Erməni yalanları hüquqi müstəvidə iflasa uğrayır

Ermənistanın Laçın yolundakı sərhəd nəzarət-buraxılış məntəqəsi ilə bağlı iddialarının rədd edilməsi ciddi siyasi nəticələr doğuran hadisədir

Xəbər verildiyi kimi, Beynəlxalq Ədalət Məhkəməsi Ermənistanın Laçında Azərbaycana məxsus sərhəd nəzarət-buraxılış məntəqəsinin aradan qaldırılması ilə bağlı tələbini yekdilliklə rədd edib.

Beləliklə, Ermənistanın Azərbaycana qarşı qaldırdığı növbəti əsassız iddiası beynəlxalq səviyyədə iflasa uğrayıb. Məhkəmə həmin ərazidə buraxılış məntəqəsi yaratmağı Azərbaycanın suveren hüququ kimi təsdiq edib.

Mövzu ilə bağlı Milli Məclisin deputatlarının fikirlərini öyrəndik.

Suveren hüquqlarımız qətiyyətlə təmin edilir

Milli Məclisin deputatı Bəhruz Məhərrəmov deyib ki, Beynəlxalq Ədalət Məhkəməsinin Ermənistanın Laçındakı sərhəd nəzarət-buraxılış məntəqəsinin aradan qaldırılması ilə bağlı tələbini yekdilliklə rədd etməsi beynəlxalq hüququn təntənəsi olmaqla bərabər, ciddi siyasi nəticələr doğuran hüquq hadisəsidir: "Məhkəmə bu qərarı ilə bir daha qəti mövqe ifadə etdi ki, Azərbaycanın Laçında sərhəd nəzarət-buraxılış məntəqəsi yaratması beynəlxalq hüquqla tanınır. Beynəlxalq hüququn ən az üç prinsipinə əsasən, hər bir dövlət digər ölkələrin suverenliyinə, yəni digər dövlətlərin müdaxiləsi olmadan öz ərazilərində hakimiyyətini həyata keçirmək hüququna hörmətlə yanaşmaq məcburiyyətindədir. "Azərbaycan Respublikasının dövlət sərhədi haqqında" qanunun 12-ci maddəsinə əsasən, şəxslər, nəqliyyat vasitələri, yüklər müvafiq icra hakimiyyəti orqanı tərəfindən Azərbaycan Respublikasının dövlət sərhədindən buraxılış məntəqələrindən buraxılırlar. Yəni dövlət sərhədi həm dövlətdaxili, həm də beynəlxalq hüquqla dövlət suverenliyinin ərazi hüdududur".

Deputat qeyd edib ki, Beynəlxalq Ədalət Məhkəməsi bu prinsipləri görməzdən gələ bilməzdi: "Azərbaycan Xarici İşlər Nazirliyinin də yaydığı bəyanatda ifadə olunduğu kimi, "Biz Məhkəmənin Azərbaycanın öz sərhədlərinə nəzarət etmək hüququnu bir daha təsdiq edən və Ermənistanın sərhəd nəzarət-buraxılış məntəqəsinin aradan qaldırılması ilə bağlı tələbinin əsassız olduğunu sübut edən qərarını alqışlayırıq". Bu qərar eyni zamanda mühüm siyasi reallığı - aylardır bu mövzuda anti-Azərbaycan kampaniyası aparan Fransa, Avropa Parlamenti və bir sıra digər beynəlxalq subyektlərin arqumentlərinin nə qədər çürük, özlərinin isə nə qədər qərəzli, beynəlxalq hüquqa hörmət etməyən subyektlər olduğunu meydana çıxardı".

