Regionda yeni reallıqları Azərbaycan diktə edir

Prezident İlham Əliyev bəyan etdi ki, Ermənistanın sülh sazişi imzalamaqdan başqa yolu yoxdur

İyulun 21-də "4-cü Sənaye İnqilabı dövründə Yeni Media" mövzusunda Şuşa Qlobal Media Forumunun açılış mərasimində çıxış edən Prezident İlham Əliyev Azərbaycan xalqına və beynəlxalq ictimaiyyətə vacib mesajlar verib. Dövlət başçısı tərəfindən xüsusilə Ermənistana və ondan geosiyasi alət kimi istifadə edən havadarlarına ünvanlanmış ismarıclarda Azərbaycanın qətiyyətli mövqeyi bir daha diqqətə çatdırılıb.

Mövzu ilə bağlı Milli Məclisin deputatlarının fikirlərini öyrəndik.

Ermənistan dövrün reallıqları ilə barışmalıdır

Milli Məclisin deputatı Rəşad Mahmudov deyib ki, Şuşada Qlobal Media Forumunun keçirilməsi təsadüfi deyildi: "Son vaxtlar bəzi xarici himayədarlarına güvənən revanşist erməni qüvvələri bölgədə sülhü təhdid edən bəyanatlar səsləndirməkdən çəkinmirdilər. Bu baxımdan dövlətimizin başçısının onlara ciddi mesajı xüsusi əhəmiyyət kəsb edir. Tədbirdə çıxışı zamanı Prezident İlham Əliyevin bildirdiyi kimi, Şuşa mədəniyyət paytaxtımız olmaqla yanaşı, həm də tarixi qələbəmizin rəmzidir. Bu gün Şuşada aparılan abadlıq quruculuq işləri onu göstərir ki, 30 il ərzində mənəvi və fiziki əzablarımızın ünvanı kimi tanınan Şuşa və bütövlükdə Qarabağ bölgənin inkişaf möcüzəsinə çevrilib. Bununla Azərbaycan hərb meydanındakı qələbəsini həm də iqtisadi qüdrəti ilə təsdiqləyərək işğaldan azad olunan bölgəmizin inkişafını dünyaya təqdim edir. Ona görə də Prezident İlham Əliyevin Şuşadan verdiyi mesajlar xüsusi önəm kəsb edir".

Prezidentin Ermənistanın sülh sazişi imzalamaqdan başqa yolu olmadığını açıq şəkildə bəyan edərək müharibədən sonra düşmənin məcburiyyətdən sülhə doğru bəzi addımlar atdığını, amma bu addımların yetərli olmadığı fikrinə toxunan deputat bildirdi: "Dövlət başçısı Ermənistanın ölkəmizin ərazi bütövlüyünü tanımasının real əsaslarını açıq şəkildə ifadə etdi. Belə ki, əks halda Azərbaycan da qarşı tərəfin ərazi bütövlüyünü tanımayacağını və bunun Ermənistanın bir dövlət kimi məhvinə gətirib çıxaracağını bildirdi. Çünki bu gün bölgədə bütün siyasi və iqtisadi reallıqları Azərbaycan diktə edir. Bu həqiqəti dərk edən düşmən "Qarabağ Azərbaycandır" həqiqətini açıq şəkildə bəyan edir. Lakin bütün bunlar sülh üçün kifayət deyil, Ermənistan üzərinə götürdüyü öhdəlikləri yerinə yetirərək sülh sazişinin imzalanmasını reallaşdırmalıdır".

Rəşad Mahmudovun sözlərinə görə, Prezidentin çıxışında Şuşa Bəyannaməsinin xüsusi vurğulanması da məhz sülh sazişinə mane olan xarici qüvvələrə verilən mesaj idi. Bu gün Türkiyə-Azərbaycan münasibətləri elə bir zirvəyə çatıb ki, bu birliyin qarşısında heç bir qüvvə tab gətirə bilməz. 44 günlük Vətən müharibəsində olduğu kimi, bu gün də Türkiyə Azərbaycanın haqlı mövqeyini diplomatik cəbhədə tam şəkildə müdafiə edir.

