44 günlük Vətən
müharibəsində qazanılan
zəfərdən sonra
dövlətimizin mühüm
hədəflərindən biri
işğaldan azad edilmiş ərazilərimizin
bərpası və keçmiş məcburi köçkünlərin doğma
yurdlarına qayıdışını
təmin etmək idi. Son üç
il ərzində reallaşdırılan layihələr
onu deməyə əsas verir ki, qarşıya qoyulan vəzifələrin
öhdəsindən layiqincə
gəlinir.
Ötən il Prezident İlham Əliyevin müvafiq sərəncamı ilə
təsdiq edilən Böyük qayıdışla
bağlı 2022-2026-cı illəri
əhatə edən dövlət proqramının
icrası işğaldan
azad edilmiş torpaqlarımıza yenidən
həyatın qaytarılmasında
mühüm rola malikdir. Proqramın əsas hədəfi ilk beşillikdə 34 min 500 ailəni azad edilmiş ərazilərə köçürməkdir.
Bu istiqamətdə məqsədyönlü tədbirlər
həyata keçirilir.
İndiyədək 175 ailə (871 nəfər) Zəngilan rayonunun Ağalı kəndinə,
20 ailə (90 nəfər)
Tərtər rayonunun Talış kəndinə,
315 ailə (1205 nəfər)
Laçın şəhərinə,
258 ailə (928 nəfər)
Füzuli şəhərinə,
21 ailə (94 nəfər)
Laçın rayonunun
Zabux kəndinə köçürülüb. Bugünədək
3188 keçmiş məcburi
köçkünün həsrət
və nisgilinə son qoyulub.
Hər bir köçkünü sevindirən
Prezident
Otuz illik işğal dövründə
düşmən tapdağı
altında qalan torpaqlarımız, şəhərlərimiz,
yaşayış məntəqələri
və infrastruktur obyektlərimiz tamamilə dağıdılmış, milli-mədəni
irsimiz məhv olunmuş, təbii sərvətlərimiz talan
edilmiş, 1 milyondan artıq soydaşımız
evlərindən didərgin
salınmışdır.
Ermənistanın hərbi
təcavüzü nəticəsində
doğma torpaqlarından
didərgin düşən
vətəndaşlarımızın həyat şəraitinin yaxşılaşdırılması daim Prezident İlham Əliyevin diqqət mərkəzində
olmuşdur. Hələ
2003-cü ildə prezident
seçkiləri ərəfəsində
"bir dənə də olsun çadır
düşərgəsi qalmayacaq",
- deyən Prezident İlham Əliyev verdiyi vədə əməl edərək,
2007-ci ildə ölkədəki
sonuncu çadır şəhərciyini ləğv
etmiş, məcburi köçkünlər üçün
bütün infrastruktura
malik yeni qəsəbələr saldırmışdı.
Artıq üç ildir ki, məcburi
köçkünlər sözü
də tarixə qovuşub.
2020-ci il sentyabrın
27-də Ermənistanın növbəti
hərbi təxribatına
cavab olaraq Azərbaycan Ordusu əks-həmlə əməliyyatına
başlamış və
44 gün davam edən Vətən müharibəsi nəticəsində
torpaqlarımız işğaldan
azad olunmuş, ölkəmizin ərazi bütövlüyü bərpa
edilmişdir.
Azərbaycan torpaqlarını
azad etməklə inkişafının irimiqyaslı
bərpa-quruculuq layihələri
ilə səciyyələnən,
dayanıqlı sülhə,
tərəqqiyə əsaslanan
və bir çox ölkə üçün nümunə
olan yeni mərhələsinə qədəm
qoyub. Uzun illər yurd həsrəti çəkən
vətəndaşlarımız artıq mərhələli
olaraq torpaqlarına dönürlər.
Prezident seçildiyi
ilk gündən Ulu Öndər Heydər Əliyevin siyasətini davam etdirəcəyinə, hər
bir vətəndaşın
Prezidenti olacağına,
düşmən işğalı
altında qalan torpaqlarımızı azad
edəcəyinə söz
verən İlham Əliyev vədinə əməl etdi.
Köçürülən sakinlər müvafiq qurumlar tərəfindən
peşə ixtisaslarına
və bacarıqlarına
uyğun şəkildə
işlə təmin edilirlər. Onlar müxtəlif dövlət
qurumlarında, ictimai-iaşə
obyektlərində, tikinti
şirkətlərində, tikiş fabrikində və digər yerlərdə çalışırlar.
