COVID-19 sürətlə yayılmaqdadır

Simptomlardakı dəyişiklik virusun mutasiyasının nəticəsidir

İki ildən artıqdır həyatımıza daxil olan COVID-19-la mübarizə səngimir. Bu bəladan bütün dövlətlər həm maddi, həm də mənəvi ziyan çəkməkdə davam edirlər. Dünyanın böyük dövlətləri belə bu virusun qarşısında gücsüzdürlər.

İndi koronavirusa yoluxmuş şəxslərdə ən çox rast gəlinən simptom boğaz ağrısıdır. Digər xarakterik əlamətlər isə baş ağrısı, burun tıxanıqlığı və öskürəkdir. Əvvəllər bu xəstələrdə müşahidə edilən yüksək hərarət, iybilmə və dadbilmənin itməsi indi nadir hallarda ortaya çıxır. Xəstəliyin əsas əlamətləri səsin batması, asqırma, yorğunluq, əzələ ağrıları və başgicəllənmədir. Mütəxəssislər bildirirlər ki, pandemiyanın ortaya çıxmasından bu günədək COVID-19 simptomlarında daim dəyişiklik baş verib. Buna səbəb virusun mutasiyasıdır.

Son həftələr dünyada olduğu kimi Azərbaycanda da yoluxma halında ciddi artım müşahidə olunur. Virus hələ də yayılmağa davam edir. Ölkəmizdə yoluxanların sayı artıq 500-ü ötüb.

Qısa müddətdə dünyanı bürüyən, milyonlarla insanın yoluxmasına, hətta ölümünə səbəb olan COVID-19 pandemiyası ilə mübarizədə ən güclü silah yenə də peyvənd hesab edilir. Öz həyatını, yaxınlarını təhlükədən xilas etmək üçün hər bir vətəndaş vaksinasiya olunmalıdır. Vaksinasiyanın başladığı ilk günlərdə tərəddüd edənlər sonralar artıq bunun nə qədər vacib olduğunu anlamağa başlayıblar.

Vaksinasiyaya start verən Avropa İttifaqından bir ay sonra Azərbaycanda bu prosesə başlanılmış və faydası göz önündə olmuşdur. Azərbaycan peyvəndləmə səviyyəsi baxımından MDB ölkələri arasında lider mövqedədir. Ümumdünya Səhiyyə Təşkilatının COVID-19-la bağlı milli və beynəlxalq səviyyədə göstərdiyi ciddi səylərə görə, Azərbaycan hökumətinə dərin minnətdarlığını bildirməsi də təbii ki, ölkəmizdə bu sahədə görülən tədbirlərin uğurlu nəticəsidir. Azərbaycanda bu günə qədər vurulan vaksin dozalarının ümumi sayı 14 milyona yaxındır.

Son günlərdə yoluxanların sayında ciddi artım olsa da, ölkəmizdə vəziyyət nəzarət altındadır. Lakin buna baxmayaraq, hər birimiz üzərimizə düşən məsuliyyəti dərk etməli, ehtiyat tədbirlərini əldən verməməli və səhhətimizə qeyri-ciddi yanaşmamalıyıq. İzdihamlı yerlərdən, havalandırılması zəif olan qapalı məkanlardan uzaq durmalı və sosial məsafəni qorumalıyıq. Bu, mümkün olmadığı təqdirdə mütləq tibbi maskadan istifadə etməliyik.

Gün ərzində gigiyenik qaydalara riayət etmək, əlləri tez-tez sabunla yumaq və antiseptiklə dezinfeksiya etmək mütləqdir. Digər vacib amil isə immunitetin zəifləməsinin qarşısının alınmasıdır. Bunun üçün vitamin qəbuluna, gündəlik rasiona mövsümə uyğun meyvə və tərəvəzin əlavə edilməsinə xüsusi diqqət yetirilməlidir. Bu bəşəri bəlanın öhdəsindən yalnız birlikdə gələ bilərik.

Ülkər XASPOLADOVA

Azərbaycan.- 2022.- 7 avqust.- S.4.