəran rayonunun Girdəni kəndində 44 günlük Vətən müharibəsi şəhidlərinin xatirəsinə tikilmiş abidə-kompleksinin açılış mərasimi keçirilib. Tədbirdə şəhidlərin ailə üzvləri, Qarabağ qaziləri və ictimaiyyət nümayəndələri iştirak ediblər.

Şəhidlərin xatirəsinə ehtiram əlaməti olaraq abidə kompleksi üzərinə tər çiçəklər düzülüb.  Lənkəran Şəhər İcra Hakimiyyətinin başçısı Taleh Qaraşov  çıxışında bildirib ki, Müzəffər Ali Baş Komandan, Prezident İlham Əliyevin müdrik rəhbərliyi sayəsində rəşadətli ordumuzun erməni işğalçılarını darmadağın etdiyi 44 günlük Vətən müharibəsinin qələbə ilə başa çatmasından bir il ötür. Bu qanlı-qadalı müharibədə qəhrəmancasına vuruşaraq düşmənə sarsıdıcı  zərbələr vuran igidlərimiz arasında lənkəranlı gənclər də var. Onlardan bəziləri vətən torpaqlarının işğaldan azad olunması yolunda şəhidlik zirvəsinə yetişmiş, bəziləri isə yaralanaraq qazi olmuşlar.    

Lənkəranda Vətən müharibəsi şəhidlərinə və qazilərə böyük ehtiramın bəslənildiyini, xatirələrinin əbədiləşdirilməsi məqsədilə adlarına bulaqların tikildiyini, xatirə lövhələrinin vurulduğunu, ad və anım günləri ilə bağlı tədbirlərin, mərasimlərin keçirildiyini diqqətə çatdıran T.Qaraşov onların vətən qarşısında xidmətlərinin heç vaxt unudulmayacağını, qəhrəmanlıqlarının hər zaman gənc nəslə örnək olacağını  söyləyib.

Daha sonra çıxış edən şəhid anası Bəyimağa Ağayeva, Girdəni kənd Ağsaqqallar Şurasının sədri Məmmədxan Kərimov və Girdəni kənd sakini  Namiq Bağırov Vətən müharibəsi şəhidlərinin qəhrəmanlığını yüksək dəyərləndirərək onların xatirəsinin əbədiləşdirilməsi sahəsində görülən davamlı işlərə görə ölkə Prezidentinə və Birinci vitse-prezident Mehriban Əliyevaya minnətdarlıqlarını çatdırıblar.

 

 

Ağaddin BABAYEV,

Lənkəran

Azərbaycan.-2021.- 7 noyabr.- S.15.