Azərbaycanın qətiyyəti sülhü də bərqərar edəcək

Təcavüzkar Hayastan torpaqlarımızı işğal altında saxladığı 30 il ərzində olduğu kimi, 44 günlük müharibədən sonra da riya və məkrlə iki ölkə arasında sülhün əldə olunmasına maneçilik yaradır, barışığa əngəl olmaq üçün ölkəmizə qarşı davamlı hərbi təxribatlar törədir.

Hayastan postmüharibə dövründə də yalan ritorikasını davam etdirir, ölkəmizə qarşı böhtan xarakterli ittihamlar səsləndirir, beynəlxalq qəhmərçilərinə "bəyanat" adı altında kağız parçaları qəbul etdirməyə çalışır.

Bir sözlə, haylar bütün bu murdar əməlləri ilə həyasızcasına Azərbaycana qarşı ərazi iddialarının bitmədiyini nümayiş etdirirlər. Son günlərdə Hayastanın sərhədyanı bölgələrimizdə hərbi təxribatlar törətməsi də İrəvanın çirkin və xəbis əməllərinin, fitnəkar hayların bölgədə davamlı sülhə qarşı olmalarının göstəricisidir.

Hay "taktika"sı

Müdafiə Nazirliyindən verilən məlumata əsasən, mayın 10-u axşam saatlarında Ermənistan silahlı qüvvələrinin bölmələri Zod istiqamətində yerləşən mövqelərindən Azərbaycan Ordusunun üzbəüz mövqelərini müxtəlif növ atıcı silahlardan intensiv atəşə tutmaqla qəsdən təxribat törədib və bu təxribat nəticəsində Azərbaycan Ordusunun hərbi qulluqçusu ağır yaralanıb.

Ermənistan tərəfinə təxribatlarına son qoyulması və qəsdən vəziyyəti gərginləşdirməməsi barədə xəbərdarlıq edilməsinə baxmayaraq, mayın 11-i səhər saatlarından etibarən Ermənistan silahlı qüvvələri vəziyyəti daha da gərginləşdirərək Azərbaycan Ordusunun mövqelərini minaatanlardan atəşə tutub, təxribatlar nəticəsində bir nəfər hərbi qulluqçumuz həlak olub.

Hayastanın bu təxribat əməllərini törətdiyi zamana diqqət etdikdə isə riyakar hayların çirkin planları gün kimi ortaya çıxır.

Diqqət edin: mayın əvvəllərində Vaşinqtonda Hayastanla Azərbaycan xarici işlər nazirləri sülh prosesi çərçivəsində bir neçə gün danışıqlar apardı və əksər siyasi şərhçilər bu danışıqları sülh sazişinin bağlanması istiqamətində atılan müsbət addım kimi dəyərləndirdilər.

Azərbaycan və Hayastan liderləri mayın 14-də Brüsseldə görüşəcəklər. Eyni zamanda yekun razılıq olmasa da, iyunun 1-də Kişinyovda keçiriləcək Avropa Siyasi İcmasının iclası çərçivəsində də Azərbaycan və Hayastan liderlərinin görüşü mümkündür.

Bəs Cənubi Qafqazda sülhün əldə olunması üçün danışıqların intensivləşdiyi, eyni zamanda liderlər arasında baş tutması planlaşdırılan danışıqlar ərəfəsində məkrli Hayastan nə etdi? Həmişəki kimi iyrənc "taktika"sına əl ataraq ölkəmizə qarşı hərbi təxribatlar törədib sülh razılaşmasına zərbə vurmağa çalışdı.

İrəvan sülh danışıqlarına xələl gətirir

44 günlük müharibədə BMT Təhlükəsizlik Şurasının qəbul etdiyi 4 qətnaməsini Azərbaycan özü icra edərək torpaqlarının 30 illik işğalına son qoydu. Ölkəmiz müharibədən sonra yüksək humanizm nümayiş etdirərək məğlub Hayastana sülh təklif edərək iki dövlət arasında normallaşmaya nail olunması üçün mühüm təşəbbüslərlə çıxış edib.

