Mətbuatın işıqlı adamı

Onu hər kəs, xüsusən də jurnalist dostları işgüzar, səmimi yoldaş, məhsuldar işçi və ən nəhayət, dostluğa sadiq insan kimi tanıyırlar. İllərdir onunla birgə addımlayırıq. Dostluğumuzun möhkəm bağlara əsaslanan uzun hekayəsi var.

O, həqiqətən də, jurnalistlərin dostudur. Qələm əhli bunu çox gözəl bilir. Sutkanın 24 saatı telefonları açıqdır. Nə zaman yığsan, xoş səsini eşidərsən. Hətta nə qədər əsəbi olsa belə, Tanrıverdi müəllimlə telefon danışığının birinci dəqiqəsində o, tamam başqa insana çevrilir. Çünki ona müraciət edən hər kəslə çox səmimi, mehriban danışır və problemini dinləyib dərhal həll etməyə çalışır. İkinci dəfə zəng etməyə lüzum qalmır.

Bir maraqlı hadisə yadıma düşür. Əvvəllər işıqlar tez-tez sönürdü. Həmin dəqiqə müvafiq idarələr deyil, birbaşa Tanrıverdi müəllim yada düşürdü. Sağ olsun, onun köməyi ilə işıqsız qalmırdıq. Bir gün gecə saat 2 radələrində telefonuma zəng gəldi. Yuxudan ayılıb baxdım ki, dostum (adını yazmıram), ölkənin tanınmış həkimlərindən biridir. Telefona cavab verən kimi başladı hirsli-hirsli danışmağa. Bu vaxtı xəstəxanada işıq sönər? Reanimasiya otaqlarında xəstələr var. Onlara bir şey olsa, kim cavab verəcək? Bayaqdan hansı işıq idarəsinə zəng edirəm, düşə bilmirəm. Birdən ağlıma gəldi ki, sən Tanrıverdi Mustafayevlə yaxınsan, bəlkə onun nömrəsinə zəng edək.

Bir az sakitləşdirib məsələ ilə maraqlanmaq üçün gecənin bu saatında Tanrıverdi müəllimə zəng etdim. Gec də olsa dərhal telefonu açdı və mən vəziyyəti izah etdim. Cəmi bir neçə dəqiqə keçmişdi ki, həkim dostum zəng edib sevincək şəkildə işıqların yandığını söylədi. Əlbəttə ki, bu, gecə şirin yuxusuna haram qatdığım Tanrıverdi müəllimin zəhmətinin nəticəsi idi.

Bununla bağlı bəlkə də onlarca hadisə danışa bilərəm. Bu cür hərəkətləri, sözünə sadiqliyi, operativliyi, dürüstlüyü ona böyük hörmət qazandırıb. Tanrıverdi Mustafayev bu gün işıqlı siması, insanlara sevgisi ilə öz işinin başındadır. Həyatı qədər özü də maraqlı adamdır. Yubiley yaşını qeyd edir dostumuz. 60 yaşın tamamını, adətən, müdrikliyin başlanğıc dövrü adlandırırlar. Yaşanmış bu illər bir tərəfdən ömrün çox, digər tərəfdən az hissəsi hesab edilir. Bununla belə, insanın mənəvi yetkinlik dövrünə qədəm qoyduğu, özü qarşısında hesabat verdiyi 60 il həm də böyük zaman kəsiyidir. Həmçinin şərəflə yaşanan ömür yolundan asılı olmayaraq, insan həyatında iz qoyan əbədi keyfiyyət möhürüdür. Bu mənada tərcümeyi-halına nəzər salanda görürsən ki, ömrünün 60 ilini geridə qoyan Tanrıverdi Mustafayev üçün bu illər kifayət qədər dolğun, mənalı yaşanmış bir həyatdır.

İllərdir “Azərişıq”ın Mətbuat xidmətinin rəhbəri kimi çalışan Tanrıverdi Mustafayevin həyat yolu zəngindir. Kənddə doğulub. Ətrafında olanların əksəriyyəti də demək olar ki, hamısı kənddə böyüyüb, boya-başa çatan, kəndin havasını udan insanlardır. Bəlkə də bizləri birləşdirən kənd həyatının saflığı, dürüstlüyüdür.

Hərdənbir görüşüb çay süfrəsi arxasında oturub söhbətləşərkən, keçmişdən və günümüzdən söz düşəndə Tanrıverdinin maraqlı həyatının şahidi olursan. Uşaqlıq illərindən danışarkən deyir: “Həm kənd, həm də şəhər mühitini görmüşəm. Zəhmətkeş kolxozçu ailəsində doğulmuşam. Müxtəlif mühitlərdə böyümüşəm. Uşaqlığımız qoyun otarmaqla, ot biçməklə, dağlara köç etməklə keçib. Xatırlayıram ki, evə qonaq gələndə heç kim ortalıqda görünməzdi. Qonaq oturub yeyib-içdikdən sonra üzə çıxardıq. Ancaq şəhər mühiti bir qədər fərqlidir. Hər yerin bir adəti var və buna uyğunlaşmaq lazımdır. İndiki uşaqlar bizim uşaqlıqda çəkdiyimiz əziyyətə qatlaşa bilməzlər. Biz çətin şərtlər altında böyümüşük. Bəzən deyirlər ki, məktəblərdə uşaqları yorurlar. İndiki uşaqların işi ancaq oxumaqdır. Biz o dövrdə bütün ağır işlərlə yanaşı, dərslərimizi də yaxşı oxuyurduq”.

Bu gün məhz həmin əziyyətin şirin bəhrəsini dadır Tanrıverdi. İndi onun həyatının əsas anlamı, yaşam qayəsi övladları ilə bağlıdır. Çünki yalnız onların əhatəsində özünü rahat, güvənli və daha güclü hiss edir. Övladları ilə fəxr edir, onlarla nəfəs alır. Ata olmağın şirinliyini dadarkən həyat ona sürprizlər etməyə davam edib, hətta dörd nəvənin babası statusunu da qazanıb. Övladlarından bəhs edəndə üzünə xırda bir təbəssüm qonur, fərəhlə danışır. Sanki qoca bir çinarı ayaqda saxlayan məhz onun pöhrələnən budaqları imiş kimi, onu bu qədər güclü edən, ayaqda dayanmağının səbəbkarı da o budaqlardır.

Onu da deyim ki, yubilyar bir müddət xarici ölkədə də yaşayıb. Ancaq öz soykökünə, torpağına, vətəninə bağlı qalıb. Övladları da özü kimi. Harda yaşamaqlarından asılı olmayaraq, hər zaman evdə azərbaycançılıq ideyası, milli-mənəvi dəyərlərimiz, adət-ənənələrimiz hökm sürüb.

Bu gün həmin dəyərlərə sadiq ömür sürür bizim Tanrıverdi. 60 illik həyatında o qədər şirinlı-acılı xatirələr var ki...

Amma bizə qalan əzizimiz, işıqlı adama bundan sonrakı həyatında sağlıqlı-hüzurlu ömür, şad günlərlə zəngin olan xoş və maraqlı həyat arzulamaqdır.

Yubileyin mübarək, işıqlı insan!

Bəxtiyar ƏZİZLİ

Azərbaycan.- 2022.-8 yanvar.- S.7.