Gəncə Dövlət Dram Teatrının yeni binasında ilk tamaşa nümayiş etdirilmişdir

Milli Teatr Günü münasibəti ilə Gəncə Dövlət Dram Teatrının yeni binasında “Cavad xan” tarixi dramı nümayiş etdirilmişdir.

Tamaşadan əvvəl Gəncə Dövlət Dram Teatrının yeni binasına, eləcə də teatrın muzeyinə baxış keçirilmişdir. Qeyd edilmişdir ki, 2014-cü ildə Prezident İlham Əliyevin iştirakı ilə təməli qoyulan Gəncə Dövlət Dram Teatrının yeni binasında 478 yerlik böyük tamaşaçı zalı, 22 yerlik lojalar və 120 yerlik kiçik tamaşaçı zalı var. Yeddimərtəbəli binada həmçinin iki zaldan, 135 eksponat və rəsm əsərlərindən ibarət Gəncə Teatr Muzeyi, zəngin kitabxana, xoreoqrafiya zalı, qrim otaqları, mehmanxana, kafe və digər zəruri infrastruktur yaradılıb. Teatrın yeni binasında tamaşaların nümayişi üçün müasir texniki şərait təmin edilib, yaradıcı heyətin məşqləri ilə bağlı bütün məqamlar nəzərə alınıb.

Sonra “Cavad xan” tarixi dramı nümayiş olunub. Tamaşa Gəncənin sonuncu xanı Cavad xanın yurduna olan bağlılığından, Gəncənin tarixindəki xidmətlərindən, azadlıq uğrunda işğalçılara qarşı apardığı mübarizədən bəhs edir.

Əsərin müəllifi yazıçı-jurnalist Nüşabə Əsəd Məmmədlidir. Tamaşanın quruluşçu rejissoru Əməkdar incəsənət xadimi Əsgər Əsgərov, rejissoru Elşad Əhmədov, quruluşçu rəssamı Mirzə Mehdi, musiqi tərtibatı Sevda Əliyeva, rejissor assistenti Nişanə Qurbanovadır. Baş rollarda Xalq artisti Pərvanə Qurbanova və Əməkdar artist Elxan Yunis, həmçinin Əməkdar artistlər İlham Hüseynov, Ramiz Vəliyev, Novruz Cəfərov, Salamulla İsmayılov, aktyorlar Yusif Cəfərov, Samir Abbasov, Murad Meyfəliyev, Şahmar Məmmədov və başqaları çıxış ediblər.

Sabir ƏLİYEV

Azərbaycan.- 2022.- 13 mart.- S.5.