Xarici qonaqlar yaradılan şəraitdən və təbiət gözəlliklərindən zövq alırlar

Ölkəmizdə turizm səfərlərinin ən pik həddidir. Respublikamızın cənub bölgəsi Lənkəranda, Lerikdə,Yardımlıda, eləcə də Bakı ətrafı Xəzər çimərliklərində və istirahət yerlərində, Quba-Qusar, Şəki-Zaqatala, Gəncə-Şəmkir bölgəsində təbiət gözəlliyinə tamaşa etmək istəyən yerli və xarici ölkələrdən olan turistlərlə daha tez-tez rastlaşırıq. Bu mənada respublikamızın qərb bölgəsinin firuzə qaşı sayılan Göygöl və onun ətrafında yayılmış meşələr öz zənginliyi və füsunkarlığı ilə insanları özünə məftun edir. Məhz elə bunun üçün də bura üz tutanların sayı ilbəil artır. Hazırda yay mövsümü ilə əlaqədar Göygölə gələnlərin sayı gün ərzində 1000 nəfərə çatır ki, bu da ötən illə müqayisədə 20 faizdən çoxdur.

Füsunkar təbiəti, əsrarəngiz gözəlliyi ilə seçilən Göygöl Milli Parkına gəlmək istəyən qonaqlar, eləcə də turistlər məntəqədə qeydiyyatdan keçdikdən sonra əraziyə daxil ola bilirlər. Kəpəz dağının ətəyində yerləşən Göygöl Milli Parkına insanların rahat gəlməsi üçün hər cür şərait yaradılıb. Girişdə 3 terminal quraşdırılıb ki, bu da eyni anda 3 maşının bura daxil olmasına imkan yaradır. Bu səfalı məkana gələn qonaqların avtomobillərini rahat saxlaması üçün ərazidə xüsusi yerlər ayrılıb. Dayanacaqdan gölə kimi təxminən 700 metr məsafə var. Bu yolu piyada, elektromobillə də qət etmək mümkündür.

Göygöl Milli Parkına gələn qonaqlar üçün ən maraqlı yer gölün kənarında gəzintidir. Parkın ərazisi 12 min 755 hektardır. Burada qonaqlara Kəpəz dağına, Şanlı gölə, Qara gölə, Güzgü gölə, bir sözlə, 10 istiqamət üzrə ekoturizm marşrutu fəaliyyət göstərir. Bu marşrutların hər birinin öz proqramı var. Göygöl və Maral göldən fərqli olaraq, digər marşrutlara turistlərin gəzintisi bələdçilərin müşayiəti ilə keçirilir. Hazırda Göygöl Milli Parkına ərəblərin, türklərin və rusların gəlişi daha çox müşahidə olunur.

Xatırladaq ki, Göygöl Milli Parkında 423-dən çox bitki növü var ki, bunlardan 76-sı ağaclar və kollardır. Burada nadir qorunan bitkilər və qırmızı kitaba düşən vəhşi heyvanlar da var. Yay aylarında bu gözəlliyi görmək üçün təxminən 30 minə yaxın xarici və yerli turist Göygölə təşrif buyurur. İldə isə bu rəqəm 250 mini ötür.

Respublikamızın qərb bölgəsinə səyahət edən turistlər üçün Gəncə ilə həmsərhəd olan Şəmkir rayonu da gəzməli, görməli yerlərdən hesab edilir.

Rayon mərkəzindəki Nizami, Səməd Vurğun, İsrafil Məmmədov, Həzi Aslanov və Sabir küçəsi alman həyat tərzinin və ya Almaniyanin bir növ memoriyalıdır. Burada hər şey evlər, çəpərlər, arxlar, rənglər, ağacların küçələr boyu düzülüşü, kiçik parklar - hər detal, hər məkan insanda elə təəssürat yaradır ki, sanki tarix canlıdır, dünən heç olmayıb və almanlar yenidən Şəmkirdə qonaqdırlar.

