Zəngəzur dəhlizi reallığa çevrilir

Azərbaycan Vətən müharibəsindəki qələbədən sonra yeni tarixi mərhələyə qədəm qoyub. Bu mərhələnin əsas prioriteti işğaldan azad olunmuş ərazilərin bərpasıdır. Oktyabrın 26-da Füzuli Beynəlxalq Hava Limanının istifadəyə verilməsi göstərdi ki, bərpa prosesi sürətli və əzəmətlidir. Zəngəzur dəhlizinin təməlinin qoyulması isə dövlətimizin milli maraqlarının qətiyyətlə həyata keçməsindən xəbər verir.

Milli Məclisin deputatlarının fikirləri də bu barədədir.

Azərbaycan quruculuq missiyası ilə nümunə göstərir

Sevil MİKAYILOVA,

Milli Məclisin deputatı:

- Azərbaycan 44 günlük Vətən müharibəsində tarixi zəfəri ilə Cənubi Qafqazda tamamilə yeni reallıq yaradıb. Bölgədə, nəhayət, dayanıqlı sülhü, təhlükəsizliyi təmin etmək üçün imkanlar yaranıb. Hazırda işğaldan azad olunmuş ərazilərdə bərpa-quruculuq işlərini sürətlə davam etdirən dövlətimiz, əslində, öz gücünü artırmaqla yanaşı, qonşu ölkələrin də sülh və əmin-amanlıq şəraitində yaşaması, iqtisadi dirçəlişə nail olmaları üçün geniş imkanlar təklif edir. İşğaldan azad olunmuş ərazilərdə Ermənistanın dağıdıcılıq siyasəti fonunda Azərbaycan quruculuq missiyası ilə nümunə göstərir. Azərbaycanın təklifini düzgün dəyərləndirmək hazırda Ermənistan üçün tarixi fürsətdir. Belə ki, öz işğalçı siyasəti ucbatından uzun illər iqtisadi blokadada olan Ermənistan, nəhayət, bu təcriddən çıxmaq, qonşu ölkələrlə normal münasibətlər qurmaq imkanı əldə edib.

Azərbaycan öz ali məqsədinə çatıb, torpaqlarını işğaldan azad edərək ərazi bütövlüyünü təmin edib. İndi Ermənistan Azərbaycanın ərazi bütövlüyünü tanıdığını bəyan etməlidir. Bu ölkə həm Azərbaycan, həm də Türkiyəyə qarşı əsassız ərazi iddialarını birdəfəlik unudub öz qonşuları ilə normal əlaqələr qurmağa çalışmalıdır. Ermənistan bu işdə beynəlxalq hüququn bütün müddəalarına hörmət göstərməli, işğalçılıq siyasətinin heç bir millətə fayda vermədiyini dərk edərək səmimi iradə ortaya qoymalıdır.

Türkiyə Prezidenti Rəcəb Tayyib Ərdoğanın oktyabrın 26-da Füzuli Beynəlxalq Hava Limanının açılışında və Zəngəzur dəhlizinin təməlqoyma mərasimindən sonra bəyan etdiyi kimi, Ermənistan Azərbaycanla münasibətlərində səmimi iradə ortaya qoyacağı təqdirdə, Türkiyə ilə də münasibətlərin normallaşması üçün heç bir əngəl qalmayacaq. Ermənistan Azərbaycana və Türkiyəyə qarşı olan ərazi iddialarından birdəfəlik əl çəkməyə məcburdur. Bu ölkə öz konstitusiyasında və hərbi doktrinasında bu cür iddiaları ifadə edən müddəalara da dəyişikliklər etməlidir.

Ermənistan anlamalıdır ki, dövlət sərhədləri müvafiq BMT sənədləri ilə təsbitini tapıb. Bu sərhədlərin pozulmasına istənilən cəhd beynəlxalq hüququn kobud pozulmasıdır. Belə ki, dövlətlərin suveren ərazisi toxunulmazdır. Ermənistan hazırda yaranmış tarixi şansdan yararlana bilər, onun başqa yolu yoxdur.

Dostluq, qardaşlıq və müttəfiqlik rəmzi

Sədaqət VƏLİYEVA,

Milli Məclisin deputatı:

- Qardaş Türkiyənin Prezidenti Rəcəb Tayyib Ərdoğanın Azərbaycana növbəti səfəri Azərbaycan-Türkiyə sarsılmaz birliyinin əyani təzahürü olduğunu, ölkələrimiz arasında əməkdaşlığın, qardaşlığın regional və dünya miqyasında önəmli amilə çevrildiyini bir daha təsdiqlədi. Həmçinin bir daha sübut edildi ki, Azərbaycan-Türkiyə birliyi dostluq, qardaşlıq və müttəfiqlik rəmzinə çevrilib, dünyada dil və etnik baxımdan bir-birinə yaxın ölkələrin çox olması fonunda Azərbaycan-Türkiyə birliyi nümunəvi xarakter daşıyır.

