Yerini bilməyən Kanada

"ABŞ-nin ştatı" kimi ad çıxaran bu ölkə indi də Fransanın departamentinə çevrilib

"Son zamanlar Kanadanın ölkəmizə qarşı aqressiv mövqeyi açıq-aydın ortadadır. Xüsusilə də Frankofoniya təşkilatı çərçivəsində bu ölkənin Azərbaycan əleyhinə atdığı addımlar regionda vəziyyəti daha da gərginləşdirmək məqsədi daşıyır. Görünən odur ki, Kanada son zamanlar tamamilə Fransanın əlində oyuncağa çevrilib. Yoxsa necə olur ki, ümumiyyətlə Cənubi Qafqazla heç bir əlaqəsi olmayan, regionda baş verən hadisələrə heç vaxt reaksiya verməyən Kanada birdən-birə buradakı hadisələrə müdaxilə etmək niyyətinə düşüb?! Ermənistana dəstək verir, Azərbaycana qarşı isə kəskin mövqe nümayiş etdirir. Deməli, Kanada bilavasitə Fransanın maraqlarını həyata keçirməklə məşğuldur".

Bu fikirləri "Azərbaycan" qəzetinə açıqlamasında Milli Məclisin deputatı Tural Gəncəliyev deyib. Deputat qeyd edib ki, Kanada Frankofoniya təşkilatı çərçivəsində özünü Fransanın əyaləti kimi aparır, sanki Fransanın yeni bir departamenti rolunu oynayır.

Tural Gəncəliyev vurğulayıb ki, Kanada cəmiyyəti təkcə fransızlardan ibarət olmadığına görə, bu ölkənin Parisin maraqlarına xidmət edən davranışlar sərgiləməsi öz cəmiyyətləri üçün də ədalətli deyil. Kanadada məskunlaşmış fransız sülalələrinin təmsilçilərinin Ermənistanın müdafiəçisi kimi çıxış etməsi ona dəlalət edir ki, onlar Kanadanın dövlət maraqlarına zidd mövqedən çıxış edirlər.

"Kanadanın xarici işlər nazirinin bir neçə gün əvvəl Azərbaycan əleyhinə əsassız fikirlər səsləndirməsini, bu ölkənin destruktiv fəaliyyətini Fransanın təsiri ilə əlaqələndirmək olar. Yoxsa regiona, ümumiyyətlə, dəxli olmayan, Cənubi Qafqazla heç bir coğrafi əlaqəsi olmayan bir ölkənin işğal siyasətinə qarşı çıxmaq əvəzinə ermənilərə dəstək verməsi anlaşılan deyil. Ona görə də Atlantik okeanının o biri tayından ölkəmizin daxili işlərinə müdaxilə etməyə cəhd göstərən Kanadanın bu kimi davranışları bütün platformalarda ifşa olunmalıdır", - deyə müsahibim söyləyib.

Deputatın sözlərinə görə, əvvəllər "ABŞ-nin ştatı" kimi ad çıxaran, yəni heç bir xarici siyasət mövqeyi olmayan, passiv siyasət yürüdən Kanada Fransanın departamenti rolunda çıxış etməklə beynəlxalq hüququn norma və prinsiplərini pozan Ermənistana dəstək nümayiş etdirir. Lakin unudur ki, bu siyasəti Cənubi Qafqazda iflasa uğrayacaq. Çünki regionda söz sahibi Azərbaycandır və ölkəmizə qarşı haqsız mövqedən çıxış etmək, əsassız bəyanatlar vermək öz xeyirlərinə nəticə verə bilməz.

Tural Gəncəliyev, həmçinin onu da qeyd edib ki, Azərbaycan heç bir ölkənin, Cənubi Qafqaza aidiyyəti olmayan hər hansı dövlətin regionun daxili işlərinə müdaxilə etməsinə imkan verməyəcək. Fransa artıq bunu duyub, ona görə də hər vasitəyə əl atır. Cəhdləri alınmadığı üçün əlinin altında olan Kanada kimi "resurs"lardan faydalanmağa çalışır. Lakin unudur ki, regionda sülh və əmin-amanlığın bərpasına əngəl törətmək üçün atılan bütün addımlar nəticəsiz qalacaq.

N.QAFARZADƏ,

Azərbaycan.-2023.- 3 noyabr, № 241.- S.5.