İndi də Kanada buqələmunluq edir

Qərəz dolu çirkin kampaniyalar eyni mərkəzdən idarə olunur

Azərbaycana qarşı məkrli siyasətin, ikili standartların daim şahidi oluruq. Xüsusən Vətən müharibəsindəki qələbəsi ilə Azərbaycanın ərazi bütövlüyünü öz gücü hesabına bərpa etməsi, erməni terrorçularını ərazilərindən qovması, sərhədləri təmin etməsi bir sıra dövlətlərdə qıcıq yaradıb.

Cənubi Qafqazda münaqişə ocağının qalmasında maraqlı tərəflər İkinci Qarabağ savaşından sonra məqsədlərinə çatmaq üçün xüsusilə çalışırlar. Onlar Ermənistana həm mənəvi, həm də maddi dəstək göstərərək hər vəchlə regionda sülhün və təhlükəsizliyin yaranmasına mane olmağa çalışırlar. Müxtəlif dairələrin oyuncağına çevrilən Ermənistan isə belələrinin təzyiq və təsirlərindən çıxmayaraq hər cür yaramazlığa əl atır.

Ötən həftə Ermənistanda səfərdə olan Kanada xarici işlər naziri Melani Jolinin də Azərbaycan əleyhinə çıxışları, əsassız ittihamları artıq təəccüb doğurmur. Çünki zaman-zaman bu ölkənin də qərəzli, əsassız fikirləri ilə üzləşirik. Ermənipərəst siyasətçi dost ölkəsində Azərbaycana qarşı aqressiv və qərəzli çıxış edərək ölkəmizi ermənilərin deportasiyasında günahlandırıb.

Mövzu ilə bağlı "Azərbaycan" qəzetinə açıqlama verən Milli Məclisin deputatı Sahib Alıyev bildirib ki, Kanada xarici işlər nazirinin hər hansı diplomata başucalığı gətirməyəcək çıxışı, əslində, Azərbaycandan daha çox guya dəstəklədikləri Ermənistanın və ilk növbədə özlərinin əleyhinə yönəlib.

Deputat qeyd edib ki, hamı Kanada XİN rəhbərinin Ermənistana gəlişinin, orada səfirlik açmalarının arxasında heç də həmin ölkənin deyil, başqalarının marağı və təhriki olduğunu gözəl bilir: "Kanada benilüks ölkələri və Fransa üçün hansı funksiyanı yerinə yetirirsə, onlardan daha çox ABŞ-dən asılı vəziyyətdədir və Vaşinqtonun tapşırıqlarını yerinə yetirir. Bu səfərdə də Kanada xarici işlər nazirinin Azərbaycan əleyhinə açıqlama verməsi tapşırığı Vaşinqtondan gəlib. Bəzən Qərbdə böyük dövlətlər çalışırlar ki, "seyidəhmədləri" irəli versinlər. Elə Kanada bu baxımdan ABŞ üçün "seyidəhməd" rolunu oynayır".

Azərbaycanın belə əsassız davranışları cavabsız qoymayacağını vurğulayan S.Alıyev deyib ki, bunun ən azı asimmetrik cavabları olacaq. Təbii ki, Ermənistana da bunun heç bir xeyri yoxdur: "Ümumiyyətlə, Kanadaya belə bir tapşırıq verənlərin məqsədi, əslində, Ermənistana dəstək deyil. Açığını desək, bu Ermənistanın evini yıxmaqdır. Üzdə haylara sevgi sərgiləyib arxada onları regiondakı reallıqla hesablaşmağa qoymamaq, yeni qarşıdurmalara sürükləmək Ermənistanın başını yenidən əzdirməyə xidmət etməkdir".

Deputat qeyd edib ki, nə Fransa, nə ABŞ, nə də regionda marağı olan digər böyük dövlətlər Azərbaycanla Ermənistan arasındakı qarşıdurmanın tam aradan qalxmasında, özləri dedikləri kimi dayanıqlı və davamlı sülhün yaranmasında qətiyyən maraqlı deyillər. Onlar davamlı qarşıdurmada, həmin qarşıdurmanın idarə olunmasında, o idarəçilikdən faydalanaraq Azərbaycanla Ermənistana təzyiq göstərib regionda maraqlarını qoruyub saxlamağa çalışırlar.

"Kanada xarici işlər nazirinin diplomata yaraşmayan açıqlaması ilə eyni vaxtda ABŞ və Avropa İttifaqının səfirləri Zəngəzurda peyda olublar. Onlar da haylar üçün təsəlli sayıla biləcək açıqlamalar veriblər. Bütün bunlar onu göstərir ki, bu cür hərəkətlər eyni mərkəzdən idarə edilir, həmin mərkəzin əsas niyyəti haylara dəstəkdən daha çox onları öz alətinə çevirmək, Azərbaycan və Türkiyə ilə əlaqələri tam normallaşdırmağa qoymamaq və regiondakı gərginliyi qoruyub saxlamaqdır", - deyə deputat əlavə edib.

Əsmər QARDAŞXANOVA,

Azərbaycan.-2023.- 1 noyabr, № 239.-S.5.