Azərbaycan 2022-ci ilə yüksəlişlə, həmrəyliklə, quruculuqla qədəm qoydu

Geridə qoyduğumuz 2021-ci il dünyada müxtəlif hadisələrlə, əsasən də koronavirus pandemiyasının hələ də davam etməsi ilə yadda qaldı. Bununla yanaşı, hər bir dövlət ötən ili bir-birindən fərqli ab-havada başa vurdu. Bir qisim ölkələr ədalətsiz münaqişələrin, terrorun ağrı-acısını, bəziləri isə siyasi və iqtisadi problemlərin çətinliklərini yaşadı. Əlbəttə, 2021-ci ili nikbin notlarla, uğurlarla başa vuranlar da oldu.

İlham ƏLİYEV: “İl ərzində qarşımıza qoyduğumuz bütün məqsədlərə çatdıq”

Azərbaycanda 2021-ci il, sözün əsl mənasında, nailiyyətlərlə zəngin, uğurlarla əlamətdar olan növbəti dövr kimi tarixə qovuşdu. Xüsusilə qeyd edilməlidir ki, 2020-ci ildə Vətən müharibəsində qazanılan Zəfər, torpaqlarımızın işğaldan azad edilməsi 2021-ci ildə respublikamızda gedən bütün proseslərə əhəmiyyətli dərəcədə təsir göstərdi, cəmiyyətimizə xoş ovqat bəxş etdi. Ən əsası da odur ki, bu savaşda qazanılan qələbə ötən il Qarabağ və Şərqi Zəngəzurda genişmiqyaslı quruculuq işlərinin həyata keçirilməsi ilə davam etdi. Dünya Azərbaycanlılarının Həmrəyliyi Günü və Yeni il münasibətilə xalqa müraciətində Prezident İlham Əliyev bildirmişdir ki, 2021-ci il ölkəmiz üçün uğurlu il olmuşdur: “2021-ci il arxada qaldı. 2021-ci il ölkəmiz üçün uğurlu il olmuşdur. İl ərzində qarşımıza qoyduğumuz bütün məqsədlərə çatdıq. Azərbaycan uğurla inkişaf etdi və bu gün daha güclü Azərbaycan dünyada tanınır”.

2021-ci ilin Azərbaycan üçün ən mühüm uğur göstəricilərindən biri ölkəmizin beynəlxalq münasibətlər sistemində mövqelərinin möhkəmləndirməsi, milli maraqlarını layiqincə təmin etməsidir. Eyni zamanda Azərbaycan Qoşulmama Hərəkatının sədri kimi bu quruma üzv olan bütün ölkələrin də maraqlarını layiqincə müdafiə etdi. Bunun nəticəsidir ki, bu təşkilata üzv dövlətlər tərəfindən yekdilliklə Azərbaycanın təşkilata sədrliyi daha bir il uzadıldı.

Azərbaycanın ötən il ərzində ən böyük uğurlarından biri isə Vətən müharibəsindəki zəfərimizin bütün beynəlxalq təşkilatlar və dövlətlər tərəfindən qəbul olunmasıdır. Prezident İlham Əliyevin ötən ilin dekabr ayında Brüsselə səfəri zamanı keçirdiyi görüşlər də bunu təsdiq etdi. Brüsseldə Prezident İlham Əliyevin iştirakı ilə keçirilən NATO-nun Şimali Atlantika Şurasının iclasında NATO-ya üzv dövlətlər tərəfindən ölkəmizin ərazi bütövlüyünə, suverenliyinə, beynəlxalq səviyyədə tanınmış sərhədlərinin toxunulmazlığına bir daha dəstək ifadə olundu. Bu mövqenin NATO-nun sammit sənədlərində də dəfələrlə təsbit olunduğu qeyd edilib.

