Proses "Bakı-Yerevan" formatında davam etməlidir

İlham Əliyevin bu qətiyyətli mövqeyi Ermənistana razılaşmalara əməl etməkdən başqa yol qoymur

İkinci Qarabağ müharibəsindən sonra Azərbaycanın yaratdığı reallıqlar beynəlxalq ictimaiyyət tərəfindən tam qəbul olunur. Bu da ilk növbədə respublikamızın öz ərazi bütövlüyünü bərpa etməsinə ehtiramın nümunəsidir.

Başqa vacib məqam ondan ibarətdir ki, Azərbaycanın yaratdığı yeni reallıqlardan irəli gələrək "Dağlıq Qarabağ münaqişəsi", "status" kimi anlayışlar da beynəlxalq səviyyədə müzakirələrdən çıxıb.

Azərbaycanın yaratdığı reallıqlar regionun rifahı üçün əsas faktordur

Hazırkı mərhələdə Azərbaycanın prioritetləri münasibətlərin normallaşdırılması, sərhədlərin demarkasiyası və delimitasiyasıdır. Elə ötən ilin dekabrından başlamış Brüssel formatında da müzakirələr bu istiqamətdə, Bakının maraqlarına uyğun formatda davam edir. Aprelin 23-də Prezident İlham Əliyev və Avropa İttifaqı Şurasının rəhbəri Şarl Mişel arasında baş tutan telefon söhbətinin məzmunu da bunu təsdiq edir.

Öncə onu qeyd edək ki, Brüssel formatında gündəliyə çıxarılan və müzakirə olunan məsələlər, əldə olunan razılaşmalar Azərbaycanın İkinci Qarabağ müharibəsindəki qələbədən sonra uğurlarını diplomatik sferada da qətiyyətlə davam etdirməsinin göstəricisidir.

Məlum olduğu kimi, hələ ötən ilin dekabrında Brüsseldə keçirilmiş üçtərəfli görüşdən sonra Şarl Mişel verdiyi bəyanatda təsdiq etmişdi ki, Aİ Azərbaycanın yaratdığı yeni reallıqları regionun rifahı üçün əsas faktor hesab edir.

Bəyanatda səslənən bütün fikirlər Aİ-nın təşəbbüsü ilə yaranmış Brüssel formatında müzakirələrin Azərbaycanın tələb və təşəbbüsləri çəçivəsində aparıldığını göstərir. Məsələn, Şarl Mişel artıq "Dağlıq Qarabağ münaqişəsi", "status" kimi ifadədələrdən istifadə etmir, o cümlədən Minsk qrupunun adını çəkmir.

Bu il fevralın 4-də Fransa Prezidentinin təşəbbüsü ilə Azərbaycan Prezidenti İlham Əliyevin, Fransanın Aİ-yə sədrliyi qismində Emmanuel Makronun, Avropa İttifaqı Şurasının rəhbəri Şarl Mişelin və Ermənistanın baş naziri Nikol Paşinyanın iştirakı ilə keçirilən görüş Vətən müharibəsindəki yeni reallıqlar fonunda bütün proseslərin respublikamızın maraqlarına uyğun cərəyan etdiyini göstərdi.

Eləcə də Brüsseldə aprelin 6-da keçirilən üçtərəfli görüşdə də gündəliyə çıxarılan və müzakirə olunan məsələlər ondan xəbər verdi ki, Azərbaycan İkinci Qarabağ müharibəsindəki qələbəni postmüharibə dövründə də inamla davam etdirir. Görünən odur ki, Prezident İlham Əliyev Brüssel formatında Azərbaycanın maraq və mənafelərini qətiyyətlə təmin edir.

Aİ Bakının mövqeyini bölüşür

İlham Əliyevlə Şarl Mişel arasındakı telefon danışığının məzmunu da ondan xəbər verdi ki, Aİ Ermənistanla normallaşma prosesinin Brüssel formatında əldə edilmiş razılaşmalar çərçivəsində aparılmasının tərəfdarıdır. Başqa cür desək, Aİ bu istiqamətdə konkret addımların atılmasında və yekunda tərəfləri qane edəcək nəticənin əldə edilməsində maraqlıdır.