Prezident Rəcəb Tayyib Ərdoğanın Qarabağa ikinci səfəri çərçivəsində Füzuli Beynəlxalq Hava Limanının açılış mərasimində iştirak etməsi, Zəngəzur dəhlizinin - Horadiz-Cəbrayıl-Zəngilan-Ağbənd avtomobil yolunun, Zəngilan rayonunda “Dost Aqropark”ın təməlinin qoyulması, “ağıllı kənd” layihəsi çərçivəsində görülən işlərlə tanış olması bir daha qardaş ölkənin Azərbaycanın uğurlarını, sevincini paylaşmasına işarədir. Zəngilanda keçirilmiş görüşlər zamanı bir daha dünyaya mesaj verildi ki, iki ölkənin liderləri öz əməli fəaliyyətləri ilə milli maraqları hər şeydən üstün tutduqlarını və qətiyyətlə qoruduqlarını nümayiş etdirirlər. Bu gün öz liderlərinin sayəsində Türkiyə və Azərbaycan böyük uğurlar əldə edir, dünyada prinsipial, cəsarətli, düşünülmüş siyasət yürüdən ölkələr kimi tanınır və qəbul edilir.

Zəngəzur dəhlizinin təməlinin qoyulması tarixi hadisədir. Horadiz-Cəbrayıl-Zəngilan-Ağbənd avtomobil yolu ilə Bakıdan İstanbula gedən dəhliz yaradılacaq. Zəngəzur dəhlizinin regionda kommunikasiyaların, iqtisadi əlaqələrin möhkəmlənməsində böyük rolu olacaq. Eləcə də Füzuli Beynəlxalq Hava Limanı işğaldan azad olunmuş ərazilərdə strateji əhəmiyyətə malik kommunikasiya infrastrukturu formalaşdıracaq. Füzulidə istifadəyə verilmiş, Zəngilan və Laçında tikintisi nəzərdə tutulan hava limanları da regionun inkişafında əhəmiyyətli rol oynayacaq.

Regionda sülhün qarantı

Şahin İSMAYILOV,

Milli Məclisin deputatı:

- Dərin tarixi kökə malik Azərbaycan-Türkiyə dostluq və qardaşlığı dünyada birlik, güc nümunəsidir. Qardaş ölkənin Prezidenti Rəcəb Tayyib Ərdoğanın ölkəmizə səfəri ictimaiyyət tərəfindən böyük maraqla qarşılandı. Bundan əvvəl dövlət başçılarının Şuşada baş tutan görüşündə tarixi Şuşa Bəyannaməsi imzalanmışdı. Bu görüş həm də Şuşa Bəyannaməsinin müddəalarının uğurla həyata keçirilməsinin sübutudur. Qardaş dövlətlərin birgə fəaliyyəti çərçivəsində görülən işlərin hər biri mühüm siyasi hadisədir.

Türkiyə Prezidentinin işğaldan azad edilən torpaqlarımıza növbəti səfərini bir neçə istiqamətdə şərh edə bilərik. Bunlardan birincisi Qarabağın hava qapısı olan Füzuli Beynəlxalq Hava Limanında ilk rəsmi qarşılanan şəxs dövlət və xalq səviyyəsində yüksək dəyər verilən qardaş ölkənin Prezidenti oldu. Füzuli Beynəlxalq Hava Limanının açılış mərasimi, dövlət başçıları tərəfindən hava limanının rəmzi açılışını bildirən lentin kəsilməsi və hava limanının rəmzi açarlarının hər iki dövlət başçısına təqdim olunması da məhz iki qardaşın bir-birinə göstərdiyi yüksək diqqət və dəyərin ölçüsüdür.

İkincisi ondan ibarətdir ki, qardaş dövlətlərin prezidentləri Horadiz-Cəbrayıl-Zəngilan-Ağbənd avtomobil yolunun təməlini qoymaqla, həm də Zəngəzur dəhlizinin təməlini qoydular. Bu da, öz növbəsində, Naxçıvan, oradan isə Türkiyə ilə avtomobil nəqliyyatı ilə birləşməyimizi təmin edəcək. Bu hadisə olduqca əhəmiyyətli təməlqoyma mərasimi olmaqla mənəvi və iqtisadi perspektivləri ehtiva edir. Zəngilan rayonunda “Dost Aqropark”ın təməlinin qoyulması, dövlət başçılarının burada ilk çinar ağacı əkməsi, “Anadolu” Agentliyinin Vətən müharibəsini özündə əks etdirən fotosərgisi ilə tanışlıq, qardaş ölkənin Prezidentinin ön sözünü yazdığı və “Anadolu” Agentliyi tərəfindən hazırlanan “Qarabağ Zəfəri” kitabını müzəffər Ali Baş Komandanımıza təqdim etməsi və səfərin proqramına daxil olan bütün fəaliyyətlər sarsılmaz birliyi göstərən amillərdəndir. Səfər çərçivəsində açılış və təməlqoyma mərasimləri, eyni zamanda görülən işlərlə tanışlıq böyük rəmzi məna daşıyır.

Azərbaycan və Türkiyə birliyinin fonunda dövlət başçılarının göstərdiyi səylər bütün türk dünyası üçün inam, güc və əzmdir, antimilli qüvvələr üçün qorxu və təşvişdir, bəzi dairələr üçün isə açıq mesajdır. Bütün dünya Azərbaycan və Türkiyə qardaşlığını təcəssüm edən “Bir millət, iki dövlət” milli konsepsiyasının bəşəri missiya olduğunu görür. Azərbaycan-Türkiyə birliyi regionda sülhün qarantıdır.

Rəşad CƏFƏRLİ,

Azərbaycan.- 2021.- 29 oktyabr. S. 5.