Sağlamlığın etibarlı keşiyində

Daxili İşlər Nazirliyinin A.Heydərov adına Respublika Hospitalında mükəmməl tibbi xidmət göstərilir

“...Bu hospital doğrudan da dünyanın ən yüksək standartlarına cavab verir. Dünyanın ən inkişaf etmiş ölkələrində mövcud olan xəstəxanalardan heç nə ilə fərqlənmir. Bəlkə də, onları qabaqlayır. Burada ən müasir avadanlıq quraşdırılıb və bina da çox gözəl, zövqlə tikilibdir. Həm xarici görünüşü gözəldir, həm də daxili dizaynı. Şübhə etmirəm ki, burada işləmək də çox xoş olacaqdır”.

Prezident İlham Əliyev 2009-cu ildə Daxili İşlər Nazirliyinin Arif Heydərov adına Hospitalının yeni binasının açılışında səsləndirmişdi bu yüksək fikirləri... Dövlət başçısı həm də onu vurğulamışdı ki, burada gözəl tibbi xidmət, xəstələrə böyük qayğı göstərilməlidir. Ötən müddət ərzində daha da inkişaf edən DİN-in hospitalı qarşısına qoyulan tələbləri layiqincə yerinə yetirməyi bacarıb.

Bu tibb müəssisəsində unikal cərrahi əməliyyatlar aparılır, ən müasir avadanlıqlarla xəstəliklərin dəqiq diaqnostikası həyata keçirilir, düzgün müalicə metodları seçilir. Hospitala üz tutan bütün xəstələr tibb heyəti tərəfindən həssas yanaşma, diqqət və qayğı sayəsində tez bir zamanda sağlamlıqlarına qovuşaraq xidməti vəzifələrinin başına dönürlər.

Cərrahi əməliyyatların əksəriyyəti qapalı üsulla həyata keçirilir

Apendisitin ağırlaşmış forması ilə (apendikulyar çıxıntının kəskin iltihabı, qanqrenoz formada) martın 31-də hospitala gətirilən polis leytenantı Mirzə Məmmədov ən müasir cərrahi üsulla əməliyyat olunanlardan biridir. Dünya Sağlamlıq Günü ərəfəsində sözügedən hospitala reportaj hazırlamağa yollandığımız zaman Cərrahiyyə şöbəsinin palatasında Mirzə Məmmədovla həmsöhbət olduq.

Gənc polis leytenantı əməliyyatdan qısa zaman keçməsinə baxmayaraq, həkimlərin artıq onun evə çıxa biləcəyinin mümkün olduğunu sevinclə söylədi: “Əməliyyatım çox ağrısız şəkildə həyata keçirildi. Bura gələndə qarın boşluğumda hədsiz spazm ağrıları var idi. Sağ olsunlar, həkimlərin göstərdiyi diqqət və qayğı nəticəsində əməliyyatdan sonra bütün ağrılardan qurtulmuşam, özümü çox yaxşı hiss edirəm. Tezliklə də xidməti vəzifəmi icra etməyə qayıdacam...”

Palataya əməliyyat etdiyi xəstələrin vəziyyəti ilə maraqlanmağa gələn hospitalın Cərrahiyyə şöbəsinin rəisi, tibb elmləri namizədi Vüsal Eminov məlumat verdi ki, bu şöbədə ümumi qarın boşluğu üzrə cərrahi əməliyyatlar icra olunur və bunların əksəriyyəti laporoskopik, yəni qapalı üsulla həyata keçirilir: “Qarın boşluğunda qasıq yırtığı, kor bağırsağın iltihabı, mədə, onkoloji əməliyyatlarını qapalı üsulla edirik. Bu üsulun üstünlüyü odur ki, xəstələr geniş, uzun kəsiklərdən azad olur. Açıq üsulla əməliyyat zamanı, tibbi baxımdan xəstələrin əməliyyatdan sonrakı dövrü olur, yaxud əməliyyatdan sonra yırtıqlar əmələ gələ bilir, müəyyən ağrılar olur, xəstənin əmək qabiliyyətinin bərpa olunması uzun çəkir və sair. Amma qapalı üsulla əməliyyat etdiyimiz xəstələrin çoxu tam sağalaraq səhərisi gün ayağa qalxır”.

Uğurlu inkişaf

Yüksək uğurları ilə hər zaman seçilən bu hospital 1964-cü ildə yaradılıb. Vaxtilə 100 çarpayılıq və 90 nəfərə yaxın tibb işçisi olan hospitalda 3 şöbə (terapiya, cərrahiyyə və nevrologiya) və 7 həkim kabineti olub. 1993-1994-cü illərdə tədricən çarpayı fondu, şöbələrin və kabinetlərin, tibb işçilərinin sayı artırılıb. Hospitalın ştat cədvəlində dəyişikliklər edilib, zabitlərin sayı artırılıb, yeni şöbələr yaradılıb. Bacarıqlı, savadlı tibb bacılarına xüsusi rütbələr verilib.

