Milli Qəhrəmana həsr edilən filmin təqdimatı olub

Tovuzda “Nizami” adına Mədəniyyət evində Milli Qəhrəman Rafiq Alıcanovun xatirəsinə həsr olunmuş “Oğuz elinin qəhrəmanı” adlı filmin təqdimatı keçirilmişdir.

Təqdimat mərasimində idarə, müəssisə, təşkilat rəhbərləri, şəhid ailələri, gənclər, eləcə də ictimaiyyət nümayəndələri iştirak etmişlər.

Filmin nümayişindən sonra rejissor Kəmalə Musazadə çıxış edərək Mədəniyyət Nazirliyinin sifarişi ilə “Salnaməfilm” studiyasının “Azərbaycanın Milli qəhrəmanları” silsiləsi çərçivəsində 100-dən çox filmin çəkildiyini diqqətə çatdırmışdır. Kəmalə Musazadə onu da vurğulamışdır ki, o, bu filmdə qəhrəmanın həyatını, keçdiyi şərəfli döyüş yolunu, Vətənə olan bağlılığını, yurd, el-oba sevdalı olduğunu çatdırmağa çalışıb. Filmin 44 günlük Vətən müharibəsi ərəfəsində çəkildiyini bildirən müəllif əldə etdiyimiz şanlı Zəfərin həmin filmdə yer aldığını demiş, Milli Qəhrəmanın ailə üzvlərinin, yaxınlarının, doğmalarının, döyüş və sinif yoldaşlarının, müəllimlərinin Rafiq Alıcanov haqqında söylədikləri ürək sözlərinin, dəyərli fikirlərinin də filmdə yer aldığını diqqətə çatdırmışdır.

Çıxış edənlər qeyd etmişlər ki, vətənpərvərlik mövzusunda filmlərin ərsəyə gəlməsində, xüsusilə də Milli qəhrəmanlarımızın, şəhidlərimizin gələcək nəsillərə tanıdılmasında bu cür filmlərin böyük rolu və əhəmiyyəti var. Tədbirdə Milli Qəhrəman Rafiq Alıcanovun döyüş yoldaşları da öz ürək sözlərini söyləmişlər. Onlar Müzəffər Ali Baş Komandan İlham Əliyevin rəhbərliyi altında şanlı ordumuzun 44 günlük Vətən müharibəsində qazandığı tarixi qələbədən və bu qələbəni bizlərə bəxş edən şəhidlərimizdən söz açmışlar.

Sabir ƏLİYEV,

Azərbaycan.-2022.- 6 fevral.- S.5.