Hayastanda fərarilik leqallaşdırılır

37 min dollar ödə, hərbi xidmətə getmə

Ermənistanda həmişəki kimi yenə də silahlı qüvvələrdə böyük problemlər yaşanır. Məğlub ölkənin ordusu istər döyüş qabiliyyəti, istərsə də təminat baxımından yenə ciddi çətinliklərlə üzləşib. Ölkədə yaşanan demoqrafik problem səbəbindən ordunun şəxsi heyətlə təminatı sürətlə pisləşməkdə davam edir.

Digər tərəfdən orduda yaranan xaos səbəbindən gənclərin silahlı qüvvələrdə xidmətdən yayınması adi hal alıb. Belə vəziyyətdə ordudan yayınanların sayının artması bu xüsusda qaldırılan cinayət işlərinin də sayının artmasına səbəb olub.

Elə bunun nəticəsidir ki, son vaxtlar Hayastanda pul qarşılığında hərbi xidmətdən azadolma haqqında qanun layihəsi geniş müzakirə mövzusuna çevrilib. Fərariliyin, hərbi xidmətdən yayınmaların baş alıb getdiyi bir vaxtda Hayastanda yeni qanun layihəsi hazırlanır. Parlamentdə hakim "Vətəndaş müqaviləsi" fraksiyasının nümayəndəsi Ayk Sarkisyanın hazırladığı qanun layihəsinə görə, 27-37 yaşarası hərbi xidmətdən yayınanlar Hayastanda orduda xidmət etməklə və ya büdcəyə pul köçürməklə cinayət təqibindən yayına bilərlər.

Bunun üçün bir neçə variant təklif edilib. Belə ki, 12 ay xidmətlə yanaşı, 6,2 min dollar, 6 ay xidmətlə yanaşı, 12,4 min dollar, 1 ay xidmətlə 24,8 min dollar və hərbi xidmət əvəzinə 37,5 min dollar ödəniləcək.

Ermənistanda İkinci Qarabağ müharibəsindən sonra 27-35 yaşarası 3225 vətəndaşın orduda xidmətdən yayındığına görə axtarışda olduğu açıqlanmışdı. Yerdə qalan hərbi xidmətdən qaçan minlərlə insan isə 27 yaş həddinə çatmayan gənclərdir. Hazırkı vəziyyətə olan məlumatlara əsasən, məcburi hərbi xidmətdən yayınmalarına görə 10 min erməni gənci axtarışdadır. Hayastan qanunvericiliyinə görə, həqiqi hərbi xidmət keçməyən, lakin yaşı 27-yə çatan vətəndaşlar cinayət məsuliyyətindən qaçmaq üçün 1,8 milyon dram və ya 3700 ABŞ dolları məbləğində cərimə ödəməlidirlər. Əks təqdirdə onlar həbs edilirlər.

Erməni mediası yazır ki, orduda xaos davam etdikcə, ölkədən daha çox sayda gəncin qaçışını gözləmək mümkündür. Hökumətin pul müqabilində onları cinayət məsuliyyətindən azad etmək niyyəti isə hansısa nəticə verməyəcək. "4rd.am" saytı dərc etdiyi məqalədə son bir ildə orduda baş verən neqativ halları şərh edərkən maraqlı faktlar açıqlayıb. Qeyd edilib ki, cari ildə Hayastan ordusunda özünə qəsd hallarının sayı 15-i ötüb: "Ümumilikdə isə orduda ölən əsgərlərin sayı 60-dan çoxdur. Əgər bir əsgər öz canına qıyırsa, demək, bunun arxasında kifayət qədər müəmmalı, şübhəli hallar var. Eyni zamanda əsgər-komandir inamsızlığı, etimadsızlığı mövcuddur və nizamnamədən kənar hallar baş verir. Valideynlər tərəfindən daxil olan şikayətlərin əksəriyyətini komandirlərin sıravi heyət üzərində zorakılıq hallarının olması təşkil edir. Yəni əsgərlər alçaldılırlar və döyülürlər".

Bütün bunların fonunda orduda fərarilik hallarının sayının artması təbii sayılır. Hesab edilir ki, qarşıdakı dövr ərzində erməni ordusunda daha böyük problemlərin qeydə alınması qaçılmazdır.

Elçin CƏFƏROV,

Azərbaycan.-2023.- 1 noyabr, № 239.-S.4.