Ermənistan ordusunda həbs dalğası genişlənir

İrəvanda vəziyyət yenə qarışa bilər

Son günlər Ermənistanda orduya bağlı şəxslərin həbsi ölkədə yeni daxili qarşıdurmaya gətirib çıxarır.

Ermənistanın “Qraparak” nəşri yazır ki, baş verənlər hakimiyyət və müxalifət arasında, eləcə də, iqtidarın öz daxilində çəkişmələrə səbəb olub.

Qəzet xatırladır ki, Ermənistanda silah tədarükü ilə bağlı açılmış cinayət işi çərçivəsində artıq 4 nəfər - keçmiş müdafiə naziri David Tonoyan, silah tədarükçüsü David Qalstyan, keçmiş aviasiya rəisi Avetik Muradyan və Baş Qərargah rəisinin müavini Stepan Qalstyan həbs olunub.

O da diqqətə çatdırılır ki, David Qalstyanın David Tonoyanla yaxın dost münasibəti var. Onlar orduya silah tədarükü məsələsində 2 milyard dramdan çox sui-istifadələr işi üzrə həbs ediliblər: “Bir neçə gün bundan öncə məlum oldu ki, Silahlı Qüvvələrin Aviasiya İdarəsinin rəisi də bu iş üzrə ittiham edilir. Söhbət ondan gedir ki, yararsız raketlər özü də baha qiymətə tədarük edilib. Müharibə zamanı onların istifadəyə yararsız olduğu üzə çıxıb. Ermənistan Milli Təhlükəsizlik Xidmətinin açıqlamasına görə, cinayət işi çərçivəsində Silahlı Qüvvələrin bir sıra başqa yüksəkrütbəli hərbçilərinə qarşı da ittiham irəli sürülür”.

Vurğulanır ki, Ermənistan parlamentinin “Hayastan” fraksiyasının rəhbəri, keçmiş müdafiə naziri Seyran Ohanyan da bu sıradadır. O, 2008-ci ildən 2016-cı ilədək müdafiə naziri vəzifəsini tutub. Yeri gəlmişkən, David Tonoyan onun birinci müavini olub. Cinayət işi necə gedəcək və sonda nə olacaq, eləcə də kimə qarşı ittiham irəli sürüləcək? İndi bu suallara cavablar axtarılır. Amma bunsuz da demək olar ki, iş təkcə hüquqi-ictimai deyil, həm də siyasi tona malik olacaq, üstəlik, siyasi təqibin baş verdiyi barədə bəyanatlar da səslənəcək.

Baş verənlər erməni ordusunda yüksəkrütbəli hərbçilər arasında ciddi təşvişə yol açıb. Ermənistan Müdafiə Nazirliyinin generallarından və yüksəkdərəcəli rəsmilərindən hələlik Movses Akobyan baş verənlərin orduya ciddi zərbə olacağını qeyd edir. Bildirir ki, ordudan əsasən Rusiyaya, eləcə də keçmiş hərbi xuntaya bağlı zabitlər sıxışdırılıb çıxarılır. İndiki erməni generaliteti hesab edir ki, bu proseslərdə Ermənistan ordusu itirəcək. İddia olunur ki, uzun illər böyük təcrübəyə malik hərbçilər artıq həmin postları tutmayacaq, əvəzinə mövcud siyasi hakimiyyətə bağlı olan şəxslər hərbi qurumlarda yüksək vəzifəyə gətiriləcəklər və nəticədə ordu daha da zəifləyəcək.

Amma kiçik Ermənistanın ordusunun general yetişdirmək imkanları sonsuz deyil. Bəzən eyni şəxs bir neçə dəfə vəzifədən atılıb, sonra isə kadr çatışmazlığı səbəbindən yenidən vəzifəyə təyin edilib. Bunlardan biri də Ermənistanın hazırkı müdafiə naziri Arşak Karapetyandır. Ermənistanın sabiq prezidenti Serjik Sarkisyan 2016-cı ilin aprelindən sonra müdafiə nazirinin müavinləri ilə bərabər bir neçə idarə rəisini, o cümlədən Ermənistan silahlı qüvvələri Baş Qərargahı Kəşfiyyat İdarəsinin rəisi Arşak Karapetyanı vəzifədən azad etmişdi. 2016-cı ilin mayın sonunda isə Arşak ilə yaxın münasibətlərdə olan general Mels Çilingəryan, polkovnik Mqer Papyan və Armen Marqaryan həbs edildilər. Həmin vaxt A.Karapetyanın da açılan iki müxtəlif cinayət işindən biri üzrə saxlanılması nəzərdə tutulurdu. Söhbət alınan aşağı keyfiyyətli texniki kəşfiyyat vasitələrinin baha qiymətə rəsmiləşdirilməsindən getdiyi ehtimal olunurdu. Lakin hansısa qüvvə o zaman Arşak Karapetyanı cinayət məsuliyyətindən azad edə bildi.

2018-ci ildə hakimiyyətə gələn Nikol Paşinyan həmin ilin dekabrında Arşak Karapetyanın 1 mart 2008-ci il hadisələri ilə bağlı ifadə verməyə razılaşdığını nəzərə alaraq onu özünə müşavir təyin etdi. Ardınca isə Paşinyan Karapetyanı Ermənistan Silahlı Qüvvələrinin Baş Qərargah rəisinin birinci müavini təyin etməklə ordu karyerasına yenidən təkan verdi. Bu ilin iyulunda baş nazir vəzifəsini icra edən Nikol Paşinyan müdafiə nazirinin müavini Suren Saakyanı vəzifəsindən azad edərək Arşak Karapetyanı birinci müavin təyin etdi. Paşinyan baş nazir olduqdan sonra Karapetyanı müdafiə naziri vəzifəsinə gətirdi. İndi Paşinyan Karapetyanın ona tam itaət etməsini istəyir. Əks halda o da həbsə atılacaq. Bunun üçün məlum köhnə cinayət işləri də var.

Müxalifət isə indiki halda həbsə atılanları müdafiə etməyə çalışır, baxmayaraq ki, . hadisələrin gedişi müxalifətin həbsə atılanlara hansısa formada kömək etməsini mümkünsüz edir. Amma müxalifət də dinc durmur. Artıq məlumdur ki, “Daşnaksütyun” partiyası İrəvanda kütləvi etiraz aksiyalarına başlayacaq. Partiyanın rəsmi nümayəndəsi Baqrat Yesayan qeyd edib ki, mitinqlər gələn ay olacaq: “Əminəm ki, mitinqlər noyabrda olacaq. Erməni xalqı təhlükədə olduğunu anlamalıdır, başa düşməlidir ki, hakimiyyət orqanları dağıdıcı yol seçib. Siyasi elitanın vəzifəsi insanlara səy göstərmək və mesajlar verməkdir. Ermənistan dövlətinin taleyi təhlükədədir”.

Elçin CƏFƏROV

Azərbaycan.- 2021.-7 oktyabr.- S.1; 7.