Şuşalı şair: Doğma Şuşama qovuşduğum üçün həyatımın ən xoşbəxt anlarını yaşayıram

1992-ci il mayın 10-da Şuşanı tərk etmişəm. Uzun illər Şuşanın həsrəti ilə yaşadım. Allaha dua edirdim ki, doğma torpağıma qovuşmadan dünyadan köçməyim. 2020-ci ilin noyabrın 8-də Ali Baş Komandanın verdiyi şad xəbər Şuşa nisgilimə son qoydu. Əhd eləmişdim ki, Şuşa alınandan sonra oraya ilk köçənlərdən olacağam. Əhdimə sadiq qaldım. Hazırda ailəmlə, nəvələrimlə Şuşada yaşayıram və buraya ən tez qayıdanlardan biriyəm. Doğma Şuşama qovuşduğum üçün həyatımın ən xoşbəxt anlarını yaşayıram.

Bu fikirləri AZƏRTAC-a müsahibəsində şair, yazar Şükür Həsənov deyib.

Şair bildirib ki, Şuşanın əvvəlki cah-cəlallı, çal-çağırlı vaxtlarını görmək onu ikiqat xoşbəxt edir: "Bir qələm əhli kimi Vaqif Poeziya Günlərinin yenidən keçirilməsi məni sevindirir. Uzun illər məlum səbəblərdən dolayı Şuşa şeirə, sənətə həsrət qaldı. Bir mədəniyyət beşiyi olan şəhər üçün bu, çox ağır mənzərədir. Şükür Allaha ki, azad Şuşamız ikinci dəfədir bu möhtəşəm tədbirə ev sahibliyi etdi. Qələm dostlarımı Şuşada qarşılamaq mənim üçün ifadə edilə bilməyəcək hisslərdir. Bu günü bizə yaşadan şəhidlərimizə Allahdan rəhmət, qazilərimizə cansağlığı arzu edirəm. Uca Yaradan Müzəffər Ali Baş Komandan və onun Rəşadətli Ordusunu qorusun. Əminliklə deyə bilərəm ki, şəhidlərimizin ruhu şaddır. Onların əziyyəti, qanı yerə qalmadı. Vətən fədailərinin ruhu əzəmətini geri qaytarmış Şuşa səmasından bizə baxıb gülümsəyir. Bundan sonra da işıqlı gələcəyin bizi gözlədiyinə, digər ərazilərimizin də tezliklə bərpa olunub doğma sakinlərinə qovuşacağına inanıram".

Azərbaycan.-2022.- 16 iyul.- S.8.