Masdar Azərbaycanda yeni layihələrə imza atır

Bu şirkət "Bakı Enerji Həftəsi"nin də fəal iştirakçısı idi

Bir neçə gün əvvəl dünyanın neft-qaz, energetika, nəqliyyat-logistika və təchizat sahələrində fəaliyyət göstərən firma və şirkətləri özlərinin təcrübələrini və qazandıqları uğurları nümayiş etdirmək üçün Bakı Ekspo Mərkəzindəki pavilyonlarda yer almışdılar.

"Bakı Enerji Həftəsi" çərçivəsində keçirilən 28-ci Beynəlxalq Xəzər Neft və Qaz, eləcə də 11-ci Beynəlxalq Xəzər Energetika və Yaşıl Enerji sərgilərindəki iştirakçılar üçün bu, çox yaxşı bir fürsət idi. Çünki bu ənənəvi sərgilər beynəlxalq əməkdaşlıq meydanı kimi çox mühüm statusunu illərdir qoruyub saxlaya bilib.

Hər il olduğu kimi, bu il də sərgiyə iştirakçı və ziyarətçilər tərəfindən böyük maraq göstərildi. Bura həm də sənaye liderlərinin görüş yeridir. Həmin liderlərin təmsil etdikləri şirkətlər Bakı Ekspo Mərkəzinin bütün mümkün pavilyonlarını, ekspozisiya zallarını və açıq sahəsini əhatə edirdi. Diqqətçəkən məqam o idi ki, builki sərgidə ötən sərgilərdən fərqli olaraq çox sayda xarici, milli və regional stendlər nümayiş olunurdu. Yeri gəlmişkən vurğulayaq ki, bu il Azərbaycan xalqının Ümummilli Lideri, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin anadan olmasının 100 illik yubileyi qeyd olunur. Prezident İlham Əliyevin imzaladığı sərəncamla 2023-cü il ölkəmizdə "Heydər Əliyev İli" elan edilmişdir. Bu mühüm hadisə də "Bakı Enerji Həftəsi"nin proqramlarında öz əksini tapmışdı. Sərginin ekspozisiyası bir neçə istiqamətdə təşkil edilmişdi: neft və qazın nəqli, hasilatı, innovativ texnologiyalar, maliyyə və hüquqi xidmətlər, kimya sənayesi, "yaşıl enerji", enerji obyektlərinin təhlükəsizliyi, ətraf mühitin mühafizəsi, enerji və digər resurslara xidmət edən texnologiyalar və s.

Sənaye rəhbərlərinin və mütəxəssislərinin yeni əməkdaşlıq əlaqələri qurduğu, sazişlər imzalandığı bu platforma həm Azərbaycanın, həm də tərəfdaş ölkələrin iqtisadiyyatının daha da inkişafına, yeni-yeni nailiyyətlərə təkan verir.

Fürsətdən istifadə edib tədbir barədə rəylərini və təəssüratlarını öyrəndiyimiz iştirakçılar da əməkdaşlıq əlaqələrini genişləndirmək, sərginin yaratdığı imkanlardan səmərəli istifadə etmək məqsədində olduqlarını vurğuladılar. Pavilyonlardan birində Birləşmiş Ərəb Əmirliklərinin "Masdar" şirkətinin məhsulları sərgilənirdi. Şirkətin Azərbaycan üzrə meneceri Murad Sadıqovla həmsöhbət olduq. O dedi:

- Bu gün burada olmaqdan çox böyük məmnunluq duyuram. Təmsil etdiyim "Masdar" şirkəti 2006-cı ildə BƏƏ hökuməti tərəfindən təsis olunub. Hazırda şirkətin üç təsisçisi var. Əsas fəaliyyət istiqamətimiz bərpaolunan enerji layihələrinin inkişaf etdirilməsindən ibarətdir. Şirkətimiz bərpaolunan enerji sahəsində həm Yaxın Şərq, həm də dünya üzrə lider olaraq BƏƏ, Səudiyyə Ərəbistanı, İordaniya, Misir, Mərakeş, Böyük Britaniya, ABŞ, Avstraliya, Serbiya, Hindistan, İndoneziya, Özbəkistan və bir çox başqa ölkələr də daxil olmaqla 40-dan çox ölkədə fəaliyyət göstəririk. İstifadə etdiyimiz texnologiyalar günəş, külək və bionerji sahəsi ilə bağlıdır. Bu gün 20 min meqavatdan artıq istehsal gücünə nəzarət etmək imkanındayıq.

