ABŞ ATƏT-in Minsk qrupunda iştirakını dayandırdı

Rusiyadan sonra rəsmi Vaşinqtonun da bu addımı atması Qarabağ münaqişəsinin tam həll edildiyinin növbəti beynəlxalq etirafı oldu

İkinci Qarabağ müharibəsinin Azərbaycanın zəfəri ilə sona çatması mühüm proseslərə də xitam verdi.

Onlardan biri "status-kvo" məsələsi, digəri isə münaqişənin həlli üçün yaradılmış ATƏT-in Minsk qrupu idi. Artıq hər iki məsələ, demək olar ki, tarixin arxivinə gömülüb.

Savaşın qalibi, Müzəffər Komandan İlham Əliyevin böyük zəfərdən sonra bəyan etdiyi kimi artıq Qarabağ münaqişəsi, "status-kvo" yoxdur. Azərbaycan döyüş meydanında güc göstərərək hərbi-siyasi qələbəsi ilə "status-kvo"nu dəyişdirib.

Yaradıldığı vaxtdan müharibəyədək regiona yalnız turist səfərləri edən həmsədrlərin fəaliyyətini dəyərləndirməyə də ehtiyac qalmayıb. Çünki İlham Əliyev aprelin 12-də ilin birinci rübünün yekunlarına həsr olunmuş müşavirədə vasitəçilik institutunun "fəaliyyətini" konkret olaraq belə qiymətləndirib: 3 diplomat + 28 il = 0.

Yəni, üç həmsədr 25 illik fəaliyyət döründə münaqişənin nizamlanması istiqamətində ədalətli həll paketi təqdim edə bilmədilər. Amma işğalçı Ermənistana Qarabağda törətdiyi təxribatlara görə bir dəfə də olsun sanksiya tətbiq edilmədiyi halda, Azərbaycana qarşı illərlə ikili standartlar prinsipi yürüdüldü, təzyiqlər edildi. Bunu görən işğalçı dövlət də cəzasızlıq mühitindən yararlandı. 44 günlük Vətən müharibəsində isə Azərbaycan öz gücünə bütün problemlərə son qoydu və bu gün diktəni Qalib Komandan kimi İlham Əliyev edir. Azərbaycan Prezidenti qətiyyətlə vurğulayır ki, artıq nə münaqişə var, nə də onun "həlli" ilə məşğul olan ATƏT-in Minsk qrupu.

Dünən isə İlham Əliyevin fikirlərinə daha bir dəstək ABŞ-dan gəldi. ABŞ keçmiş Dağlıq Qarabağ münaqişəsinin ədalətli həlli məqsədi üçün yaradılan ATƏT-in vasitəçilik institutu - Minsk qrupunun tarixin arxivinə göndərilməsini təsdiqləyən məlumat yaydı. Rusiyadan sonra ABŞ-ın da Minsk qrupunda fəaliyyətini dayandıraraq özünün həmsədri Endru Şoferi Qafqazda danışıqlar üzrə baş müşavir təyin etdi. Endru Şoferin Ermənistana səfəri də məhz bu vəzifədə reallaşıb, həmsədr kimi yox.

İlk olaraq bu addımı Rusiya atmışdı. Bu barədə danışan Rusiya Xarici İşlər Nazirliyinin rəsmi nümayəndəsi Mariya Zaxarova bildirmişdi ki, sabiq həmsədr İqor Xovayev yeni qisimdə - Rusiya Federasiyası xarici işlər nazirinin Azərbaycan Respublikası və Ermənistan Respublikası arasında münasibətlərin normallaşdırılmasına kömək məsələləri üzrə xüsusi nümayəndəsi kimi öz işini davam etdirəcək.

Beləliklə, Rusiyadan sonra Rəsmi Vaşinqtonun da bu addımı atması Qarabağ münaqişəsinin tam həll olunmasının növbəti beynəlxalq etirafı oldu.

Xatirladaq ki, ötən həftə ABŞ Dövlət Departamenti tərəfindən yayılan hesabatda da Ermənistanın insanlıq əleyhinə cinayətlər törətdiyi bəyan edilmişdi. Departamentin Demokratiya, İnsan Hüquqları və Əmək Bürosunun 2021-ci il dünya ölkələrində insan hüquqlarının vəziyyətinə dair illik hesabatının Ermənistan ilə bağlı hissəsində İkinci Qarabağ müharibəsi zamanı işğalçı ölkənin silahlı qüvvələri tərəfindən beynəlxalq hüququn və Cenevrə Konvensiyasının pozulması faktları öz əksini tapmışdı.

R.BAXŞƏLİYEV

Azərbaycan. - 2022.- 20 aprel.- S.6.