Köçürülmüş əhali üçün bütün infrastruktur şərait - dövlət
xidmətləri mərkəzi,
məktəb, bağça,
bank, poçt, ictimai iaşə obyektləri və s. imkanlar mövcuddur.
"Atam 18 yaşında
Laçın şəhərindən
çıxmışdı, mən isə 18 yaşımda doğma ata-baba yurduma qayıdıram"
Prezident İlham
Əliyevin tapşırığına
uyğun olaraq, yenidən qurulan Laçın şəhərinə
keçmiş məcburi
köçkünlərin qayıdışı
davam edir. Oktyabrın 30-da növbəti
köç karvanı
Bakı şəhərinin
Qaradağ rayonundakı
"Qobu park 3" yaşayış kompleksindən
yola salınıb. Bu mərhələdə Laçın şəhərinə
daha 20 ailə - 70 nəfər köçürülüb.
Köçürülən ailələr Laçın
şəhərində vaxtilə
yaşadıqları, işğala
son qoyulduqdan sonra dövlət başçımızın göstərişi
əsasında bərpa
edilən və ya yenidən tikilən evlərdə məskunlaşacaqlar. Bununla
da Laçın şəhərində 315 ailə,
yəni 1205 nəfərin
daimi məskunlaşması
təmin edilib.
Laçın sakini
Özal Həsənzadə
deyir ki, valideynləri Laçında
doğulub boya-başa
çatıblar: "Atam
18 yaşında Laçın
şəhərindən çıxmışdı,
mən isə indi 18 yaşımda doğma ata-baba yurduma qayıdıram. Şəhid və qazi analarının əllərindən öpürəm.
Onların sayəsində
bu günləri yaşayırıq".
Keçmiş məcburi
köçkün Sevda
Abbasova doğma yurduna qayıtdığına
hələ də inana bilmədiyini söyləyir. Oğlunun könüllü olaraq müharibəyə getdiyini
və "Laçının
azad olunmasına görə" medalına
layiq görüldüyünü
vurğulayan S.Abbasova
31 ildən sonra təhlükəsiz şəkildə
doğma yurdlarına qayıtmalarına imkan yaradıldığı üçün
Prezident, Müzəffər
Ali Baş Komandan İlham Əliyevə və torpaqlarımızı işğaldan
qurtaran rəşadətli
Azərbaycan Ordusuna, qəhrəman əsgər
və zabitlərimizə
minnətdarlığını bildirir, bu yolda
canlarından keçən
şəhidlərimizə Allahdan
rəhmət diləyir.
Böyük köç
davam edir
Sürətlə reallaşan
Böyük qayıdış
plana uyğun və mərhələli şəkildə davam edir. İşğaldan azad edilmiş ərazilərimizə qayıdan
ailələrin, insanların
sayı günü-gündən
artır. Demək olar ki, hər
ay, hər həftə onlarla ailə yurduna qovuşur.
Xatırladaq ki,
ötən şənbə,
oktyabrın 28-də Zəngilan
rayonunun Ağalı kəndinə də növbəti köç
karvanı yola salınıb. İndiyədək
Bakı, Sumqayıt şəhərlərində və
Abşeron rayonunda müvəqqəti məskunlaşmış
25 ailə (127 nəfər)
bundan sonra doğma yurdda yaşamağa davam edəcək. Onlar ermənilərin işğal
dövründə tamamilə
dağıdılan 1-ci, 2-ci və 3-cü Ağalı
kəndlərinin sakinləridir.
Evlərin bölgüsü
məcburi köçkünlərə
yeni yaşayış
sahələrinin verilməsinin
hazırda qüvvədə
olan qaydaları əsasında, şəffaflıq
və ədalətlilik
prinsipləri əsasında
püşkatma ilə
aparılıb. Bununla
da indiyədək Ağalı kəndində
daimi məskunlaşdırılan
ailələrin sayı
175-ə (871 nəfərə) çatıb.
Heç şübhəsiz
ki, qısa müddətdə bu qədər işlərin
görülməsi, saysız-hesabsız
nəhəng layihələrin
reallaşdırılması ölkəmizin qüdrətindən,
iqtisadi potensialından
xəbər verir. Böyük qayıdış
proqramı sona qədər beləcə uğurla davam edəcək və daha neçə-neçə
ailə dədə-baba
yurduna qovuşacaq.
Ülkər XASPOLADOVA,
Azərbaycan.-2023.- 1 noyabr,
№ 239.- S.6.