"Masdar" şirkətinin Azərbaycanla tanışlığı ilk dəfə 2018-ci ildə baş tutub. Həmin il Azərbaycan hökuməti tərəfindən keçirilən tenderə dəvət almışdıq. Dəvəti məmnuniyyətlə qəbul edən "Masdar" tenderdə iştirak etmişdi. Beləliklə də Azərbaycanda çalışmağımız üçün yaranmış şəraitdən istifadə edərək fəaliyyətə başladıq. 2021-ci ildə biz 230 meqavatlıq "Qaradağ" Günəş-Elektrik Stansiyası layihəsinə imza atdıq. 2022-ci il martın 15-də Prezident İlham Əliyevin və Birləşmiş Ərəb Əmirliklərinin energetika naziri Suhail Mohamed Al Mazroueinin iştirakı ilə stansiyanın təməlqoyma mərasimi keçirildi. Ötən müddətdə işlərin sürətini artıraraq tikinti cədvəlində nəzərdə tutulan vaxtı xeyli qabaqlamağa nail olmağımız imkan verir ki, stansiyanı 2023-cü ilin sonlarınadək istifadəyə verək. Bu da şirkətimizin "Heydər Əliyev İli"ndə Ulu Öndərin yubileyinə töhfəmiz olar. Onu da deyim ki, Azərbaycanın bərpaolunan enerji potensialı yüksək olduğundan bizim gələcəkdə də burada bir sıra yeni layihələrdə iştirak etməklə bağlı planlarımız var.

Müsahibimiz Beynəlxalq Xəzər Neft və Qaz, həmçinin Energetika və "Yaşıl Enerji" sərgilərində ikinci dəfədir iştirak etdiyini də söylədi:

- Bu, bizim üçün şərəfdir. Ötən il ilk iştirakımız çox düşərli oldu. Sərgi başa çatandan dərhal sonra Azərbaycanın Energetika Nazirliyi tərəfindən Şuşada xüsusi enerji konfransı keçirildi. Həmin tədbirin iştirakçısı olduq və konfrans çərçivəsində iki yeni böyük müqavilə imzaladıq. Müqavilələr quruda günəş və külək enerjisi stansiyalarının tikintisi və dənizdə külək və yaşıl hidrogen istehsalı ilə bağlıdır. Müqaviləyə əsasən "Masdar" şirkəti Azərbaycanda 2026-cı ilədək quruda 1 qiqavat gücə malik külək enerjisi layihəsini, 2033-cü ilədək dənizdə 2 qiqavat gücə malik külək enerjisi və yaşıl hidrogen layihəsini reallaşdırmağı, habelə 2037-ci ilədək sahildə günəş enerjisi, külək və dəniz küləyindən istifadənin daha da genişləndirilməsini planlaşdırır. Biz "yaşıl enerji"nin üstünlüklərini yaxşı bildiyimizdən gördüyümüz işlərin Azərbaycan üçün çox böyük fayda verəcəyindən əminik.

Xüsusi vurğulamaq istəyirəm ki, budəfəki sərgi olduqca möhtəşəmdir və şirkətimizin gələcək işlərinə əhəmiyyətli dərəcədə təkan verəcək. Çünki burada yeni texnologiyalar və onların tətbiqi haqqında məlumat əldə edirik. Bu baxımdan özümüzü çox şanslı sanırıq. Prezident İlham Əliyev bizim pavilyona baş çəkərək işlərimizlə maraqlandı. Bu, bizi yeni nailiyyətlərə ruhlandırır.

Züleyxa ƏLİYEVA,

Azərbaycan.-2023.- 4 iyun.- S.1;7.