İdman paytaxtının "Formula-1" zirvəsi

Dünyadakı bütün "F-1" həvəskarlarının nəbzi Bakı ilə döyünür

İdman ölkəsinə çevrilən Azərbaycanda son onillikdə onlarca dünya və Avropa miqyaslı yarış keçirilib. Beynəlxalq idman federasiyalarının qərarları ilə turnirləri, idman müsabiqələrini layiqincə təşkil edən ölkəmiz hər dəfə tarixini möhtəşəm nailiyyətlərlə zənginləşdirib. Respublikamız təkcə yüksək evsahibliyi nümunəsi ortaya qoymayıb, həm də sübut edib ki, iradə, qətiyyət olan yerdə uğur qazanmaq mümkündür.

Bu günlər dünyanın idman aləminin diqqəti yenidən Azərbaycana yönəlib. Artıq iki gündür "Formula-1" yarışlarına start verilib və bu gün dünyadakı bütün avtomobil idmanı həvəskarlarının nəbzi Bakı ilə döyünəcək. Beləliklə, dünyada avtomobil həvəskarlarının əsas bayramı hesab edilən "Formula-1" Azərbaycan Qran-prisinə ölkəmizin evsahibliyi etməsinin qürur və sevincini yaşamaqdayıq. Belə bir möhtəşəm yarışın Bakıda keçirilməsi dünyaya növbəti dəfə azərbaycanlıların mehribanlığı, qonaqpərvərliyi, qədim tarixi, füsunkar təbiəti, mentaliteti, sürətlə inkişaf edən müasir ölkə ilə tanışlıq fürsəti verib.

"Formula-1" dairəvi və sürətli avtoyürüş üzrə dünya çempionatıdır. Hər il keçirilən bu yarışın müxtəlif şəhərlərdə Qran-pri mərhələləri təşkil olunur. Bu mərhələlərdə toplanan xallara əsasən pilotlar və komandalar ilin sonunda çempionluq titulu qazanırlar. Onu da qeyd edək ki, bolid adlandırılan müasir "Formula-1" avtomobilləri bir sıra özəllikləri ilə fərqlənir. Onlar təkadamlıq olur, üstəlik, sürücü yeri və təkərləri açıqdadır. Komandalar avtomobilləri özləri istehsal etsələr də, hər biri tanınmış avtomobil markalarının motorlarını, yağını və ya istehsal etdiyi digər detalları istifadə edirlər.

Builki "Formula-1" Qran-pri yarışlarına mart ayında Bəhreyndə start verilib. Pilotlar və komandalar noyabr ayına qədər 23 yarış mərhələsi keçməlidirlər. Hazırda isə yüz milyonlarla izləyici auditoriyasına malik olan "Formula-1" yarışlarının həyəcanı Azərbaycanda yaşanır. Bakı Şəhər Halqasında dünyanın ən məşhur pilotları - Luis Hamilton, Fernando Alonso, Sebastian Fettel, Valtteri Bottas və digərləri yarışırlar. Bu günlər planetimizdə avtomobil idmanına maraq göstərən hər kəsin diqqəti paytaxtımıza yönəlib.

Bakı Şəhər Halqasının, trekin uzunluğu 6 kilometrdən bir qədər artıqdır.

Bu, uzunluğuna görə dünyada ikincidir. Bakı Şəhər Halqası paytaxtımızın tam mərkəzindən və gözəl məkanlarından keçir. Təşkilatçılar trekin marşrutunu seçərkən məhz bu məqamı qarşıya məqsəd qoymuşdular.

Yarış bu gün başa çatsa da, Bakıda uzun müddətdən bəridir ki, bu idman hadisəsinin ab-havası yaşanır. Çünki hazırlıq işlərinə aylar öncədən başlanılıb. Məqsəd 2022-ci il üçün 8-ci olan və Azərbaycan Qran-prisini layiqincə təşkil etmək, ideal evsahibliyi nümunəsini növbəti dəfə nümayiş etdirməkdir. Fərəhli haldır ki, aparılan hazırlıq işlərini Beynəlxalq Avtomobil Federasiyasının rəsmiləri, o cümlədən yarışda iştirak edən pilotlar təqdir ediblər. Beləliklə, bu günlərdə bir daha bütün dünya və ölkəmizə təşrif buyuran xarici qonaqlar Azərbaycanın yüksək evsahibliyinin şahidi olmaqdadır.

Bakıya gələn hər kəs Azərbaycanın inkişafını, xalqımızın qonaqpərvərliyini, zəngin mədəniyyətini gözləri ilə görür, bunları təqdir edir. Bütövlükdə bu mötəbər tədbir ölkəmizi növbəti dəfə beynəlxalq aləmə daha yaxından tanıdır. Hər kəs Azərbaycanda keçirilən sürət yarışına hazırlıq işlərinin yüksək səviyyədə aparıldığının şahidinə çevrilir. Bunu start verilən ilk yarış günündə aydın şəkildə görmək olurdu. İlk növbədə Azneft dairəsindən Dəniz vağzalına kimi qurulan əyləncə zonaları bilet sahiblərinin üzünə qapılarını açıb. Dünəndən etibarən tamaşaçılar onlar üçün qurulmuş möhtəşəm əyləncə məkanlarından istifadə edirlər. Tədbirlər hər kəs üçün inanılmaz dərəcədə maraqlı və unudulmayacaq məqamlarla yadda qalır.

"Formula-1"in dünyada kifayət qədər azarkeşi var. Bakı Şəhər Halqasında da tamaşaçıların yarışı canlı və təhlükəsiz izləmələrinə hər cür imkan yaradılıb. Bunun üçün Bakı Şəhər Halqasının müxtəlif yerlərində tamaşaçı tribunaları quraşdırılıb. Həmin tribunalar yüksək səviyyədə quraşdırılıb.

Bütün dünyada "Formula-1" Azərbaycan mərhələsini 190 ölkədən 500 milyondan artıq tamaşaçı izləyir. Bu göstərici ilə "Formula-1" azarkeş sayının çoxluğuna görə futboldan sonra ikinci idman növü sayılır. Bu mötəbər yarışın yüksək səviyyədə işıqlandırılması üçün müxtəlif ölkələrdən təcrübəli müxbir və fotoqraflar cəlb edilib. Tək yarışın keçirilməsi deyil, qonaqların, tamaşaçıların ölkəmizlə, milli dəyərlərimizlə tanışlığı, şəhərimizdə olduğu günlərdə vaxtlarını səmərəli keçirmələri üçün yaradılan şərait, dünyada sevilən populyar müğənnilərin iştirakı ilə konsert proqramlarının təşkili Azərbaycanın mükəmməl evsahibliyi nümunəsinin ayrı-ayrı hissələridir. Beləliklə, Azərbaycan yüksək təşkilatçılıq ənənəsinə bu dəfə də sadiq qalıb.

Azərbaycan yenidən dünya idmansevərlərinin diqqət mərkəzindədir. Ölkəmizə bu münasibətlə gələn qonaqlar, habelə paytaxt sakinləri yarışları canlı şəkildə izləyə bilirlər. Şübhə yoxdur ki, bu yarışlar insanlara uzun müddət xatırlanacaq həyəcanlı və sevincli dəqiqələr bəxş edəcək. Başqa cür ola da bilməz. Çünki bu yarışların təşkilatçısı regionun idman mərkəzi olan Azərbaycan dövlətidir.

Elçin CƏFƏROV,

Azərbaycan.-2022.- 12 iyun.- S.4.