3,3 milyard manatlıq əlavə dəstək

Qarabağ və Şərqi Zəngəzurun bərpası, ordumuzun hərbi gücünün artırılması dövlət büdcəsinin prioritetləridir

"Bütövlükdə hesab edirəm ki, büdcəyə əlavələr ən azı 3 milyard manat səviyyəsində olacaq, ondan da çox ola bilər. Bunun əsas hissəsi Qarabağın və Şərqi Zəngəzurun yenidən qurulmasında istifadə ediləcək. İkinci yerdə bizim hərbi xərclərimiz olacaq. Çünki buna da böyük ehtiyac var".

Aprelin 18-də Salyan şəhərində Azərbaycan Televiziyasına müsahibə verdiyi zaman bu il büdcəyə əlavələrin əsas hissəsinin məhz hansı sahələrə yönəldiləcəyi ilə bağlı məlumat verən Prezident İlham Əliyev həm də bu sözləri ilə dövlətimizin birnömrəli prioritetinin Qarabağ və Şərqi Zəngəzura Böyük qayıdışı gerçəkləşdirmək, eləcə də zəfər ordumuzun gücünə güc qatmaq olduğunun, büdcə siyasətimizin qarşısındakı iki əsas çağırışın mesajını vermişdi.

Quruculuq əzmi və müdafiə qüdrəti

Artıq Milli Məclisdə 2023-cü ilin dövlət və icmal büdcəsinə dəyişikliklərin edilməsi ilə bağlı qanun layihəsi birinci oxunuşda müzakirə olunub.

İyunun 2-də Milli Məclisin İqtisadi siyasət, sənaye və sahibkarlıq, Əmək və sosial siyasət komitələrinin birgə iclası zamanı gündəliyə daxil edilən məsələlərdən biri də "Azərbaycan Respublikasının 2023-cü il dövlət büdcəsi haqqında" Azərbaycan Respublikasının Qanununda dəyişiklik edilməsi (birinci oxunuş) haqqında olub. Bildirilib ki, ölkənin müdafiə qabiliyyətinin və təhlükəsizliyinin gücləndirilməsi üçün əlavə 1 milyard 105 milyon manat vəsait tələb olunur.

Cari ilin dövlət büdcəsində işğaldan azad olunmuş ərazilərin yenidən qurulması və bərpası üçün 3 milyard manat vəsait nəzərdə tutulub. Böyük qayıdışa dair I Dövlət Proqramı ilə qarşıya qoyulan vəzifələrin həyata keçirilməsi üçün 2 milyard 260 milyon manat əlavə vəsaitin cəlb edilməsinə zərurət yaradıb.

Beləliklə, dövlət büdcəsindən Qarabağ və Şərqi Zəngəzurun bərpası işlərinə 2023-cü il üzrə ümumilikdə 5 milyard 260 milyon manat vəsait ayrılacaq.

Xatırladaq ki, 2021-2022-ci illər ərzində Qarabağ və Şərqi Zəngəzurda gerçəkləşdirilən quruculuq bərpa işləri ilə əlaqədar dövlət büdcəsindən bütövlükdə 5 milyard manata yaxın vəsait ayrılıb.

Həmçinin 2022-ci ildə müdafiə və milli təhlükəsizlik sahəsinə 5 milyard 622,5 milyon manat məbləğində vəsait yönəldilib.

Qısa vaxt ərzində mühüm nailiyyətlər

Prezident İlham Əliyevin sərəncamı ilə təsdiq edilmiş "Azərbaycan Respublikasının 2022-2026-cı illərdə sosial-iqtisadi inkişaf Strategiyası"nın icrasını təmin etmək məqsədilə, "Azərbaycan Respublikasının işğaldan azad edilmiş ərazilərinə Böyük qayıdışa dair I Dövlət Proqramı"nın təsdiq edilməsi bu istiqamətdə görüləcək işlərlə bağlı mühüm yol xəritəsi olub.

Tədbirlər Planına əsasən, tərtib edilmiş planlar üzrə bərpa qrafikinə uyğun olaraq mərhələli formada inşa edilmiş evlərə ailələrin köçürülməsi planlaşdırılır.

