Şəkərli kəndinin igid oğlu
Salyanın Şəkərli kəndi. Burada bağlı-bağatlı
bir ev
var. O ev ki, orada 1989-cu il noyabr ayının 17-də
Misir kişinin ailəsində bir oğlan uşağı dünyaya göz açıb. Ailənin ilk övladı olduğu
üçün adını
da İlkin qoyublar.
İllərin qanadında böyüyüb
məktəb yaşına
çatıb. İlkin 1996-cı ildə kəndlərindəki məktəbin
birinci sinfinə gedib və 2007-ci ildə orta təhsilini başa vurub. Anası Mehparə Nəcəfovanın
dediklərindən: "Hələ
uşaq ikən harda səliqəli geyimdə əsgər, zabit şəkli görsəydi, onu kəsib götürər,
bir yerə yığardı. Hiss olunurdu
ki, hərbçilərə
böyük marağı
var. Hərdən fikrimdən
keçir ki, o vaxt indiki kimi
bazar-dükanda uşaqlar
üçün həbçi
geyimləri satsaydılar,
bizə özü üçün onlardan aldırardı. Sən demə, bu maraq gələcəkdə
hərbçi olacağının
təməli imiş".
İlkin
Nəcəfov orta təhsilini başa çatdırıb sənədlərini
Heydər Əliyev adına Ali Hərbi
Məktəbə verir
və qəbul olunur. 2007 - 2011-ci illərdə
həmin məktəbdə
təhsil alır. 2011-2012-ci illərdə isə zabitlik kursunda təhsil alaraq bilik və
bacarığını daha
da təkmilləşdirir.
Bundan sonra baş leytenant rütbəsində
Tərtər rayonundakı
"N" saylı hərbi
hissədə xidmətə
başlayır.
İlkin bir zabit olaraq
özünə qarşı
çox tələbkarlıqla
yanaşır, komandirlərin
tapşırıqlarını vaxtında və dəqiq yerinə yetirirdi. Fiziki və mənəvi
cəhətdən möhkəm
olmaq üçün
idmanla da məşğul olurdu.
Bilirdi ki, qisas qiyamətə
qalmayacaq, bir gün gələcək, erməni işğalçıları
nəyin bahasına olursa-olsun Qarabağ və Şərqi Zəngəzur torpaqlarından
qovulub çıxarılacaq.
İlkin Lələtəpə yüksəkliyi uğrunda gedən döyüşlərin iştirakçısı idi. Hərb tariximizdə xüsusi yeri olan bu döyüşdə qəhrəman əsgər və zabitlərimiz Azərbaycan Ordusunun nəyə qadir olduğunu göstərərək üçrəngli bayrağımızı Lələtəpə zirvəsinə taxdılar. Döyüş başa çatdıqdan sonra İlkin yenidən xidmət etdiyi hərbi hissəyə qayıtdı. Lakin bilirdi ki, əsl döyüşlər hələ qarşıdadır. Yeri gəlmişkən qeyd edək ki, Aprel döyüşlərindəki igidliyinə və Silahlı Qüvvələr Günü münasibətilə ona fəxri fərman və kapitan rütbəsi verilmişdir. Bu diqqət gənc zabitin məsuliyyət hissini daha da artırmışdır.
27 sentyabr 2020-ci il. Hərbi hissələrimiz bütün istiqamətlərdə - qurudan və havadan ildırım sürətilə hücuma keçməyə başlayır. Mənfur düşmən başına yağan güllə və mərmilərin təsirindən şoka düşür. Ağıllarına belə gətirə bilmədikləri həmlələr onları çaş-baş salır. Ovaxtadək özlərini qalib hesab edən ermənilər dabanlarına tüpürüb üzü İrəvana tərəf qaçırlar. Keçilməz saydıqları "Ohanyan səddi" darmadağın edilir. Düşmənin külli miqdarda hərbi sursatı və texnikası qənimət götürülür.
Gedən qızğın döyüşlərdə kapitan İlkin Nəcəfov da ön sıralarda idi. Təəssüf ki, oktyabrın 17-də Hadrut qəsəbəsi istiqamətində gedən döyüşlərdə həlak oldu. İlkin doğulduğu Şəkərli kəndində torpağa tapşırılmışdır. Rayon rəhbərliyi, inzibati orqanların, hərbi komissarlığın nümayəndələri, kənd sakinlərinin iştirak etdikləri dəfn mərasimində müəllimləri, sinif yoldaşları, dostları İlkinin keçdiyi həyat yolundan, onun necə bir gənc olduğundan, Vətənini necə bir məhəbbətlə sevdiyindən danışdılar.
Vətən müharibəsində təxminən 3 min şəhid vermişik. Onlardan 60 nəfəri Salyandandır. Kapitan İlkin Nəcəfov isə onlardan biridir. O, ölümündən sonra "Vətən uğrunda", "Füzulinin azad olunmasına görə" və "Cəsur döyüşçü" medalları ilə təltif edilmişdir.
Şəhid kapitanın bir oğul yadigarı qalıb. Ailəsi bütün şəhidlərimiz kimi, dövlət tərəfindən hər cür qayğıkeşliklə əhatə olunmuşdur.
Bu günlər şəhidin ata evinə baş çəkdik. Bizi həyət qapısında atası Misir kişi qarşıladı. Həyətində, evində səliqə-sahman vardı. Hiss olunurdu ki, bu ərəfədə qonağı çoxdur. Oturduğumuz otağın baş tərəfində şəhid İlkin Nəcəfovun müxtəlif şəkilləri olan guşə nəzərimizi cəlb edir. Şəhidin iki il əvvəl geydiyi hərbi forma, mobil telefonu və digər əşyalarına baxırıq. Bütün gördüklərimiz, eşitdiklərimiz və şəhid haqqında apardığımız araşdırmalar insanı duyğulandırmaya bilmir və ürəyimizdən keçənlər öz-özünə misralara çevrilir:
Siz ey Vətən yolunda şirin canından keçib,
İgidliyi, mərdliyi özünə
amal seçib,
Ömrün bahar çağında
həyatdan erkən köçüb,
Ölümüylə bu yurdu, torpağı yaşadanlar!
Yaşayan hər ömürdə
canınız, qanınız
var!
Bir ata övladından el oğluna döndünüz,
Kim deyir ki, öldünüz,
kim deyir
ki, söndünüz?!
Gələcək nəsillərə yetəcəkdir
ününüz.
Siz bu gün də,
sabah da
- əsrlərlə sağsınız!
Bu yurdun sinəsində vüqarsınız, dağsınız!
Seyran CAVADOV,
Azərbaycan.-2022.- 17 noyabr.- S.8.