Azərbaycan kino layihəsi İtaliyada keçirilən Avropa Film Forumunda mükafat qazanıb

Rejissor Elvin Adıgözəlin "Mənim sehrli dünyam" filmi Türkiyənin nüfuzlu TRT telekanalının 5000 avro məbləğində mükafatına layiq görülüb. "Mənim sehrli dünyam" Triestdə keçirilən beynəlxalq kinofestival tərəfindən təşkil edilən nüfuzlu "When East Meets West" kinoforumunun First Cut Lab proqramında iştirak edən ilk Azərbaycan layihəsidir.

Bu barədə "Cinex" kino şirkətinin mətbuat xidməti məlumat yayıb.

"Bu forum Avropada və dünyada kino peşəkarlarına dayaq missiyasını yerinə yetirən çoxşaxəli proqramdır. Bu il proqramda Azərbaycan layihəsindən əlavə, Serbiya, Braziliya, İtaliya, Macarıstan, Sloveniya, Belçika, Xorvatiya kinematoqrafiyasını təmsil edən 8 film iştirak edib. Belə ciddi rəqabətə baxmayaraq, "Mənim sehrli dünyam" ən yaxşı film olaraq seçilib.

Film Sabirabad rayonunun kənd ansamblında çıxış edən və Bakıya televiziya verilişinə gəlmək arzusunda olan iki uşaqlıq dostu Babək və Sahildən bəhs edir. Babək yerli kafelərin birində ofisiant işləyən qıza aşiq olur. Bu vurğunluq onun həyat prioritetlərini yenidən nəzərdən keçirib keçmiş həyatından, dostlarından və ailəsindən ayrılmaq qərarına təkan verir. Hekayənin müəyyən bir məqamında bütün arzular dağılır, dostluq sınağa çəkilir və ansamblın üzvlərinin həyatı həmişəlik dəyişir. Məsum bir macəra kimi başlayan əhvalat həqiqi insani faciəyə çevrilir.

Azərbaycan.- 2023.- 5 fevral.- S.11.