Əbədiyyət ünvanlı şəhidlər

Daha səksən gənc sənin müqəddəsliyin uğrunda gözünü qırpmadan canını fəda etdi, Vətən. Ərazilərin yenidən düşmən tapdağına çevrilməsin deyə şəhid oldular. Onlar da sənin azadlığın, suverenliyin naminə canından keçənlərin, ünvanı əbədiyyət olanların sıralarına qoşuldular.

Gözlərimizdə yaşa, ürəyimizdə nisgilə,

qüssəyə çevrilən şəhid xəbərləri aldıq

Şəhidlərin doğmalarını odsuz-ocaqsız yandırdı bu xəbərlər. Bir evdən, bir ocaqdan, bir ailədən gedən oğullar, təkcə bir evin, bir ocağın, bir ailənin yox, Vətən, sənin hər yurdunun şəhid oğullarına döndülər. Səksən igidin şəhid olması xəbərləri gözlərdə yaşa, qəhərə döndü, ürəklərdə nisgilə, hüznə çevrildi.

Çox gəncdilər axı... Onların boylarını oxşamalı əllər tabutlarına uzandı, o tabutların bürünüb gətirildiyi üçrəngli bayraqlara titrəyə-titrəyə sığal çəkdi doğmaları...

Üçrəngli bayrağın kölgəsində mən

Qaraca torpağı vətən görmüşəm.

Zəfər güllərini dövri-qədimdən

Bayraq işığında bitən görmüşəm.

Bayraq mənliyimdir, bayraq kimliyim,

Bayraq - öz yurduma öz hakimliyim.

- deyib əzizləmişdi bu müqəddəs üçrəngli bayrağı bir zamanlar şair Bəxtiyar Vahabzadə. Bu il sentyabrın 12-si gecəsindən başlayan Ermənistan silahlı qüvvələrinin genişmiqyaslı təxribatının qarşısını alarkən şəhid olan daha 80 oğlun isə sənin qaraca torpağını Vətən etmək naminə ata-analarının, həyat yoldaşlarının, övladlarının yanına sağ-salamat qayıtmadılar.

Atalar şəhid oğullarının cənazəsi yanında donub qaldılar. Dünyanın ən ağır dərdi yükləndi çiyinlərinə... Övladlarını öz əlləri ilə torpağa tapşırırdılar. O səksən şəhiddən birinin - Azərbaycan Sərhəd Qoşunlarının hərbi qulluqçusu, kiçik gizir Elşən Babazadənin atası Sahib kişi: "Adətdə görmüşük ki, ata oğlun çiynində gedir, amma mən bu gün onu çiynimdə gətirib dəfn etdim", - deyib hər kəsin qəlbini dağladı. Sentyabrın 12-si gecəsindən başlayaraq Ermənistan silahlı qüvvələrinin Azərbaycanla dövlət sərhədinin Daşkəsən, Kəlbəcər və Laçın istiqamətlərində törətdiyi təxribatının qarşısını alarkən şəhid olan Elşən Babazadənin atası bütün şəhid atalarının dərdini ifadə etdi...

Atalar, analar "Vətən sağ olsun!" dedilər

Şəhidlərimizin yaxınlarının ən böyük təsəllisi odur ki, Ermənistan silahlı qüvvələri yenidən məğlubiyyətə uğradı. Və nə qədər ki, onların oğulları kimi qəhrəmanlarımız var, yağı düşmənlər Azərbaycanın ərazilərində bir daha meydan sulaya, insanlığa sığmayan vandal əməllərini həyata keçirə bilməyəcəklər. Bir də təsəlliləri odur ki, şəhidlərimizin qanı yerdə qalmadı. Yoldaşları şəhidlərimizin qisasını döyüş meydanında aldılar.

Yağı düşmənə aman verməyən oğullarla fəxr etdi, onların cəsarəti, şücaəti, qəhrəmanlığı ilə qürur duydu bütün Azərbaycan. Zəhmətlə, əziyyətlə böyütdüyü, böyük arzularla boya-başa çatdırdığı, gələcəyinə ümidlər bəslədiyi gənc övladını torpağa tapşıran şəhid ataları, şəhid anaları da "Vətən sağ olsun!" dedilər.