Bakının normallaşma prosesindəki addımları da nəticəyönümlü fəaliyyətin təmin olunmasına hesablanıb. Ölkəmizin mövqeyi tamamilə beynəlxalq hüququn norma və prinsiplərinə uyğundur. Azərbaycan elə bir mövqe ortaya qoyur ki, Aİ də onu onu bölüşür və qəbul edir. Ən əsası Ermənistana normallaşmaya xidmət edən təkliflərdən, təşəbbüslərdən və razılaşmalardan imtina etmək üçün heç bir bəhanə verilmir.

Şarl Mişellə telefon söhbəti zamanı Prezident İlham Əliyev Brüssel görüşünün nəticələrinə uyğun olaraq rəsmi Bakının Ermənistan-Azərbaycan sərhədinin delimitasiyası və demarkasiyası üzrə milli komissiyanın və iki ölkə arasında sülh müqaviləsinin hazırlanması üzrə nümayəndə heyətinin tərkibini müəyyən etdiyini və qarşı tərəflə "Bakı-Yerevan" formatında danışıqlara hazır olduğunu vurğulayıb. Dövlət başçısı sülh müqaviləsi üzrə danışıqlar üçün Azərbaycanın təqdim etdiyi beş prinsipin əsas götürüldüyünün vacibliyini vurğulayıb.

"Dəmir yumruq" sərhəd təxribatının qarşısını qətiyyətlə alır

44 günlük Vətən müharibəsindən sonra Ermənistan dəfələrlə həm Rusiya sülhməramlılarının müvəqqəti olduğu Azərbaycan ərazilərində, həm də dövlət sərhədi istiqamətində təxribatlar törədiblər. Hər dəfə Azərbaycan Ordusu təxribatların qarşısını alıb, qanunsuz silahlı birləşmələr, həm də Ermənistan ordusunun şəxsi heyəti böyük tələfatlar verib.

Ermənistan aprelin 23-də dövlət sərhədinin Zəngilan rayonu ərazisindən keçən hissəsində yenidən təxribat törədib. Belə ki, Ermənistan silahlı qüvvələrinin təxribat-diversiya qrupu dövlət sərhədini keçməyə cəhd göstərib. Dövlət Sərhəd Xidməti tərəfindən görülmüş tədbirlər nəticəsində təxribat-diversiya qrupunun Azərbaycan Respublikasının ərazisinə keçməsinin qarşısı alınıb və diversantlar geri çəkilməyə məcbur edilib. Təxribat-diversiya qrupunun üzvü, hərbi qulluqçu Martirosyan Eduard Arturoviç DSX əməkdaşları tərəfindən saxlanılıb.

Bu hadisə bəlli həqiqətlərə yeni işıq salır. Məlum olduğu kimi, Ermənistan tərəfi hələ 44 günlük müharibədən də əvvəl danışıqlar prosesini əngəlləmək üçün təxribatlar törədirdi. Məqsəd sülh danışıqlarını pozmaq, problemin həllini dondurulmuş vəziyyətdə saxlamaq idi. Bu baxımdan Aİ-nın vasitəçiliyi ilə Azərbaycanla Ermənistan arasında münasibətlərin normallaşması üçün nəticəyönümlü müzakirələrin getdiyi bir vaxtda Ermənistanın yenidən hərbi təxribatlar törətməsi suallar yaradır. Azərbaycan haqlı olaraq bu hadisəni Ermənistanın ölkələr arasında delimitasiya komissiyalarının yaradılması və müvafiq işlərin aparılmasına qarşı yönəlmiş təxribatı kimi dəyərləndirir.

İndi Ermənistanın münasibətlərin normallaşması ilə bağlı müzakirələrin ruhuna uyğun davranmaqdan savayı yolu yoxdur. Çünki Azərbaycan özünün güclü mövqeyi ilə Ermənistana heç bir şans vermir. Təxribatların qarşısı isə "dəmir yumruq" tərəfindən hər zaman qətiyyətlə alınacaq.

Rəşad CƏFƏRLİ

Azərbaycan.- 2022.- 26 aprel.- S.1; 5.