Ağcabədi kəndlisi təbiətin sınaqlarından qalib çıxır
Bu ilin yazında, eləcə də yayın ilk günlərində təbiət bizi ciddi sınaqlara çəkdi. Fasiləsiz
yağışlar, güclü
dolu, şiddətli küləklər böyük
fəsadlar törətdi.
Taxıl zəmilərinə,
pambıq tarlalarına,
meyvə bağlarına,
tərəvəz əkinlərinə
xeyli ziyan dəydi.
Təbii fəlakət
dalğası, heç
şübhəsiz, ölkənin
böyük kənd təsərrüfatı rayonu
olan Ağcabədidən
də yan keçmədi. Təbiətin
çətinlikləri, adamlarda psixoloji gərginlik yaradan o günlər haqqında Ağcabədi Rayon İcra Hakimiyyətinin başçısı Rafil
Hüseynov dedi:
- Təbii ki, əsəblərin tarıma
çəkildiyi elə
gərgin bir zamanda əlimizi - qolumuzu sallayıb, oturub vəziyyətin bir möcüzə nəticəsində
düzələcəyini gözləyə
bilməzdik. Rayonun zəngin həyat və təsərrüfat
təcrübəsinə malik
bacarıqlı mütəxəssislərini
dəvət etdik. Dəfələrlə bir
araya gəlib məsləhətləşdik, təbiətin yaratdığı
problemlərdən daha
az itkilərlə çıxmaq üçün
yollar aradıq. Faydalı məsləhətlər
kara gəldi. Güclü küləyin,
leysan yağışlarının
nəticəsində sünbülləri
yatan zəmilərin taxılını itkisiz biçib götürmək
üçün kombaynlar
şəraitə uyğun
olaraq yenidən nizamlandı. Dolu vurduğu pambıq tarlalarında zədələnmiş
bitkilərin inkişafını
sürətləndirməkdən ötrü isə becərmə aqreqatlarında
yumşaldıcılara üstünlük
verildi, yemləmə gübrələrinin norması real şəraitə uyğun
olaraq artırıldı.
Həyata keçirilən
operativ zəruri tədbirlər təbii ki, nəticəsiz qalmadı.
İndi Ağcabədi
rayonunun təsərrüfatlarında
işlərin qızğın
çağıdır. Taxıl
biçini sürətlə
davam edir. Arpa biçini artıq başa çatmışdır. 6404 hektar
sahədən 24949 ton
arpa götürülmüş,
hər hektarın məhsuldarlığı 38,2 sentner
təşkil etmişdir.
Məlumat üçün
bildirək ki, rayonun təsərrüfatlarında
cari ilin məhsulu üçün
26664 hektarda taxıl toxumu əkilmişdir. Zəmilərə aqrotexniki
qaydalar əsasında
qulluq edilməsi, məhsuldar sortlara üstünlük verilməsi
yüksək son nəticəni təmin edən əsas şərtdir. Biz biçin barədə operativ məlumat əldə edərkən öyrəndik ki, indiyədək 10 min hektar buğda zəmisinin məhsulu biçilmişdir. Hələlik
hər hektarın orta məhsuldarlığı
45 sentnerdən yüksəkdir.
Əlbəttə, bu yaxşı nəticənin
arxasında gərgin əmək, narahat günlər dayanır.
Ümumiyyətlə, rayonun təsərrüfatlarında
taxılçılığın inkişafı xüsusi önəm daşıyır.
Müharibə şəraitində
yaşayan bir dövlətdə çörəyin
bolluğu son dərəcə vacib
amildir. Həm də bu gün
dünya bazarında ərzaqlıq buğdaya ehtiyac böyükdür. Məsələyə bu prizmadan yanaşdıqda Ağcabədi kəndlisinin
fədakarlığı minnətdarlıq
doğurur. Onu da qeyd edək
ki, keçən il rayonda 113814 ton taxıl istehsal edilmiş, hər hektarın məhsuldarlığı 40,4 sentnerə
çatmışdır. Builki
hədəf isə daha yüksək istehsala nail olmaqdır. Qoy olsun! Süfrəmizin bol çörəyi iqtisadi gücümüzün
əsas göstəricisidir!
Ağcabədi rayonunun
iqtisadiyyatında taxılçılıqla
yanaşı, pambıqçılıq
da böyük önəmə malikdir. Keçən il rayonda 40361 ton pambıq tədarük olunmuş, orta məhsuldarlıq 34,1 sentner təşkil
etmişdir. Nəzərə
alaq ki, pambıqçılığın inkişafı kəndli üçün ən etibarlı iş yeridir. Artıq rayonda halal zəhməti hesabına qabaqcıl pambıqçılar
nəsli formalaşmışdır.
İskəndər Hüseynov,
Famil Quliyev, Raqub Qasımov rayonun adlı-şanlı
pambıqçıları kimi hər yerdə
hörmət və ehtiramla qarşılanırlar.
Bu il rayonun
təsərrüfatlarında 11493 hektar sahədə pambıq əkilmişdir.
Tarlalarda becərmə
işləri aqrotexniki
qaydalar əsasında
davam edir. Dolu vuran, leysan
yağışlarına məruz
qalan tarlalara isə fərqli yanaşılır. Cərgə
aralarına çəkilən
kultivasiya ilə birlikdə sahələrə
yüksək normada mineral gübrələr verilir. Zədələnmiş
pambıq kolları yavaş-yavaş güclənir,
boy atır, çəkilən zəhmət
hədər getmir.
Cari ilin uğurları sırasında
Ağcabədi kümçüsünün
də payı var. Gəlirli, kəndli üçün
sərfəli olan baramaçılığın inkişafı üçün rayonun
təsərrüfatlarında etibarlı təməl vardır. Məhsuldar tut tinglikləri, zoobaytar tələbərə
cavab verən kümxanalar baramaçılığın
intensiv inkişafı
üçün bol yem mənbəyi və etibarlı maddi-texniki bazadır. Bu il kümçülər
34478 kiloqram yüksək
keyfiyyətli barama istehsal etmişlər. Hər qutu ipək
qurdunan orta məhsuldarlığı 49,3 kiloqram
olmuşdur. Bu, keçən ilin göstəricisindən 12 kiloqram
çoxdur.
Ağcabədi kəndlisi
təbiətin builki ağır sınaqlarından
qalib çıxdı.
Kürəyində dövlətin
güclü əlini hiss edən, ayağı torpaqda, əli zəhmətdə olan, bolluq, firavanlıq
niyyətli insanlar yenilməz iradələri,
dönməz inamları
ilə tufandan güclü olduqlarını
sübut etdilər.
Lazım QULİYEV,
Azərbaycan.-2023.-
9 iyul.- S.7.