1988-1994-cü illərdə respublikanın ağır günlərində bu hospitalda cəbhə bölgələrində xəsarət almış minlərlə daxili işlər orqanları əməkdaşlarına, Daxili Qoşunların hərbi qulluqçularına və mülki vətəndaşlara yüksək səviyyədə tibbi xidmət göstərilib, onların reabilitasiyası üçün hər cür şərait yaradılıb. Həmin dövrlərdə hospitalın onlarca həkim zabiti cəbhə zonasında əzmkarlıqla fəaliyyət göstərib. Eyni zamanda hospital tərəfindən bir qrup yaralının Almaniyada, Türkiyədə, İranda, Bolqarıstanda müalicəsinin davam etdirilməsi təşkil edilib.

1993-cü ilin oktyabrında Ulu Öndər Heydər Əliyev hospitala gələrək Qarabağ müharibəsinin yaralıları ilə görüşüb. 1996-cı ildə isə Prezident Heydər Əliyevin sərəncamı ilə görkəmli dövlət xadimi, Azərbaycanın sabiq Daxili İşlər Naziri, general-leytenant Arif Nəzər oğlu Heydərovun xatirəsi əbədiləşdirilərək onun adı bu hospitala verilib.

Hospitalın hazırkı binası 2009-cu il fevralın 25-də Prezident İlham Əliyevin xeyir-duası ilə istifadəyə verilib. 2010-cu ildə hospitalın nəzdində Stomatoloji Mərkəzin və DİN-nin 1 saylı poliklinikasının yeni binasının, 2013-cü ildə isə Hemodializ şöbəsinin açılışı olub.

Hazırda hospitalda çarpayı fondu 360-dır. 100-dən artıq həkim, 20 şöbə, 2 mərkəz, 1 bölmə və 6 yardımçı xidmət sahəsi fəaliyyət göstərir.

Qarşıdakı planlar

DİN hospitalının baş həkiminin müalicə işləri üzrə müavini Namiq Bədirxanov söylədi ki, bu gün müasir tibb müəssisələrindən sayılan, zəngin maddi-texniki bazaya malik olan hospital polis əməkdaşlarının, onların ailə üzvlərinin, təqaüdçülərin, eləcə də mülki işçilərin sağlamlığının qorunması isiqamətində yüksək xidmət göstərməyə çalışır.

Eyni zamanda bu hospitalda işləyən hər bir əməkdaşın qarşısında böyük məsuliyyət hissi, peşə və vəzifə borcunu yüksək səviyyədə yerinə yetirilməsi məsələsi dayanır. N.Bədirxanov bildirdi ki, hospitalda yeni şöbələrin açılması bir sıra yeniliklərin edilməsi də qarşıda planlaşdırdıqları məsələlərdəndir: “Artıq hospitalda İnvaziv kardiologiya şöbəsi açılıb, bura avadanlıq və sair baxımdan tam təmin edilib. Hazırda həkim seçimi mərhələsindəyik. İnvaziv kardiologiya işə düşdükdən və özünü doğrultduqdan sonra isə ikinci addım kimi kardio-cərrahiyyə şöbəsinin yaranması olacaq. Onu da deyim ki, hazırda hospitalımızda qan bankı yoxdur. Artıq bununla bağlı avadanlıqlar alınıb və yaxın gələcəkdə özümüzün qan bankımız da olacaq”.

İxtisasca üz-çənə cərrahı olan həkim onu da söylədi ki, təbii olaraq hospital respublikada gedən İcbari Tibbi Sığorta ilə bağlı yeniliklərdən də kənarda qalmır: “Hazırda bu məsələ də rəhbərliyimiz tərəfindən nəzərdən keçirilir və ola bilsin ki, gələcəkdə hospitalda müalicə alan mülki vətəndaşlar İcbari Tibbi Sığortadan yararlana biləcəklər”.

Azərbaycanda ilk koxlear implantasiya burada həyata keçirilib

Yuxarıda vurğuladığımız kimi, DİN-in hospitalı, nadir cərrahi əməliyyatlara imza atıb. 2014-cü ildə koxlear implantasiya respublikamızda ilk dəfə olaraq bu hospitalda həyata keçirilib. Bu əməliyyatın əsas özəlliklərindən biri anadangəlmə kar doğulmuş körpələrin gələcək əlilliyinin qarşısının vaxtında alınmasıdır.

