“Biz ermənilər İlham Əliyevin şərtləri ilə artıq razılaşmalıyıq”

Azərbaycan Prezidentinin son bəyanatları Ermənistanda böyük narahatlığa səbəb olub

Prezident İlham Əliyevin yerli televiziya kanallarına müsahibəsində Ermənistanla bağlı səsləndirdiyi fikirlər İrəvanda da xüsusi diqqət mərkəzindədir.

Dövlət başçısının verdiyi açıq mesajlar erməni sosial şəbəkə istifadəçilərinin də nəzərindən qaçmadı.

Xəbər portallarının rusdilli versiyasında yayılan müsahibədən hissə-hissə açıqlamaların, videoçarxların təqdim olunaraq müzakirəyə çıxarılması məğlub ölkədə ictimai çaşqınlığın artıq xaosa çevrildiyini göstərir. Bu fonda ölkə ictimaiyyəti Sarkisyan-Koçaryan rejimindən sonra Paşinyanı da artıq Ermənistanın əsas bəlası saymağa başlayıb.

“Paşinyan Əliyevə hansı üzlə cavab verəcək?”

Ermənilərin sosial şəbəkələrdəki statusları, şərhləri göstərir ki, onlar ölkələrinin məhvə doğru getməsi, İlham Əliyevin Ermənistan üzərində üstünlüyünün artması barədə ortaq rəydədirlər. Erməni istifadəçilər tərəfindən yer alan maraqlı status və şərhləri diqqətinizə çatdırırıq.

İrina Babayan adlı biri “İnstaqram”da Paşinyan tərəfdarlarının daha çox rəy bildirdiyi xəbərə maraqlı bir şərhlə diqqət çəkib və bununla da onların kəskin tənqidi ilə üzləşib.

O yazıb: “Acı reallıq olsa da, qəbul edək ki, Paşinyanın pafoslu çıxışlarına, onun aktyorluğuna yalnız Ermənistanda inanırlar. İlham Əliyev Bakıdan növbəti dəfə Paşinyana, Sarkisyana, Koçaryana od püskürdü, bizimkilər isə hakimiyyəti qorumağın və hakimiyyətə gəlməyin yollarını axtarırlar”.

Aravik Vardanyan adlı “Feysbuk” istifadəçisi İlham Əliyevin müsahibədə səsləndirdiyi fikirlərin yer aldığı xəbərə münasibət bildirib. İrəvan Dövlət İqtisad Universitetinin tələbəsi olduğunu qeyd edən istifadəçi rəyində yazır: “Ötən zaman da göstərir ki, təəssüflər olsun ki, Azərbaycan istədiyinə daha sürətlə yaxınlaşır. Düşmən ölkənin rəhbərinin açıqlamaları bir erməni gənci olaraq məni çox qıcıqlandırdı. Görəsən bundan sonra Paşinyan Əliyevə hansı üzlə cavab verəcək? Yəqin ki, bundan sonra da cavab verə bilməyəcək. Çox təəssüf və qıcıq hissi ilə deyirəm ki, Paşinyan İlham Əliyevə davamlı şəkildə uduzur”.

“İlham Əliyev bütün sahələrdə Ermənistan üçün böyük qorxu yaradıb”

“Feysbuk” sosial şəbəkəsində Gevorq Manusyan adlı biri iki yüz minlik bəyənməsi olan səhifədə şərh yazaraq Azərbaycan Prezidentinin müsahibəsinin yer aldığı videoçarxa rəy bildirib: “İlham Əliyev yenə çox açıq mesajlar verdi. Paşinyanın İlham Əliyevdən çəkdikləri nədir? Çox qorxulu bir vəziyyətdir. Çətin bir də Artsaxı (red-Qarabağ) görək”.

Roman Piloyan adlı istifadəçi “İnstaqram” sosial şəbəkəsində xəbər portallarından birində İlham Əliyevin “Unutmamalıdırlar ki, İkinci Qarabağ müharibəsindəki kimi, kimin onlara yardım edəcəyindən asılı olmayaraq, biz istədiyimizə nail olacağıq və heç kim bizi dayandıra bilməz, heç nə bizi dayandıra bilməz” fikirlərinin əks olunduğu videogörüntüyə münasibət bildirib: “Dostlar, gəlin gördüklərimizi açıq şəkildə etiraf etməkdən çəkinməyək. Çox gülməlidir, elə deyilmi? İlham Əliyev bütün sahələrdə Ermənistan üçün böyük qorxu yaradıb. Azərbaycan əsgəri qarşısında duruş gətirməyən erməni əsgərlərinin səngərlərdə silahlarını qoyub qaçmalarını görməkdən bezmişik. Orduya xidmətdən yayınmaq məqsədilə ölkəni tərk etməkdən təngə gəlmişik. Bunun ən böyük səbəbkarı isə hakimiyyətdir”.