Təki sən yaşa, Vətən!

"Dünya şirin, can şirindir", - deyirlər. İnsan hansı yaşda olursa-olsun bu dünyadan doymur. Gənc yaşında ölümün üstünə gedən oğullar isə sübut edirlər ki, Vətən candan şirindir. Xalqımız Vətəninə, torpağına bağlı qəhrəmanlar yetişdirən xalqdır. İgid oğullarımız bu cəsarəti, əzmi, mübarizliyi 2016-cı ilin Aprel döyüşləri zamanı da bütün dünyaya nümayiş etdirdilər. O zaman da Ermənistan silahlı qüvvələrinin təxribatının qarşısını alarkən canından keçən nə qədər mərd oğlumuz sənin yolunda canından keçdi, Vətən. Həmin gün onlar düşməni bir addım da irəli buraxmamaq üçün son damla qanlarına kimi vuruşdular. Qorxu duymadan, ürəklərində Azərbaycana sonsuz sevgi ilə qəhrəmancasına döyüşüb şəhid olan igidlərimiz bir daha sübut etdilər ki, bu xalqın qəhrəmanları yüzlərlə, minlərlə, milyonlarladır.

2020-ci ilin iyulunda Ermənistan-Azərbaycan dövlət sərhədinin Tovuz istiqamətində artilleriya atəşi nəticəsində hərbçilərimiz və bir mülki şəxs həyatını itirdi. O zaman da ilk atəşi açan Ermənistan tərəf oldu. Azərbaycan düşmənə layiqli cavabını verdi. Ermənistan silahlı qüvvələrinin Azərbaycanın ərazilərini işğal etmək arzuları yenə də gözlərində qaldı.

Həmin ilin - 2020-ci ilin 27 sentyabrı səhəri Ermənistan silahlı qüvvələri bir neçə istiqamətdən müxtəlif növ silahlardan, o cümlədən ağır artilleriyadan istifadə edərək yaşayış məntəqələrimizi, eyni zamanda hərbi mövqelərimizi atəşə tutdular. Həmin gün də düşmən atəşi nəticəsində mülki əhali və hərbçilərimiz arasında itkilər, yaralananlar oldu. Qəhrəman Azərbaycan Ordusu düşmənin hərbi mövqelərinə atəşlər, zərbələr endirməklə cavab verdi. Azərbaycan Prezidenti, Silahlı Qüvvələrin Ali Baş Komandanı İlham Əliyev qismən səfərbərlik elan etdi. Minlərlə igid azərbaycanlı könüllü cəbhəyə yollandı. 44 gün davam edən Vətən müharibəsinin hər gününü zəfər salnaməmizə çevirdi qəhrəman oğullarımız. Təcavüzkar Ermənistanın silahlı qüvvələrini ərazilərimizdən qovdu Azərbaycanın igid döyüşçüləri. Vətən müharibəsində də iki min doqquz yüz yeddi döyüşçümüz şəhid oldu.

Vətən müharibəsində biabırçı məğlubiyyətindən dərs almayan Ermənistan məkrindən, təcavüzkarlıq siyasətindən əl çəkmədikcə rəşadətli Azərbaycan Ordusunun cavabı da ağır, sarsıdıcı olacaq. Bunu Ermənistan silahlı qüvvələrinin sentyabrın 12-si gecəsindən başlayan genişmiqyaslı təxribatının nəticələri bir daha göstərdi. Düşmən layiq olduğu cavabı aldı. Ermənistan əmin olmalıdır ki, Azərbaycandan bir daha torpaq qoparmağı mümkünsüzdür.

Təcavüzkar Ermənistan silahlı qüvvələrinə növbəti məğlubiyyəti yaşadan daha səksən igidin nakam köçdü bu dünyadan, Vətən. Daha səksən qəhrəman oğlunun ünvanı əbədiyyət oldu. Onlar sən yaşayasan, güclü, məğlubedilməz olasan deyə, şəhidlik zirvəsinə ucaldılar.

Zöhrə FƏRƏCOVA

Azərbaycan.- 2022.- 20 sentyabr.- S.8.