Peyvəndləmədə iştirak, qaydalara və tövsiyələrə əməl etmək sağlamlığı qorumaq üçün vacibdir

Ötən şənbə və bazar günləri Bakı şəhəri də daxil olmaqla, bölgələrdə ictimai nəqliyyatın işləməməsi, ciddi ehtiyac olmadığı halda insanların küçəyə, bazara, mağazaya və ya digər ünvanlara getməmələri, habelə tibbi maskadan istifadə edilməsi və ara məsafəsi gözlənilməsi səbəbindən yoluxma hallarında nisbi azalma müşahidə edilmişdir.

Uzun müddət dövlət qulluğunda çalışmış Eldar Bədirbəyli bildirir ki, biz özümüzün, ailəmizin və ünsiyyətdə olduğumuz yaxın ətrafımızın sağlamlığını istəyiriksə, ilk növbədə, Operativ Qərargah tərəfindən müəyyənləşdirilən qaydalara ciddi əməl etməliyik, şadlıq saraylarında, xüsusən, bölgələrdə mağar toylarını və yas mərasimlərini yığcam, ara məsafəsi gözləməklə keçirmək lazımdır.

Toya gələnlərlə görüşüb öpüşməyə, nəfəs-nəfəsə dayanıb söhbət etməyə, digər bu kimi davranışlara yol verməmək lazımdır. Həkimlər, ekspertlər, hətta COVID-ə yoluxaraq ağır vəziyyətə düşmüş insanlar durmadan həyəcan təbili çalırlar ki, sağlamlığınızın qayğısına qalın, özünüzü, ailənizi bu gözəgörünməz bəladan qoruyun. Axı biz ağıllı, şüurlu, hər şeyi görüb-götürmüş insanlarıq, qaydalara əməl etməliyik. Dünyanın bir çox ölkələrində insanlar peyvəndləməyə möhtac qaldıqları halda bizdə hökumət, Azərbaycanın dövlət başçısı ölkə əhalisinin bu bəladan minimum itki ilə qurtulması üçün nə lazımdırsa edir. Xəstəxanalar, poliklinikalar, hətta xüsusi avtobuslarla həkim briqadaları həyətlərə gəlib insanlara ödənişsiz dövlət hesabına vaksin vururlar, maarifləndirici tövsiyələr verirlər. Bəs bunun müqabilində bizlərdən tələb edilən nədir? Cavab birdir: vətəndaş məsuliyyəti! Əgər insanlar bu məsuliyyəti dərindən dərk etsələr və həkimlərin dedikləri kimi qaydalara əməl etsələr, ilk növbədə yanındakının, ətrafındakının qayğısına qalmalı, onu yoluxmadan qorumalıdır.

Əhali arasında söhbətlərdən o da məlum olur ki, yoluxma və ölüm hallarının çoxalmasına səbəb bəzi insanların vaksinasiyaya laqeyd yanaşması, peyvənd olunmamasıdır. Xəstəxanalardan alınan məlumatlarda da bu həqiqət özünü göstərir.

Həkim-terapevt Həsən Məmmədov deyir: “Bütün günü ya telefonla, ya da iş yerimdə insanlarla, xəstələrlə əlaqədəyəm, görünən odur ki, ölkəmizdə vaksinasiya olunmayanlar çoxdur. Nədənsə çoxları “SinoVac” vurdurmaq istəmir. Niyə, nə səbəbə, özləri də tam bilmirlər. Gedib “Pfizer” üçün növbəyə dayanırlar, bu da bəzən 1 ay çəkir. Hamı bilməlidir ki, hər iki vaksin Dünya Səhiyyə Təşkilatı tərəfindən qeydiyyatdan keçib, məsləhət bilinib. Hansınasa şübhə ilə yanaşmağa, ehtiyat etməyə lüzum yoxdur. Əlbəttə, hər bir məntəqədə “Pfizer” vurdurmaq üçün şərait yaradılsa, hamı da gedib orada vaksin olunar və növbələr bir-birini əvəzləməz. Nəticədə vaxt keçir, növbə çatana qədər də şəxs yoluxur. 60 faiz yoluxma halı ilə xəstəxanaya gələn çoxlu insanlar var. Onlar da yoluxmanın artmasına səbəb olur. Odur ki, vaksinasiyaya getmək lazımdır.

Həkim onu da bildirdi ki, yoluxmaların artmasının daha bir səbəbi maskanın taxılmaması və ya ondan düzgün istifadə edilməməsi ilə bağlıdır. Bir neçə gün bundan əvvələ kimi avtobusda hər 10 nəfərdən doqquzu maskasız olurdu. Maska taxılmırsa, deməli, virusa yoluxma qaçılmazdır. Hər gün neçə-neçə xoşagəlməz hallarla üzləşən, məyusedici xəbərlər eşidən insanlar artıq görür və inanırlar ki, yoluxma artır, ölüm halları çoxalır, Odur ki, maskadan istifadə etməyə, vaksinasiya olunmağa başlayırlar. Maskanın kütləvi taxılmasına əməl edilsə, vaksinasiya sürətlə aparılsa, təbii ki, yoluxmada azalmalar olacaq. Yoluxmaların artmasının mövsümlə əlaqəsi yoxdur. Onsuz da havalar neçə vaxt idi ki, qızmar keçirdi, istilər indi-indi səngiyr. Bütün hallarda gigiyenik qaydalara ciddi əməl etmək lazımdır.

Sentyabrın 15-nə sayılı günlər qalır. Qarşıda ümumtəhsil müəssisələrinin açılması gözlənilir. Ənənəvi təhsili bərpa etməyin inamlı və təhlükəsiz yolu da vaksinasiyadan keçir.

Rəhman SALMANLI

Azərbaycan.- 2021.- 8 sentyabr.- S.1, 4.