Gələn il cəmi 7 rayon büdcədən maliyyələşəcək

Milli Məclisin komitələrində büdcə müzakirələri başlayıb. "Azərbaycan Respublikasının 2024-cü il dövlət büdcəsi haqqında" qanun layihəsi birinci oxunuşda plenar iclasa tövsiyə olunub.

Mövzu ilə bağlı qəzetimizə danışan Milli Məclisin deputatı Vüqar Bayramov bildirib ki, 2024-cü ilin dövlət büdcəsinin prioritet istiqamətlərindən biri də Qarabağ və Şərqi Zəngəzurun bərpa və yenidənqurulması və müdafiə və təhlükəsizliyinin daha da gücləndirilməsi ilə bağlıdır. Gələn ilin büdcəsində müdafiə və təhlükəsizliyin gücləndirilməsi ilə bağlı 6,5 milyard manata yaxın, Qarabağ və Şərqi Zəngəzurun bərpasına isə 4 milyard manat vəsaitin ayrılması nəzərdə tutulur. Yəni praktiki olaraq işğaldan azad olunmuş ərazilərin, eləcə də müdafiə qabiliyyətinin gücləndirilməsi ümumi büdcə xərclərinin təxminən üçdəbirini təşkil edəcək.

"Bu ondan xəbər verir ki, işğaldan azad olunmuş ərazilərimizdə məskunlaşma prosesinin daha da sürətlənməsini müşahidə edəcəyik. Həmin ərazilərdə daha intensiv şəkildə aparılacaq bərpa və quruculuq işləri nəticəsində 2024-cü ildə daha çox vətəndaşımız doğma el-obalarına qayıda biləcəklər. Bu baxımdan, növbəti il həm fiziki gəlirlərimizdə dayanıqlılığın qorunub saxlanılması, həm də sosial təminat və müdafiə tədbirlərinin gücləndirilməsi, eləcə də Qarabağın və Şərqi Zəngəzurun bərpa və yenidənqurma işlərinin intensivləşməsi ilə yadda qalacaq", - deyə o qeyd edib.

Deputat vurğulayıb ki, növbəti ildə dövlət büdcəsindən sosial istiqamətə ayrılan vəsaitin həcmində də artım olacaq: "Təkcə sosial təminat və sosial müdafiə xərclərinin 4,5 milyard manatdan çox olması planlaşdırılır. Həmçinin əməkhaqlarının verilməsinə də 9 milyard manatdan artıq vəsaitin ayrılması nəzərdə tutulur. Bütövlükdə büdcə xərclərinin 45 faizi sosialyönümlü olacaq".

Vüqar Bayramov onu da qeyd edib ki, 2024-cü ilin dövlət büdcəsi haqqında qanun layihəsinə əsasən, gələn il cəmi 7 rayona vəsait ayrılacaq: "Bu o deməkdir ki, növbəti il 59 rayon və şəhər yerli gəlir və xərcləri tənzimləmək üçün mərkəzləşdirilmiş xərclərdən vəsait almayacaq və özünümaliyyələşdirmə prinsipi ilə işləyəcək. 2022-ci ildə dövlət büdcəsindən 14 rayona vəsait ayrılmışdı. Göründüyü kimi, dövlət büdcəsindən pul alan rayonların sayı ildən-ilə azalır".

Deputatın dediyinə görə, gələn ilin dövlət büdcəsindən Cəbrayıl 1 milyon 214 min manat, Xocavənd 1 milyon 229 min manat, Xocalı 1 milyon 73 min manat, Kəlbəcər 1 milyon 945 min manat, Laçın 1 milyon 401 min manat, Yardımlı 1 milyon 863 min manat və Zəngilan 623 min manat vəsait ala biləcəklər. Bu rayonlarımız büdcədən 9 milyon 348 min manat alacaq. Bu il bu rəqəm 12 milyon 306 min manat idi. Bütün rayonlar üzrə dövlət büdcəsindən ayrılan vəsaitin həcmi gələn il azaldılacaq.

Vüqar Bayramov əlavə edib ki, gələn il büdcədən vəsait alacaq 7 rayonun altısı Qarabağ və Şərqi Zəngəzurda yerləşir: "İşğaldan azad olunan ərazilərimizdən kənarda, sadəcə, Yardımlı rayonu dövlət büdcəsindən dəstək ala biləcək. Özünü maliyyələşdirəcək rayonların sayının artması dövlət büdcəsindən asılılığın aradan qaldırılması baxımından vacibdir. Nəzərə almaq lazımdır ki, hazırda əsas hədəflərdən biri iqtisadiyyatın balanslı inkişafının dəstəklənməsi və region ilə paytaxt arasındakı iqtisadi fərqin mərhələli şəkildə azaldılmasıdır. Bu baxımdan, həmin rayonlara daha çox sərmayə cəlbinin təşviq edilməsi vacibdir".

Nəzrin QAFARZADƏ,

Azərbaycan.-2024.- 4 noyabr.-S.5.