Gənc rəssamın uğurları

Bakıda, Gənclər Günü münasibətilə keçirilən sərginin iştirakçılarındən biri də gənc rəssam Mətanət Novruzludur. Mətanət xanım bu sərgiyə “Gül”, “Oğlan” və digər əsərləri ilə qatılıb.

Mətanət rəssamlığa orta məktəb illərindən böyük həvəs göstərib. Çəkdiyi rəsmləri həmyaşıdları və valideynləri heyranlıqla qarşılayıb. Bakının Əhmədli qəsəbəsindəki 269 nömrəli orta məktəbin 4-cü sinfində oxuyarkən müəllimlərinin tövsiyəsi ilə valideynləri “balaca rəssamı” H.Z.Tağıyev adına kombinatın nəzdindəki rəssamlıq kursuna yazdırırlar. Mətanət burada dərslərini yaxşı oxumaqla, marağında olduğu peşənin çətinliklərinə həvəslə qatlanır. 4 il rəssamlığın ən incə sirlərini öyrənərək yaşıdlarından fərqli qabiliyyəti və duyumu sayəsində diqqətçəkən irəliləyişlər əldə edə bilir, kursu fərqlənmə diplomu ilə bitirir.

2010-cu ildə Respublika Milli Tarix muzeyində keçirilən sərgidə 11 yaşlı Mətanət Novruzlunun əl işləri münsiflər heyəti tərəfindən Fəxri fərmana layiq görülür.

Gənc rəssam bu illərdə milli bayramlarda və tarixi günlərdə paytaxtın müxtəlif ünvanlarında keçirilən rəsm sərgilərində fəallıqla iştirak edib. Onun hər il mayın 11-də keçirilən Gül bayramlarında iştirakı respublikanın Mədəniyyət və Turizm Nazirliyi tərəfindən qiymətləndirilir. Gənc rəssam 2012-ci il mayın 11-də Ümummilli Lider Heydər Əliyevin anadan olmasının 89-cu ildönümü münasibəti ilə təsviri və tətbiqi sənət ustalarının əl işlərindən ibarət sərgi-seminarda iştirakına görə Fəxri fərmanla mükafatlandırılır.

2013-cu ildə ailə Rusiyanın Krasnodar şəhərinə köçür. O, burada Memarlıq texnikumuna daxil olur. Bu illəri, Mətanətin özünün etirafına görə, rəssamlıq yaradıcılığında dönüş mərhələsi hesab etmək olar. Dediyinə görə, texnikumda çox ciddi və yüksək səviyyədə rəsm çəkmək qabiliyyəti tələb olunurdu: “Bu tələb məni ürəkdən sevdiyim rəssamlıq sənətinə daha möhkəm tellərlə bağladı. Bakıya qayıtdıqdan sonra davamlı olaraq rəsm çəkməklə məşğul oldum. Əsərlərim Yutubda izlənildikcə qürurlanırdım. Tanımadığım insanlardan gələn rəylər məni çox sevindirirdi. Bu ovqatla rəssam Araz Şahvələdovdan dərs aldım. Bu istiqamətdə elmi-nəzəri biliyimi artırmaq və sənətin dərinliklərinə baş vurmaq üçün Xəzər Universitetinin Dizayner fakültəsinə daxil oldum”.

Mətanət Novruzlu tələbəlik illərində də rəsm yaradıcılığı ilə ciddi məşğul olaraq internet vasitəsilə dünyanın bir çox ölkələrində tamaşaçı rəğbəti qazanır. İnstaqram səhifəsində xarici ölkələrdən sifarişlər gəlməyə başlayır. Bu sıradan o, ilk dəfə 2020-ci ildə Almanyadan ödənişli portret sifariş almışdır.

2 Fevral Gənclər Günü münasibətilə keçirilən rəsm əsərləri sərgisinin həmmüəlliflərindən olan 23 yaşlı gənc rəssam bildirdi ki, gələcəkdə böyük layihələrə imza atmaq fikrindədir: “Azərbaycanın bütün bölgələrində, dünyanın bir çox ölkələrində mənzillərin divarlarında rəsmlərimin asılmağı mənə qürur hissi yaşadır”.

Rəhman SALMANLI

Azərbaycan.- 2022.- 2 fevral.- S.13.