“Vətənə biz yox, Paşinyan və onu müdafiə edənlər xəyanət edirlər”

Poxos Poxosyanın “VKontakte” sosial şəbəkəsində Prezident İlham Əliyevin açıqlamalarının yer aldığı xəbərin rəy bölümündə Paşinyanın şəklini paylaşaraq “Ermənistanı sizinlə daha parlaq gələcək gözləyir” şərhi çoxsaylı tənqidlərə, təhqirlərə tuş gəlib. Karen Melikyan adlı istifadəçinin bu fotoya şərhi isə daha çox bəyənmə toplayıb: “İlham Əliyev bizim Paşinyanı informasiya müharibəsində də məğlub etməkdə davam edir. Müxtəlif sosial qruplarda “klaviatura qəhrəmanları” çoxsaylı statuslar və şərhlərlə bildirirlər ki, belə çıxış etməklə Nikolu Əliyev qarşısında çox aşağı səviyyəyə salırsınız. Vətənə xəyanət edirsiniz. Vətənə biz yox, Paşinyan və onu burada müdafiə edənlər xəyanət edirlər. Neyləməliyik? Ermənistan məhv olur, susmalıyıq?”

Araik Avetisyan adlı istifadəçi “Tviter”də Prezident İlham Əliyevin “4r.am” saytında yerləşdirilən “Ancaq yenə də deyirəm, elə bilməsinlər ki, biz daim onlardan sülh tələb edəcəyik. Biz, sadəcə olaraq, regionun gələcəyi naminə və müharibə riskinin sıfıra endirilməsi naminə bu təklifi edirik. Yenə də deyirəm, əgər Ermənistan buna hazır deyilsə, onda bu, olmayacaq. Olmasa nə olacaq? Heç nə. Biz nə itirəcəyik? Heç nə itirməyəcəyik, nə bu gün, nə sabah” paylaşımına belə reaksiya verib: “Sülhü görəsən bizim alkaş baş nazirimiz niyə istəmir ki? Özüm də Zəngəzurdanam. Zəngəzur bu anda regionun geosiyasi mərkəzidir.

İlham Əliyevi bu mövzuda biz də dəstəkləyirik. Biz ermənilər artıq İlham Əliyevin şərtləri ilə razılaşmalıyıq. Sülh müqaviləsinin imzalanması, dəhlizin açılmasını çox böyük səbirsizliklə gözləyirik. Bu dəhliz sayəsində ağ günə çıxacağıq”.

“Ağıllı düşmən ağılsız baş nazirimizi və bədbəxt dövlətimizi məhv edir”

“İravnuk” qəzeti “İnstaqram” səhifəsində Azərbaycan Prezidentinin Sarkisyan və Koçaryan barədə səsləndirdiyi “Siam əkizləri” başlığı daha çox bəyənmə toplayıb. İstifadəçilərdən bir çoxu bu paylaşıma gülüş işarəsi qoyublar. Rəy bildirənlərdən Albert Nersisyanın Azərbaycanı, onun Prezidentini özünə düşmən sayan fikirləri nə qədər erməni şovinizmini əks etdirsə də, əslində, həqiqəti göstərir: “Bizi İlham Əliyevə xidmətdə, onu sevməkdə günahlandırırlar. Heç bir erməni o Prezidenti sevmir və sevə də bilməz. Onun ölkəsi də, xalqı da düşməndir, özü də düşməndir. Amma axı ağıllı düşməndir. Bizim ağılsız keçmiş prezidentlərimiz və hazırkı baş nazirimiz kimi öz xalqını ac qoymur, müharibədə fərarilik etmir. Görün Azərbaycan hansı səviyyədədir. 28 il əvvəl az qala Bakıya çatırdıq. Amma indi görün nə gündəyik. Artıq İrəvanda da qorxaraq oturmuşuq. Biz Serj Sarkisyanı, Paşinyanı tənqid etməklə İlham Əliyevə, Azərbaycana, düşmənlərimizə xidmət etmirik, Ermənistana, övladlarımızın daha sakit və xoşbəxt yaşamasına çalışırıq. Ağıllı düşmən ağılsız baş nazirimizi və bədbəxt dövlətimizi məhv edir, budur reallıq”.

Bütün bunlar əsl həqiqətlərin nədən ibarət olduğunun artıq erməni cəmiyyəti tərəfindən də dərk olunduğunu aydın nümayiş etdirir. İndi anlamağa başlayıblar ki, Ermənistanın acınacaqlı vəziyyətə düşməsinin əsas səbəbləri 30 ilə yaxın davam edən işğalçılıq siyasəti və buna görə Azərbaycanın gördüyü tədbirlər idi.

Elçin CƏFƏROV

Azərbaycan.- 2022.- 14 yanvar.- S.1; 9.