5 prinsipin yerinə yetirilməsi dəyişməz şərtdir

"Lokal antiterror tədbirləri nəticəsində Xankəndidə Azərbaycan bayrağının dalğalandırılması ilə suverenliyimiz tam bərpa olundu. Bundan sonra əsas gündəm sülh müqaviləsinin imzalanmasıdır. İndiyədək sülh danışıqları müxtəlif platformalarda, Rusiya və Avropanın vasitəçiliyi ilə keçirilib. Bu gün artıq elə bir vəziyyət yaranıb ki, Azərbaycanla Ermənistan arasında sülh müqaviləsinin imzalanması üçün heç bir əngəl yoxdur. Müqaviləyə imza atmaq üçün Azərbaycan tərəfinin təklif etdiyi beş baza prinsipinə əməl etmək kifayətdir".

Bu fikirləri "Azərbaycan" qəzetinə açıqlamasında Milli Məclisin deputatı Arzu Nağıyev deyib. Deputat qeyd edib ki, sentyabrın 19-20-də reallaşdırılan antiterror tədbirləri sülh sazişinin imzalanması üçün yeni imkanlar yaradıb. Bu imkanlardan yaxşı mənada faydalanıb regionda sülh və əmin-amanlığın bərpasına qısa zamanda nail olmaq lazımdır.

Arzu Nağıyev bildirib ki, yeni reallıqlar fonunda Ermənistan tərəfi bir daha başa düşməlidir ki, sülhün bərqərar olmasının onların özlərinə daha çox xeyri dəyər. Təklif etdiyimiz 5 prinsipin yerinə yetirilməsi şərtdir. Bu qəbul olunandan sonra vəziyyət normallaşacaq, Zəngəzur dəhlizi açılacaq, digər məsələlər də həllini tapacaq. Ona görə də vaxtı uzatmadan ən düzgün və optimal yolu seçib sülhə gəlməyin tam zamanıdır.

"Sadəcə olaraq Ermənistanda baş verən daxili çəkişmələr, həyata keçirilən uğursuz daxili və xarici siyasət, revanşist ideyalar sülhə əngəl törədərək onların tərəqqi yolunu bağlayır. Bundan başqa, Qarabağdan gəlmiş ermənilərlə yerli ermənilər arasında yaranan narazılıqlar, onlara "qaçqın" statusunun verilməsi ilə bağlı absurd işlərlə məşğul olmaq ermənilərin bu fürsəti əldən qaçırmalarına səbəb ola bilər. Nəzərə almaq lazımdır ki, hazırkı mövcud vəziyyət Ermənistan üçün əsl fürsətdir. Çünki antiterror tədbirləri nəticəsində Azərbaycan istəyinə nail olub, üstəlik, Zəngəzur dəhlizinə alternativ yol çəkilir. Yəni bundan sonrakı mərhələdə Ermənistanın sülhdən yayınması Azərbaycanı maraqlandırmaya bilər. Azərbaycan özü təkbaşına haqq-ədaləti bərpa etmək gücündədir", - deyə deputat vurğulayıb.

Arzu Nağıyev onu da deyib ki, Ermənistan Fransa və digər havadarlarının əlində alətə çevrilib. Onlara hamilik edən təşkilat və ölkələr lazım gələndə regionda öz maraqlarını təmin etmək üçün Ermənistandan sui-istifadə edirlər.

"Ermənistan rəhbərliyi düşünməlidir ki, bu gün sülh sazişinin imzalanmaması, kommunikasiyaların açılmaması onu nə qədər geri atır. Boş vədlər verilməsinə baxmayaraq, kimsə onların iqtisadiyyatını dirçəldən deyil. Nəzərə almaq lazımdır ki, hər ölkənin öz maraqları var. Eyni zamanda erməniləri silanlandırmaq da onları boyunduruğa salmaq, gələcəkdə asılı vəziyyətə qoymaq niyyətindən irəli gəlir. Ermənistan bu gedişlə müstəmləkə siyasətinin qurbanına çevrilə bilər. Ona görə də onun yeganə yolu Azərbaycanla sülh müqaviləsi imzalamaqdır", - deyə deputat qeyd edib.

Arzu Nağıyev söyləyib ki, sərhədlərimizdən çox da uzaqda olmayan ərazilərdə müharibələrin baş verməsi də sülh müqaviləsinin imzalanması üçün əsl məqamın yetişdiyini sübut edir: "Əks halda, ermənilər əbədi olaraq problemlər və çətinliklərlə yaşamağa məhkum olacaqlar. Azərbaycan bu gün diktə edən, qalib tərəfdir və sülhün bərqərar olması üçün bütün humanist addımları atır. Ermənistan hakimiyyəti də buna adekvat addımlar atmalıdır".

N.QAFARZADƏ,

Azərbaycan.-2023.- 2 noyabr, № 240.- S.6.