Salyanlılar kommunal xidmətlərdən razılıq edirlər

Qışın oğlan çağıdır. Havalar tez-tez dəyişir. Gah duman, çən gəlir, gah da yağış, qar yağır. Arana düşən qar ərisə də, dağlarda, quzeylərdə ömrünü uzadır. Bütün bunlar ayrı-ayrı sahələrdə müəyyən çətinliklər yaratsa da, ümumilikdə xeyirdir. Bunu bilən əhali qışın sərt, qarlı-şaxtalı keçməsini arzulayır. Bilir ki, evində işığı, təbii qazı və içməli suyu olsa, çətinlik çəkməyəcək.

Bu gün nəinki şəhərlərdə, rayon mərkəzlərində, habelə kəndlərdə əhali gün ərzində keyfiyyətli elektrik enerjisi alır, əvvəlki kimi qrafiklər, açılmalar, kəsilmələr yoxdur. Bu da təsadüfi deyil. Azərbaycan qısa vaxtda elektrik enerjisi idxal edən ölkədən onun ixracatçısına çevrilmişdir. Azərbaycan qazı indi Avropa ölkələrinə nəql edilir. Yeni içməli su xətlərinin çəkilməsi, bunun üçün müvafiq qurğuların quraşdırılması nəticəsində xüsusilə Muğan zonasında camaatımızın içməli su təminatı əsaslı şəkildə yaxşılaşmışdır. Bütün bunlar adamlarda xoş ovqat, məmnunluq hissi yaradır. Nisbətən yaşlı adamlar söhbət düşəndə göstərilən sahələrdə heç vaxt belə təminatın olmadığını deyirlər.

Sabir Kərimov uzun illərdir ki, Salyan Raon Mərkəzi Uşaq Xəstəxanasına rəhbərlik edir. Sözügedən məsələ ilə bağlı öz fikirlərini bizimlə bölüşdü: “Yaxşı zamanda yaşayırıq. Azərbaycan inkişaf edir, möhkəmlənir. 44 gönlük Vətən müharibəsi bunu aydın göstərdi. Ən müasir silahlarla təchiz edilmiş ordumuz erməni işğalçılarını torpaqlarımızdan qovub çıxartdı. Bu müharibə xalqımızın birliyini, mübarizliyini bir daha dünyaya nümayiş etdirdi. İnkişaf, tərəqqi ölkəmizdə bütün sahələrdə vardır. Səhiyyəmiz durmadan inkişaf edir. Adamlarımızın sosial vəziyyəti ildən-ilə yaxşılaşır. SSRİ-dən sonra insanların işıq, təbii qaz, işməli su ilə təminatında da kəskin problemlər vardı. Gün ərzində 5-6 saat elektrik enerjisi verilirdi, o da aşağı gücdə. Gərginliyin az olması ucbatından elektrik avadanlıqları tez-tez yanıb sıradan çıxırdı. Yalnız şəhərlərə, rayon mərkəzlərinə qaz xətti çəkilmişdi, amma aylarla qaz verilmirdi. O vaxt kondisioner, kombi qızdırıcı sistemi haqda adamlarda təsəvvür belə yox idi. İndi isə başqa dövrdür, bunlarsız yaşamaq mümkün deyil”.

Maisə Abdullayeva isə belə deyir: “İşıq, qaz, içməli su təminatı hər bir ölkənin, xalqın həyatında yaşayış səviyyəsini müəyyən edən başlıca amildir. Tanrıya şükürlər olsun ki, indi onlar sarıdan problemimiz yoxdur. Yaşadığım Salyan şəhərində əhali davamlı və keyfiyyətli işıq, qaz və içməli su sarıdan heç bir korluq çəkmir”.

Bəli, ölkəmizdə kifayət qədər işıq və təbii qaz vardır. Onu abonentlərə vaxtında və keyfiyyətli çatdırmaq isə “Azərenerji”, “Azəriqaz” və “Azərsu”nun, habelə onların yerlərdəki təşkilatlarının işi və vəzifəsidir. Bu qış aylarında onların işi daha çətin olur. Hələlik Salyanda əhali bu çətinliyi elə də hiss etmir. İnanmaq istərdik ki, qışın ən sərt ayı sayılan fevralda da belə olacaq, kiçik çilə həm əhaliyə, həm də kommunal xidmət qurumlarına böyük problemlər yaşatmayacaq.

Seyran CAVADOV,

Azərbaycan. - 2021.-31 yanvar.- S.7.