Həmçinin 2025-ci ilədək 10270, 2026-cı ilədək isə 34500 ailənin köçürülməsi nəzərdə tutulur.

Vətən müharibəsindən ötən iki il yarım müddət ərzində Azərbaycan dövləti qayıdışı həyata keçirmək üçün işğaldan azad edilən ərazilərdə bərpa və quruculuq prosesləri ilə bağlı mühüm işlər həyata keçirib.

Hazırda bu ərazilərdə iki beynəlxalq hava limanı tikilərək istifadəyə verilib - Füzuli və Zəngilan hava limanları. Laçın Beynəlxalq Hava Limanının isə sürətli tikintisi aparılır. Qarabağ və Şərqi Zəngəzurda yol, enerji, su və digər kommunikasiya layihələri uğurla həyata keçirilir.

Bu istiqamətdə əldə olunan ən möhtəşəm uğur isə artıq Böyük qayıdışa start verilməsi, yüzlərlə keçmiş məcburi köçkün ailəsinin Zəngilan rayonunun Ağalı, Tərtər rayonunun Talış kəndlərinə və Laçın şəhərinə qaytarılmasıdır.

"Ağıllı kənd" konsepsiyası ilə yenidən qurulmuş Ağalı kəndinə üç mərhələdə 86 ailə - 420 nəfər daimi məskunlaşma üçün köçürülüb. Ağalıya köçün dörd mərhələdə həyata keçirilməsi planlaşdırılıb.

Tərtərin Talış kəndinə isə bu il martın 16-da ilkin mərhələdə 20 məcburi köçkün ailəsi - 90 nəfər köçürülüb.

Cəmi 7-8 ay ərzində böyük hissəsi tamamilə yenidən qurulan Laçın şəhərinə ilk 20 ailə bu il mayın 27-də yerləşdirilib. Bu ayın sonuna qədər də bir çox ailələr Laçına qaytarılacaq. Ümumiyyətlə, birinci mərhələdə Laçında 4 minə yaxın insanın yaşayacağı proqnozlaşdırılır.

Bu il mayın 28-i Müstəqillik Günündə laçınlılarla doğma yurdlarında görüşən Prezident İlham Əliyev vurğuladı ki, azad edilmiş bütün ərazilərdə geniş quruculuq işləri aparılır: "Yəni bu, bir daha onu göstərir ki, biz - o torpaqların sahibləri gəlmişik qurmaq üçün, yaratmaq üçün".

Əsas vəsait bu istiqamətlərə yönəldiləcək

Qarabağ və Şərqi Zəngəzuru azadlığına qovuşduran rəşadətli Azərbaycan Ordusunun hərbi qüdrətini artırmaq, onun arsenalını ən müasir silahlarla zənginləşdirmək, eyni zamanda torpaqlarımızın etibarlı müdafiəsinin təşkili istiqamətində də dövlətimiz mühüm işlər görür.

"Müharibədən sonrakı iki il yarım ərzində də ordu quruculuğu məsələlərinə çox böyük diqqət göstərilib. Tam əminliklə deyə bilərəm ki, bugünkü Azərbaycan Ordusu 2020-ci ildə zəfər çalmış eyni Azərbaycan Ordusundan qat-qat güclüdür. Ancaq, eyni zamanda, yenə də demək istəyirəm, biz hər bir vəziyyətə hər an hazır olmalıyıq", - deyən dövlət başçısı İlham Əliyev bildirib ki, ona görə bu sahədə - ordu quruculuğu və müdafiə potensialımızla bağlı olan bütün məsələlər əsas vəzifədir, bu vəzifə və Qarabağın, Şərqi Zəngəzurun bərpası vəzifəsi. Ona görə biz əsas vəsaiti bu istiqamətlərə yönəldəcəyik, lazım olan digər xərclər də aparılacaq.

Bütün bunlar isə bir daha göstərir ki, Azərbaycan dövləti gün keçdikcə həm hərbi qüdrətini artırır, həm də işğaldan azad edilən ərazilərdə sürətli quruculuq bərpa işləri həyata keçirərək Böyük qayıdışa addımbaaddım yaxınlaşır.

Yasəmən MUSAYEVA

Azərbaycan.- 2023.- 6 iyun.- S.1; 5.