Laçın yolu yalnız humanitar təyinatlıdır

Ermənistanın bu yoldan hərbi cinayətlər törətmək üçün istifadəsinə imkan verilməyəcək

Ermənistan tərəfi 2020-ci il 10 noyabr üçtərəfli Bəyanatının müddəalarını yerinə yetirmir. Üç ölkə liderinin sözügedən tarixdə imzaladığı bəyanatın dördüncü bəndinə zidd olaraq erməni silahlı qüvvələri hələ də Azərbaycan ərazilərindən çıxarılmayıb.

Sənədin doqquzuncu bəndi isə pozularaq bölgədə bütün nəqliyyat-kommunikasiya yollarının açılmasına maneçilik törədilir. Eləcə də Ermənistan tərəfindən Laçın yolundan həm hərbi təxribatlar, həm də qeyri-qanuni iqtisadi fəaliyyət üçün istifadə olunaraq üçtərəfli Bəyanatın altıncı bəndinə zidd fəaliyyət göstərilir.

Rusiya sülhməramlılarının müvəqqəti yerləşdiyi Azərbaycan ərazilərində separatçı rejimin "Qızılbulaq" qızıl və "Dəmirli" mis-molibden yataqlarının qanunsuz istismarını və Laçın yolu vasitəsilə sərvətlərimizin talanmasını həyata keçirməsi buna real nümunədir.

Laçın yolundan sui-istifadə edilməsinin qarşısı alınır

Vətən müharibəsinin qələbə ilə başa çatmasından sonra Azərbaycan Ermənistana münasibətlərin normallaşdırılması, sülhə nail olunması üçün təkmil sülh modeli təqdim edib. Həmçinin qalib Azərbaycan sülh sazişinin bağlanması istiqamətində böyük əzm və iradə nümayiş etdirib. Laçın avtomobil yolunun vaxtından xeyli əvvəl istifadəyə verilməsi də bunun bariz nümunələrindən biridir.

Lakin ötən müddət ərzində Ermənistan tərəfi 2020-ci il üçtərəfli Bəyanatında əks olunmuş və sonrakı bəyanatlarla bir daha təsdiq olunmuş öhdəliklərini pozmağa yönəlik davranışlar sərgiləyib, kommunikasiyaların açılmasını, sərhədlərin delimitasiyasını yubadıb, Birinci Qarabağ müharibəsində əsir düşmüş minlərlə azərbaycanlının taleyi və kütləvi məzarlıqlar haqda məlumat verməkdən yayınıb və s.

Eyni zamanda məlum olub ki, Ermənistan Laçın yolundan öz ölkəsində istehsal olunan minaları Rusiya sülhməramlılarının müvəqqəti yerləşdiyi Qarabağ iqtisadi rayonuna daşımaq və Azərbaycana qarşı təxribatlar törətmək məqsədilə istifadə edib. Belə ki, bu ilin avqustundan etibarən Azərbaycanın suveren ərazilərində 2021-ci ildə Ermənistanda istehsal olunmuş piyada əleyhinə 2728 mina aşkar edilib. Ermənistan istehsalı olan minalar yerləşdirilmiş sahə artıq Rusiya sülhməramlı kontingenti və Rusiya-Türkiyə Birgə Monitorinq Mərkəzinin rəhbərliyi, eləcə də Azərbaycanda akkreditə olunmuş səfirliklərin hərbi attaşeləri tərəfindən yoxlanılıb.

Bu barədə dekabrın 12-də Azərbaycan xarici işlər naziri Ceyhun Bayramov Avropa İttifaqı Şərq Tərəfdaşlığı Xarici İşlər Nazirlərinin görüşündə məlumat verərək bildirib ki, minaların Azərbaycan ərazisinə gətirilməsi yalnız humanitar məqsədlər üçün nəzərdə tutulan Laçın yolundan sui-istifadə edilməsidir.

Humanitar keçidə heç bir maneə yoxdur

Dekabrın 12-dən Şuşa-Laçın yolunda ekofəallarımız və QHT nümayəndələrimiz Rusiya Federasiyası sülhməramlı kontingentinin müvəqqəti yerləşdiyi Azərbaycan ərazilərində separatçı rejimin təbii sərvətlərimizi talamasına, ekologiyamıza qarşı terror törətməsinə, "Qızılbulaq" qızıl və "Dəmirli" mis-molibden yataqlarının qanunsuz istismarını həyata keçirməsinə qarşı etiraz edirlər. Vətəndaş cəmiyyətimizin üzvləri Azərbaycanın sözügedən ərazilərində təbii sərvətlərin qeyri-qanuni istismarının dayandırılmasını, bütün təbii sərvətlərin istismarının Azərbaycan Respublikası qanunvericiliyi əsasında həyata keçirilməli olduğunu bəyan edirlər.

Ekoloji hüquqların müdafiəsi sahəsində fəaliyyət göstərən qeyri-hökumət təşkilatlarının nümayəndələrinin, ictimai fəalların tələbləri arasında Şuşa-Laçın yolundan hərbi məqsədlər, minaların, silah-sursatın və talan olunan təbii sərvətlərin daşınması məqsədilə istifadə edilməsinə də son qoyulması var. Vətəndaş cəmiyyətinin nümayəndələri Laçın yolundan hərbi məqsədlər üçün deyil, üçtərəfli Bəyanatda razılaşdırıldığı kimi yalnız humanitar məqsədlər üçün istifadə edilməli olduğunu bildirirlər.

Rəsmi İrəvan isə hər zaman olduğu kimi, Azərbaycan ictimaiyyətinin haqlı narazılığını nümayiş etdirdiyi dinc etiraz aksiyası ilə bağlı qərəzli iddialar səsləndirır, guya Laçın yolunun bağlanması, bölgədə humanitar fəlakət yaşanması, etnik təmizlənmə həyata keçirilməsi barədə böhtan və yalan xarakterli məlumatlar yayır.

Lakin faktiki olaraq Şuşa-Laçın yolu Rusiya sülhməramlıları tərəfindən bağlanıb. Dekabrın 12-dən etibarən davam edən aksiya zamanı etirazçılar tərəfindən Laçın yolundan humanitar yükləri daşıyan avtomobillərin keçidinə heç bir maneçilik törədilməyib.

Bu isə, həm də onu göstərir ki, Azərbaycan vətəndaş cəmiyyətinin üzvlərinin, QHT nümayəndələrinin, ekofəalların və könüllülərin iştirakı ilə keçirilən dinc etiraz aksiyası sayəsində Laçın yolundan öz təyinatı üzrə, yalnız humanitar məqsədlərlə istifadə edilməsinə nail olunub. Başqa sözlə, daha Laçın yolunda erməni separatçılarının at oynatmasına, Azərbaycana qarşı təxribatlar törətməsinə imkan verilmir.

Yasəmən MUSAYEVA

Azərbaycan.- 2022.- 22 dekabr.- S.8.