Ermənistanın hərbi-siyasi rəhbərliyinin Azərbaycanın təkliflərini qəbul etməsindən başqa yolu yoxdur

Şəhidlik mənəvi böyüklükdür. İlahi sevgi, Allaha bağlılıqdır. Bir də bitib-tükənməyən Vətən sevgisidir. Vətənə sədaqət, dövlətə inam deməkdir.

Şəhidlər içlərində ölümü öldürərək, qorxunu yenərək, dünyəvi hisslərə qalib gələrək şəhadətə yüksələ bilən qəhrəmanlardır. Yalnız vətəni canından, vətən sevgisini yar sevgisindən, torpağı ana qucağından üstün tutanlar şəhidlik yolunu seçə bilirlər.

Bir gözümüz ağladı, bir gözümüz güldü. Yenə düşmən təxribatı, yenə qan-qada... 30 il müstəqilliyimizi istəməyən, iqtisadi inkişafımızı gözü götürməyən qüvvələr ölkəmizi müharibəyə cəlb etdilər. Əvvəllər istədiklərinə müvəqqəti də olsa nail olan, torpaqlarımızı işğal edib, əhalimizi dədə-baba yurdlarından dərbədər salan ermənilər anlamadılar ki, bir gün bunun hesabını verəcəklər.

Dişi qana batmış düşmən müvəqqəti qələbəsindən ruhlanaraq daha da azğınlaşmağa başlamışdı. Yeni torpaq iddiaları, hər gün atəşkəsi pozmaları adət halını almışdı... Sülh danışıqları, beynəlxalq təşkilatların vasitəçilik missiyası acı bağırsaq kimi uzanırdı... Düşmən Azərbaycan Ordusunun gücünü görməzdən gəlirdi. Amma hər şeyin bir sərhədi, bir sonu olur. Nəhayət, 2020-ci ilin 27 sentyabrı erməni azğınlığının sonunu yetirdi. Yeni ərazi işğal etmək niyyətinə düşmüş düşmənin dişləri elə ilk andaca qırıldı. Qüdrətli Azərbaycan Ordusu düşmənin başına od ələyərək əks-hücum əməlyyatına başladı. 30 ildə qurduqları istehkamlar, işğal etdikləri ərazilər erməni ordusuna əsl məzar oldu. Ən müasir silahlarla silahlanıb, təlim görmüş azərbaycan əsgərinin əks-hücum əməliyyatı bu dəfə olduqca amansız oldu. Ordumuzun qarşısında düruş gətirə bilməyəcəyini anlayan duşmən silah-sursatını atıb qaçmağa başladı. Düşmən qarşımızda aman diləmək, yalvarmaq, diz çökmək məcburiyyətində qaldı. Qüdrətli Azərbaycan Ordusunun gücü, Azərbaycan əsgərinin döyüş əzmi, Azərbaycan Prezidentinin qətiyyəti onları buna məcbur etdi.

Hiyləgərlik, yaltaqlıq ermənilərin xislətindədir. 44 günlük müharibədə rəzil günə düşmüş Ermənistan rəhbərliyi Azərbaycan Ordusuna silahla, güclə qalib gələ bilməyəcəyini anladı. Ermənilərin döymədiyi qapı qalmadı... Nəhayət, Rusiya Federasiyası Prezidentinin vasitəçiliyi ilə 10 noyabrda üçtərəfli Bəyanat imzalandı. Ermənistan rəhbərliyi bu bəyanatı imzalamaqla qütdrətli Azərbaycan Ordusunun qarşısından qaçıb rəzil duruma düşmüş hərbçilərini tamamilə məhv olmaqdan xilas etdi... Bunu müxtəlif zamanlarda, müxtəlif kürsülərdən Ermənistanın baş naziri Nikol Paşinyan etiraf etdi.

Təəssüf ki, sonradan Ermənistan rəhbərliyi xoş niyyətimizi dəyərləndirmədi. Üçtərəfli Bəyanatdan irəli gələn şərtləri yerinə yetirməkdənsə erməni məkrinə əl atdı. Az bir vaxtda danışıqlarda yenə səmimi olmadıqları, erməni xisləti özünü göstərdi. Onlar sülh danışıqları getdiyi bir vaxtda revanş götürmək niyyətinə düşdülər. Sərhədimizə yenidən qoşun toplayıb xaincəsinə torpaqlarımıza basqın etdilər. Anlamadılar ki, yenidən qan tökməklə heç nəyə nail ola bilməyəcəklər. Məqsədləri bu dəfə müharibəni Ermənistan ərazisinə keçirib dünyanı, KTMT-yə üzv olan dövlətləri üstümüzə qaldırmaq idi. Amma bu dəfə də ermənilər öz oyunlarına özləri düşdülər. Sərhəddə cəmlədikləri canlı qüvvə, döyüş texnikası, qurduqları istehkamlar ordumuz tərəfindən darmadağın edildi. İqtisadi cəhətdən yoxsulluğun məngənəsində çırpınan Ermənistana yenidən külli miqdarda maddi ziyan dəydi. Digər tərəfdən də, Ermənistan hərbi-siyasi rəhbərliyi üzv olduqları KTMT-dən gözlədiyi dəstəyi ala bilmədi, geriyə əliboş döndü.

Bəzən düşünürsən ki, sanki bu təxribat özünü yazıq göstərib ağlamaq, böyük dövlətlərin, nüfuzlu beynəlxalq təşkilatların qapısını döyüb yalvarmaq, gözyaşı axıtmaq üçün Ermənistan rəhbərliyinə lazımdır. Ermənistan həmişə özgənin, havadarlarının gücünə arxalanıb. Anlamaq istəməyiblər ki, özgəyə ümid edən şamsız qalar... Necə ki, Ermənistan rəhbərliyi öz ölkəsini salıb çıxılmaz duruma. Ermənistanın ağır vəziyyətdən yeganə çıxış yolu Azərbaycan rəhbərinin onlara təklif etdiyi 5 bəndlik sülh sazişinə əməl etməkdir. Başqa çarəsi yoxdur. Nə qədər ki, bu gerçəkliyi anlamayacaqlar, erməni analarının gözü yaşlı qalacaq.

Ermənistan gec-tez dərk etməlidir ki, Azərbaycan sərhədlərini qanı ilə tarix yazan qüdrətli Azərbaycan Ordusu qoruyur. O ordu ki, 30 illik zülmü 44 gündə aradan qaldırıb. O ordu ki, əsgərləri Vətən üçün şəhid olmağı hər zaman özlərinə şərəf sayıblar.

Elşən QƏNİYEV,

Azərbaycan.-2022.- 29 sentyabr.- S.9.