"Azərbaycan hərbi və iqtisadi qüdrətinə rəğmən məğlub Ermənistanla sülh sazişini danışıqlar yolu ilə əldə etmək niyyətini açıq şəkildə ortaya qoyub. Şuşa forumunda Prezidentin səsləndirdiyi fikirlər bölgədə sülh üçün ən mühüm bəyanat kimi yadda qaldı. Beləliklə, Şuşa zirvəsində növbəti dəfə Prezident İlham Əliyev Azərbaycan reallıqlarını, ölkəmizin dürüst siyasi kursunu, humanizm prinsiplərini dünyaya nümayiş etdirdi. Dövlətimizin başçısının söylədiyi kimi, Azərbaycan hədəflərinə doğru gedir. Ölkəmiz postmüharibə dövründə ardıcıl şəkildə hədəflərinə nail olub və bu proses uğurla davam edir. Reallıq onu göstərir ki, bizi heç kim saxlaya, yolundan döndərə bilməz. Çünki biz haqlı və güclüyük", - deyə o bildirib.

Deputat vurğulayıb ki, Prezident İlham Əliyev bu gün ölkəmizin gələcəyini qurur, daha qüdrətli Azərbaycan naminə yüksək əzm nümayiş etdirir. Müasir dünya tarixində xalqını İlham Əliyev qədər sevən ikinci lider tapmaq çətindir. Bu, dövlət başçısının fəaliyyətində açıq şəkildə görünür.

Azərbaycan torpaqlarının hər qarışında suverenliyini təmin etmək əzmindədir

Milli Məclisin deputatı Sahib Alıyev bildirib ki, Prezident İlham Əliyevin Şuşadakı mesajları təkcə Ermənistana deyil, həm də bədnam qonşumuzdan geosiyasi alət kimi faydalananlara, bir qismi isə Azərbaycan xalqına ünvanlanmışdı. Ermənistana ünvanlanan ismarıcların əsasını isə Azərbaycanın hər zaman sülhə hazır olması təşkil edir. Azərbaycan ictimai barışığa hazırdır, lakin qarşı tərəf bunun üçün azərbaycanlılardan mütləq üzr istəməli, bütün baş verənlərin bir daha təkrarlanmayacağını bildirməlidir.

Deputatın dediyinə görə, Prezidentin Ermənistana ünvanladığı mesajlarda yer alan məqamlardan biri də o idi ki, sülh anlaşması Azərbaycandan daha çox qarşı tərəfin marağında olmalıdır: "Həm Ermənistan, həm də Qarabağda yaşayan haylar İkinci Qarabağ savaşından sonra baş verənlərdən, yeni reallıqlardan nəticə çıxarmalıdırlar. Onlar anlamalıdırlar ki, kimsə Azərbaycan torpaqlarında hayların yerinə vuruşmayacaq. Azərbaycan torpaqlarının hər qarışında suverenliyini təmin etmək əzmindədir. Hazırda baş verən proseslər də bunu açıq şəkildə ortaya qoyur. Böyük qayıdış prosesinin başlanmasının bir illiyi tamam olanda Prezidentin Xocalıya, Daşaltıya getməsi növbəti mərhələdə keçmiş Dağlıq Qarabağın ərazi vahidinin tərkibindəki torpaqlarımıza köç ediləcəyinin mesajı idi. Qarşı tərəf bu reallığı dərk etməlidir, çünki reinteqrasiya haqqında düşünməyin vaxtı çoxdan çatıb".

Sahib Alıyev qeyd edib ki, forumda açıq şəkildə dilə gətirilən növbəti ismarıc qərbi azərbaycanlıların doğma yurdlarına qayıdışı ilə bağlı idi: "Ermənistan Qarabağdakı haylara rahat yaşamı təmin etməkdən ötrü qərbi azərbaycanlıların ən azından Zəngəzura və Göyçə mahalına qayıtmalarının vacibliyini unutmamalıdır. Forumda həmçinin Ermənistandan geosiyasi alət kimi faydalananlara və ya faydalanmaq niyyəti güdənlərə də ünvanlanan mesajlar var idi. Bu mənada bildirildi ki, özünü vasitəçi rolunda görənlərin və görüşləri təşkil edənlərin kimliyindən asılı olmayaraq, format dəyişməyəcək. Bütün cəhdlərə baxmayaraq, Azərbaycan görüşlərdə özünəməxsus strategiyasını tətbiq edəcək. Bu istiqamətdə məqsədyönlü şəkildə irəliləyirik və yavaş-yavaş istəklərimizə nail oluruq".

Nəzrin QARDAŞXANOVA,

Azərbaycan.-2023.- 23 iyul.- S.1;4.