Hospitalın Otorinolarinqologiya şöbəsinin rəisi Kamil Yusifov bildirdi ki, vaxtilə davamlı icra etdikləri koxlear implantasiyanı əsas nailiyyətlərindən biri hesab edir. Çünki o uşaqlar indi sərbəst danışırlar. 2009-cu ildən hospitalda çalışan Kamil həkim söylədi ki, rəhbərlik etdiyi şöbədə burun, boğaz, qulaq xəstəliklərinə aid xidmətlər yüksək səviyyədə həyata keçirilir: “Şöbəmiz müasir avadanlıqlarla təchiz edilib və burun, boğaz, qulaq əməliyyatları da müasir cihazlarla icra edilir. Xəstələrimizin hospitalda yatış günü çox qısa olur. Demək olar ki, əksəriyyətində 1 gün, ən çox 2 gün ola bilər. Ümumiyyətlə, işimizi müasir standartlar səviyyəsində qurmuşuq və hazırda da davam etdiririk”.

Otorinolarinqologiya şöbəsində qulaq pərdəsinin bərpası, qulaqda xroniki infeksiyaların ləğvinə aid əməliyyatlar icra olunur. Burunda endoskopik üsulla xroniki qaymaritlərin müalicəsi, həmçinin estetik, burun tənəffüsünə aid əməliyyatlar keçirilir. O cümlədən boğazda “artıq ət”, səs telləri (məsələn, səs tellərində hər hansı polip, törəmə olan zaman) əməliyyatları icra olunur.

Travmatologiya şöbəsində travmatologiya ortopediya sahəsində də ən müasir əməliyyatlar icra olunur. Şöbənin rəisi, tibb xidməti mayoru, tibb üzrə fəlsəfə doktoru Ramil Nəcəfov məlumat verdi ki, hospitalda ən ağır sınıqların müalicəsi, ortopedik əməliyyatlar, deformasiyalar, oynaq əməliyyatları, qapalı oynaq əməliyyatları uğurla həyata keçirilir. Həmçinin uşaq ortopediyası, uşaq sınıqları uşaq travmatologiyası, anadangəlmə qüsurlarla məşğul olurlar.

Hospital pandemiya sınağından da layiqincə çıxıb

Müasir dövrümüzün bəlası olan COVID-19 pandemiyası zamanı da hospital böyük məsuliyyət və əzmlə polis əməkdaşlarının sağlamlığının qorunması istiqamətində, sözün əsl mənasında, gecə-gündüz çalışıb. DİN-in Tibb İdarəsinin nəzdində Epidemioloji Mərkəzdə virusun yayılmağa başladığı zamandan qısa müddət sonra anti-COVID-19 tədbirləri çərçivəsində PSR testlərin götürülməsi həyata keçirilib. Eyni zamanda ölkəmizdə infeksiyaya yoluxmanın pik həddində iki dəfə (2020-ci ilin iyul-avqust və noyabr-dekabr aylarında) DİN-in hospitalı COVID-19 xəstəxanası kimi fəaliyyət göstərib. Burada, əsasən, virusa yoluxan və stasionar şəraitdə müalicəyə ehtiyacı olan polis və Daxili Qoşunların əməkdaşlarının müalicəsi həyata keçirilib.

Hospitalın Terapiya şöbəsinin rəisi, tibb xidməti polkovnik-leytenantı Samirə İmanova söylədi ki, həmin dövrdə bütün xəstəxanalarda olduğu kimi, çalışdığı hospitalda da COVID-19-la mübarizə aparılıb. Hospitalın kollektivi bu gözlənilməz vəziyyətə dərhal uyğunlaşıb və tez səfərbər olmağı bacarıb: “Təbii ki, iş gərgin, çətin idi. Ona görə ki, bu xəstəliklə bağlı lazımi məlumatımız yox idi. Buna görə də demək olar ki, protokola uyğun müalicə ilə yanaşı, hər bir xəstəyə individual yanaşma var idi. Göstərilən bu yanaşmanın effekti yaxşı oldu, xəstəliyə tutulan polis əməkdaşlarının hamısı sağalaraq xidməti vəzifələrinə döndülər. Beləliklə, o çətin prosesdən üzüağ çıxa bildik”.

Samirə İmanova qeyd etdi ki, COVID-19 dövründə müalicə üçün hər bir təminat hospitalın öz fondu hesabına həyata keçirilib. Polis əməkdaşları 100 faiz dərmanla təmin olunub: “İndi post-covId dövründəyik və COVID-19-dan sonra xəstələrdə əmələ gələn fəsadlarla məşğul oluruq. Burada ağciyər problemləri daha çox üzə çıxır. Mədə-bağırsaq, böyrək problemləri hazırda daha çox məşğul olduğumuz işlərdir”.

Həkim onu da söylədi ki, 2009-cu ildə hospitalın yeni binası istifadəyə verildikdən sonra Terapiya şöbəsi genişlənib. 40 nəfərlik çarpayı fondu 60 nəfərlik olub: “Demək olar ki, polis əməkdaşları hər bir xəstəlik üzrə bizim şöbədə tam müalicə alırlar və tam sağalaraq xidməti vəzifələrinə qayıdırlar”.