Tarixi mənbələrdən məlum olduğu kimi, 1816-1818-ci illərdə əslən Vürtemberqdən olan almanların ilk iki koloniyası Yelenendorf (indi Göygöl rayonu) və Annenfeldin (indi Şəmkir rayon mərkəzi) əsasını qoyublar. 1888-ci ildə isə Şəmkirçayın sahilində yeni alman məskəni Georqsfeld (indiki Çinarlı qəsəbəsi) yaradılıb. 1906-cı ildə isə Gürcüstandakı almanlar da Şəmkirə köçüb və Eygenfeld, indiki İrmaşlı kəndinin əsasını qoyublar...

Bütün bu yerlər Şəmkirə gələn turistlərdə böyük maraq doğurur, xüsusən də Şəmkirdə yaşayan almanlar tərəfindən 1909-cu ildə inşa edilmiş Lüteran kilsəsi diqqət çəkir. Həzi Aslanov küçəsində yerli memarlıq abidəsi hesab edilən bu ziyarətgahda kamera orqan musiqisi zalı Kirxa neoqotik üslübda tikilib və 1941-ci ilədək kilsə kimi istifadə olunub. Turistlərdə məmnunluq doğuran həm də odur ki, son illər kilsədə yüksəkkeyfiyyətli bərpa və yenidənqurma işləri aparılıb, ərazisi abadlaşdırılıb və park salınıb.

Şəmkir şəhərində Xəqani Parkı, İstiqlal Parkı, Abidələr Parkı da turistlərin ən çox üz tutduqları ünvanlardır. Rayon icra hakimiyyətinin şöbə müdiri Rasim Mustafayev bildirir ki, son illər rayon ərazisinə gələn turistlərin sayında artım müşahidə olunur. Buna səbəb ilk növbədə dünya standartlarına uyğun yaradılan yeni parklar, hotellər, əyləncə kompleksləri, restoranlar, müasir ticarət pasajıdır. Bayraq Meydanı və Heydər Əliyev Mərkəzi yaxınlığında ümumi sahəsi 22 hektar olan parka gələnlər buranı həmişə məmnunluqla xatırlayırlar. Parkın ərazisində 7 müasir fəvvarə var, 800 metr uzunluğunda tunel tipli su kanalları yaradılıb, kanalların üzərindən 10 körpü salınıb. Parkda həmçinin süni göl mövcuddur, burada təxminən 20 min bəzək ağacı və müxtəlif növ gül əkilib.

Yerli və əcnəbi turistlər vaxtı ilə almanlar tərəfindən tikilmiş evlərin sırası ilə üzüyuxarı qalxanda İstiqlal parkı ilə qarşılaşırlar. Parkda həm də maraqlı heykəltaraşlıq kompozisiyası var: royal arxasında əyləşən dahi bəstəkar Üzeyir bəy Hacıbəyli və yanında dayanan, Dövlət himnimizin müəllifi, istiqlal şairi, repressiya qurbanı Əhməd Cavadla "həmsöhbət" olurlar. Bu istiqamətdə hərəkətdə olan turistlərin marağına səbəb ünvanlardan biri də Abidələr parkıdır. Burada kiçik ölçülərdə, Azərbaycanın ən görməli yerləri, tarixi tikililəri ucalır. Azərbaycan xəritəsini əks etdirən bu parkda Xəzər dənizini fəvvarələrlə bəzədilmiş hovuz təcəssüm etdirir.

Görünən odur ki, mövsümlə əlaqədar, yəni havalar kəskin istiləşdikcə məzuniyyət və həftəsonu istirahət günlərini səmərəli keçirmək üçün respublikamızın qərb bölgəsinə, o sıradan Gəncəyə, Şəmkirə, Gədəbəyə, Tovuza və Qazaxa gedənlər gündən-günə çoxalır.

Rəhman SALMANLI,

Azərbaycan.-2023.- 27 iyul.- S.10.