Qarabağ və Şərqi Zəngəzurda genişmiqyaslı bərpa işləri davam edir

2021-ci ilin respublikamız üçün əsas göstəricilərindən biri işğaldan azad olunmuş ərazilərimizin bərpası istiqamətində genişmiqyaslı işlərin həyata keçirilməsi oldu. Ötən ilin Vətən müharibəsi günlərindən başlayan bu proses 2021-ci il ərzində də Prezident İlham Əliyevin xüsusi nəzarəti altında sürətlə davam etdi. Xatırladaq ki, Prezident İlham Əliyev ötən il Azərbaycanın bölgələrinə 47 dəfə səfər edib və bunların 32-si işğaldan azad edilmiş ərazilərə olan səfərlərdir. Bu fakt bir daha göstərir ki, Qarabağ və Şərqi Zəngəzurun yenidən qurulması il ərzində dövlət başçısının xüsusi diqqət mərkəzində olub.

2021-ci il infrastruktur layihələrinin bir qisminin icrası qısa vaxtda ən yüksək səviyyədə başa çatdı. Şuşaya çəkilən Zəfər yolu, Füzuli Beynəlxalq Hava Limanı istismara verildi. Bu cür mürəkkəb və böyük infrastruktur layihələrinin qısa müddətdə yerinə yetirilməsi Prezident, Müzəffər Ali Baş Komandan İlham Əliyevin siyasi iradəsinin təcəssümü kimi tarixə düşdü. İlham Əliyevin xalqa müraciətində qeyd etdiyi kimi, dünya müharibələrinin tarixində savaşdan sonra bu sürətlə heç bir yerdə quruculuq-bərpa işləri aparılmayıb.

2021-ci il həm də iqtisadi artımla başa çatdı

Ötən il dünyada cərəyan edən pandemiya şəraitində Azərbaycan iqtisadiyyatı artım dinamikasına köklənməklə mühüm göstəricilərə imza atıb. Azərbaycan iqtisadiyyatı 2021-ci ilin 11 ayında 5,3 faiz, qeyri-neft iqtisadiyyatı 6,4 faiz, sənaye istehsalı 5,5 faiz, qeyri-neft sektorunda sənaye 20,7 faiz artıb. Valyuta ehtiyatlarımızda artım 2,2 milyard dollar təşkil edib. Azərbaycanın ticarət əlaqələrinin müsbət saldosu 9,4 milyard dollar olub. “Bu göstəricilərlə hər bir ölkə öyünə bilər. Amma bizim üçün bu, təbiidir. Çünki Azərbaycan xalqı görür ki, uzunmüddətli, düzgün strategiyanın həyata keçirilməsi nəticəsində iqtisadi inkişaf göz önündədir”, - deyə Prezident İlham Əliyev bildirib.

2022-ci il yanvarın 1-dən isə maaşlar, pensiyalar, təqaüdlər əhəmiyyətli dərəcədə artırılıb. İki milyon yüz min insanı əhatə edən bu sosial paketin ümumi həcmi 1,5 milyard manatdır. Bütün bunlar respublikamızda gedən düzgün iqtisadi proseslərin və islahatların məntiqi nəticəsidir. Makroiqtisadi uğurlar həm də ondan xəbər verir ki, Azərbaycan pandemiyanın yaratdığı çətinlikləri artıq geridə qoyub və 2021-ci il bu baxımdan mühüm mərhələ olub.

Bütövlükdə 2021-ci il Azərbaycan üçün növbəti uğurlu mərhələ kimi tarixə düşdü. Dünyada davam edən və yeni formaları meydana çıxan müxtəlif böhranlar şəraitində Azərbaycanın ili uğurla başa vurması həyata keçirilən siyasətin düzgünlüyündən xəbər verir. Sözsüz ki, hər bir sahə üzrə əldə olunan inkişaf yüksək templə davam etdiriləcək və ölkəmiz 2022-ci ildə də böyük uğulara nail olacaq. Prezident İlham Əliyevin dediyi kimi, ölkədə mövcud olan birlik, həmrəylik və gözəl ab-hava bu reallığı bizə təmin edəcək.

Rəşad CƏFƏRLİ

Azərbaycan. - 2022.- 6 yanvar.- S.5.