Həmsöhbət olduğumuz hospitalın baş tibb bacısı Sevinc Abdullayeva qeyd etdi ki, hər zaman olduğu kimi, tibb bacıları olaraq COVID-19 pandemiyasının pik dövründə, hospital koronaviruslu xəstələrə xidmət göstərdiyi zaman öz işlərinin öhdəsindən layiqincə gəldilər.

Hərtərəfli şərait, yüksək xidmət, peşəkar yanaşma

30 ilə yaxındır ki, bu hospitalda çalışan həkim Bilqeyis Kərimova terapiyanın pulmonologiya və mədə-bağırsaq müalicəsi üzrə fəaliyyət göstərir. Bilqeyis həkim deyir ki, hazırda dünyada tibbə baxış fərqlidir, həkimlərin fəaliyyətində çox böyük dəyişikliklər var: “Mən əmək fəaliyyətinə başlayanda sadəcə stetoskop və barmaqlarımla diaqnoz qoyurdum. Həkimlərin yardımçıları rentgen aparatı və laborator müayinələr idi. Amma son dövrlərdə həkimlərə yardım edə bilən fəaliyyətlər genişlənib. Laboratoriyalarda daha çox analizlər aparılır, kompüter tomoqrafiyası, MR müayinələr keçirilir və sair. Yəni bunlar bizə dəqiq diaqnoz qoymağa çox yardım edir. Bu baxımdan hospitalımızda da ən yüksək şəraitin, ən müasir avadanlıqların olması bizə işimizdə böyük yardımçı olur”.

Hospitalda ən ağır xəstələrin yerləşdirildiyi şöbəyə, reanimasiyaya da baş çəkdik. Bu şöbədə ağır travma alan, infarkt, insult keçirən xəstələr müalicə alırlar. Onlara ilkin olaraq 15-20 gün yardımlar göstərilir. Xəstələrin vəziyyəti stabilləşdikdən sonra isə müvafiq şöbələrə köçürülürlər. Şöbələrdə isə xəstələr 1 həftə-10 gün yatdıqdan sonra evə yazılırlar. Baş ordinator, reanimotoloq Aynur Mustafayeva bildirdi ki, şöbə ən yüksək müasir avadanlıqlarla təchiz olunub: “Yəni xəstə burada yerində USM-dən, rentgendən keçir. Müasir laboratoriyamız fəaliyyət göstərir. Həmçinin süni tənəffüs aparatlarımız da var. COVID-li xəstələrlə işlədiyimiz dövrdə bəzi xəstələri süni nəfəs aparatına bağladıq”.

Polislərin sağlamlığı güvənli əllərdədir

“Böyrək çatışmazlığım, ürəyimdə döyünmə, qaraciyərimdə piylənmə var, həm də şəkər xəstəsiyəm. Bir həftədir ki, bu hospitalda müalicə alıram. Sağ olsun, həkimlərimiz ki, mənə çox yüksək səviyyədə xidmət göstərirlər, vəziyyətimlə daim maraqlanırlar”. Terapiya şöbəsində müalicə alan 63 yaşlı təqaüdçü polis polkovnik-leytenantı Qüdrət Məmmədovla palatada həmsöhbət olduğumuz zaman söylədi bu fikirləri.

Təqaüdçü polis deyir ki, digər şöbələrdən böyrək, şəkər xəstəliyini müalicə edən həkimlər də dəvət olunur və gəlib burada onu müayinə edirlər: “Onu da deyim ki, işlədiyim dövrdə də bu hospitalda müəyyən müalicələr almışam. Nevrologiya şöbəsində yatmışam. Elə o zaman da bu hospitalda mənə və digər xəstələrə göstərilən yüksək səviyyədə qayğı və diqqətin şahidi olmuşam”.

Bəli, bunlar Daxili İşlər Nazirliyinin Hospitalında keçirdiyimiz bir gün ərzində müşahidə etdiyimiz qaynar iş mühitinin qısa xülasəsidir. Dünyanın ən inkişaf etmiş ölkələrində mövcud olan xəstəxanalarla bir sırada dayanan, ən müasir avadanlıqlar quraşdırılan, peşəkar tibbi heyət çalışan bu hospitalla tanışlığımız onu deməyə əsas verir ki, daxili işlər orqanları əməkdaşlarının sağlamlığı güvənli əllərdədir.

Necə ki, polislərimiz ayıq-sayıq xalqımızın təhlükəsizliyinin keşiyindədir, eləcə də Daxili İşlər Nazirliyinin A.Heydərov adına Respublika Hospitalı da Azərbaycan polisinin sağlamlığının keşiyindədir.

Yasəmən MUSAYEVA

Azərbaycan.- 2022.- 7 aprel- S.6.