Xatırladaq ki, 2020-ci il 10 noyabr və 2021-ci il 11 yanvar bəyanatlarından sonra Azərbaycan Prezidenti İlham Əliyev, Hayastanın baş naziri Nikol Paşinyan və Rusiya Prezidenti Vladimir Putin 2021-ci ilin 26 noyabrında Soçi Bəyanatını imzalayıblar. Eləcə də Avropa İttifaqının vasitəçiliyi ilə 2021-ci ilin dekabrından başlayan "Brüssel prosesi" sayəsində üçtərəfli bəyanatlarda nəzərdə tutulan məsələlərin real müstəvidə həlli ilə bağlı əhəmiyyətli irəliləyişlərə nail olunub. Bu prosesdə Azərbaycan regionda təhlükəsizliyin, əməkdaşlığın, rifahın təmin edilməsi yönündə mühüm təşəbbüslər irəli sürüb.

Lakin ötən il dekabrın 7-də keçirilməsi planlaşdırılan və sülhlə bağlı böyük gözləntilərin olduğu növbəti Brüssel görüşü Paşinyanın bilərəkdən etdiyi barışığa xələl gətirən tələbi ilə baş tutmadı. Ötən ilin payızında Soçidə keçirilən görüşdə üzdə sülhə razı olduğunu göstərən Paşinyan əməldə bunun əksini nümayiş etdirib.

Rəsmi İrəvan istisnasız olaraq sülh razılaşması ilə bağlı aparılan və aparılacaq danışıqlar ərəfəsində Azərbaycana qarşı hərbi təxribatlar törədərək sülhə əngəl olmağa çalışıb. Ötən ilin sentyabrında ölkəmizə qarşı növbəti hərbi təxribat da buna sübutdur. Düzdür, Hayastanın Azərbaycana qarşı istənilən təxribatının qarşısı layiqincə alınıb. Amma o da reallıqdır ki, Hayastanın bu əməlləri bölgədə davamlı sülhə xələl gətirir.

"Dəmir yumruq" yerindədir

Hayastan bütün bu əməlləri ilə sülh razılaşmasını imzalamaqdan yayınmağa çalışır. 44 günlük müharibədəki biabırçı məğlubiyyətindən dərs çıxarmayaraq, Azərbaycana qarşı ərazi iddialarını davam etdirmək, xəstə erməni təfəkkürü ilə sülh razılaşmasının imzalanmasını sonsuzadək uzatmaq istəyir. Amma ipi başqalarının əlində olan, bütün iqtisadi, siyasi, sosial, hərbi sferalarda məhvə məhkum olan Hayastan düşünmür ki, sülh razılaşması onun da mənafeyinə xidmət edir və yalnız bu sayədə dalan, səfil ölkə olmaqdan qurtula bilər...

Hələlik görünən odur ki, Hayastan qəti şəkildə sülh istəmir. Və Prezident İlham Əliyevin söylədiyi kimi, əgər Ermənistan sülh istəmirsə, sülh olmayacaq... Bu hal isə nə Ermənistan, nə də region üçün yaxşı olmayacaq.

Qüdrətli Azərbaycan müharibə meydanında qalib gələrək suveren ərazilərini bərpa edib, siyasi platformada milli maraqlarını qətiyyətlə təmin edib və edəcəkdir. Eyni zamanda hazırda ölkəmiz qarşısına qoyduğu milli prioritetə əsasən işğaldan azad etdiyi əraziləri minalardan təmizləyərək, o yerlərdə yenidən həyatın var olması üçün mühüm layihələr həyata keçirir, sakinlərinin qayıdışını gerçəkləşdirir.

"Dəmir yumruq" da ki öz yerindədir və beynəlxalq havadarlarına güvənərək ölkəmizə qarşı təxribat törətmək istəyən axmaq Hayastanın hər zaman layiqli cavabını verərək yerinə otuzdurur. Necə ki son təxribatı da Hayastana baha başa gəldi.

Yasəmən MUSAYEVA,

Azərbaycan.-2023.- 13 may.- S.1;5.