Bəhruz Məhərrəmovun sözlərinə görə, bir daha aydın oldu ki, əslində, İrəvan beynəlxalq məhkəmə instansiylarındakı mümkün hüquqi imkanlardan sui-istifadə etməklə məğlubiyyətdən sonra düşdüyü çıxılmaz vəziyyətdə daxili auditoriyanın diqqətini yayındırmağa çalışır: "Eyni zamanda manipulyasiya etməklə Beynəlxalq Ədalət Məhkəməsini informasiya müharibəsində Azərbaycan əleyhinə alətə çevirmək istəyir. Lakin bu kimi mübarizə üsulları ilə İrəvan özü elə indidən məğlubiyyətə məhkumdur. Azərbaycan isə suveren hüquqlarını istənilən halda tam şəkildə həyata keçirəcək. Ermənistanın 30 il boyunca davam etmiş işğal, təcavüz siyasətinin, müharibə cinayətlərinin nəticələrinə görə bu dövlətin məsuliyyətə cəlb edilməsi istiqamətində bütün zəruri tədbirləri davam etdirəcək".

Ermənistana növbəti hüquqi zərbə

Milli Məclisin deputatı Azər Badamov deyib ki, Beynəlxalq Ədalət Məhkəməsi uzun illər Azərbaycana qarşı ədalətsiz qərarlar qəbul etsə də, bu dəfə Ermənistanın Laçın yolu ilə bağlı qaldırdığı iddiasını yekdilliklə rədd edib: "Azərbaycan hər zaman ədalətin tərəfində olub, atdığı bütün addımları beynəlxalq hüquqa cavab verib. Laçın yolunda sərhəd nəzarət-buraxılış məntəqəsinin qurulması da Azərbaycanın suveren hüququdur. Bu məntəqənin yaradılması ərazimizə qeyri-qanuni olaraq silah, hərbi texnika göndərilməsinin dayandırılması zərurətindən yaradılıb. Nəzərə almaq lazımdır ki, Ermənistan həmin ərazilərdə Rusiya sülhməramlılarının bayrağı altında Qarabağda qalmış qanunsuz silahlı birləşmələrinin təminatını və canlı qüvvəsinin rotasiyasını həyata keçirirdi. Ona görə də nəzarət-keçid məntəqəsi yaratmaqla ərazilərimizə qanunsuz daşınmaların qarşısını almaq bizim haqqımız idi".

Deputat bildirib ki, buraxılış məntəqəsinin yaradılması ilə Qarabağda yaşayan ermənilərin Laçın yolu vasitəsilə hərəkətinə heç bir məhdudiyyət qoyulmayıb: "Qarabağda yaşayan ermənilər həmin məntəqədə yalnız pasportlarını təqdim etməklə heç bir maneə ilə qaşılaşmadan sərhədi keçə bilirlər. Təbii ki, sərhəd nəzarət-buraxılış postunun yaradılması beynəlxalq hüquqa uyğundur, burada heç bir beynəlxalq norma pozuntusu yoxdur. Beynəlxalq Ədalət Məhkəməsi də bütün bu məsələləri araşdırıb və Laçın nəzarət-buraxılış məntəqəsinin fəaliyyətində hər hansı bir nöqsanın olmadığını bildirib".

Azər Badamov vurğulayıb ki, Beynəlxalq Ədalət Məhkəməsinin qərarı Ermənistan və onun havadarlarına böyük zərbədir: "Fransa başda olmaqla Ermənistanın bütün dayaqları Laçın yoluna görə Azərbaycanı beynəlxalq platformalarda günahlandırırdı. Bu qərardan sonra onların dili ağızlarında qurumalıdır. Qarabağın qanunsuz erməni silahlılarından təmizlənməsi prosesi də beynəlxalq hüquqa uyğundur. Hesab edirəm ki, növbəti addımımız Qarabağdakı qanunsuz erməni silahlılarının neytrallaşdırılması ilə bağlı olmalıdır. Orada yaşayan erməniəsilli sakinlərimizin hüquq və təhlükəsizliklərinin təmin edilməsi isə Azərbaycanın daxili işidir. Beləliklə, Azərbaycan ermənilərin yaşadıqları ərazilərimizdə də dövlət quruluşunun bərpasına yavaş-yavaş yaxınlaşır".

Nəzrin QARDAŞXANOVA,

Azərbaycan.-2023.- 11 iyul.- S.5.